Parth Pawar : राष्ट्रवादी काँग्रेस पक्षाचे (अजित पवार गट) संस्थापक आणि माजी उपमुख्यमंत्री अजित पवार यांच्या निधनानंतर पक्षांतर्गत यादवी उफाळून आली आहे. पक्षाचे कार्याध्यक्ष प्रफुल्ल पटेल आणि प्रदेशाध्यक्ष सुनील तटकरे यांनी अजित पवारांच्या निधनानंतर अवघ्या काही दिवसांतच पक्ष ताब्यात घेण्याचा प्रयत्न केल्याचा गंभीर आरोप आमदार रोहित पवार यांनी केला आहे. या आरोपांमुळे महायुतीतील घटक पक्ष असलेल्या राष्ट्रवादीच्या अंतर्गत रचनेत मोठे तडे गेल्याचे स्पष्ट झाले असून, आता या वादात पार्थ पवार यांनी उडी घेत सर्व आरोप फेटाळून लावले आहेत.
निवडणूक आयोगाकडे पत्रांची लढाई आणि अधिकारपदाचा पेच-
आमदार रोहित पवार यांनी केलेल्या दाव्यानुसार, अजित पवारांच्या मृत्यूला १८ दिवस उलटत नाहीत तोच प्रफुल्ल पटेल, सुनील तटकरे आणि ब्रिजमोहन श्रीवास्तव यांनी केंद्रीय निवडणूक आयोगाला एक पत्र लिहिले. या पत्राद्वारे त्यांनी पक्षाच्या घटनेत बदल करण्याची मागणी करत, सर्व कार्यकारी अधिकार प्रफुल्ल पटेल यांच्याकडे सोपवण्याची विनंती केली होती. विशेष म्हणजे, हा पत्रव्यवहार करताना अजित पवारांचे पुत्र पार्थ पवार किंवा त्यांच्या पत्नी सुनेत्रा पवार यांना पूर्णपणे अंधारात ठेवण्यात आल्याचा दावा रोहित पवारांनी केला आहे. या प्रकाराची माहिती मिळताच, नवनियुक्त पक्षप्रमुख सुनेत्रा पवार यांनी निवडणूक आयोगाला पत्र लिहून स्पष्ट केले की, २८ जानेवारी २०२६ नंतर पक्षाच्या वतीने झालेला कोणताही अनधिकृत पत्रव्यवहार हा अवैध (Null and Void) मानला जावा.
‘काळी जादू’ आणि २७ जानेवारीच्या बैठकीचे गूढ-
रोहित पवार यांनी या वादाला एक अनाकलनीय वळण दिले आहे. त्यांनी असा खळबळजनक आरोप केला की, अजित पवारांच्या निधनाच्या काही दिवस आधी त्यांच्या निवासस्थानाबाहेर ‘काळ्या जादू’चे विधी करण्याचा प्रयत्न झाला होता. तसेच, २७ जानेवारी रोजी—म्हणजेच अजित पवारांच्या निधनाच्या एक दिवस आधी—झालेल्या एका गुप्त बैठकीची सखोल चौकशी करण्याची मागणी त्यांनी केली आहे. भाजप नेते पीयूष गोयल यांनी प्रफुल्ल पटेल यांचा उल्लेख ‘राष्ट्रवादीचे अध्यक्ष’ म्हणून करणे, ही केवळ तांत्रिक चूक नसून तो एका मोठ्या राजकीय कटाचा भाग असू शकतो, असा संशयही त्यांनी व्यक्त केला आहे.
पार्थ पवारांकडून ज्येष्ठ नेत्यांची पाठराखण-
प्रफुल्ल पटेल आणि सुनील तटकरे यांच्यावर होत असलेल्या या टीकेनंतर पार्थ पवार यांनी समाजमाध्यमाद्वारे (ट्विटर) अधिकृत स्पष्टीकरण दिले आहे. “पटेल आणि तटकरे यांच्याविरोधात पसरवल्या जाणाऱ्या बातम्या पूर्णपणे निराधार, तर्कहीन आणि काल्पनिक आहेत. या ज्येष्ठ नेत्यांचे अनेक दशकांचे नेतृत्व आणि समर्पण आजही आमच्यासाठी मार्गदर्शक आहे. अशा अनुभवी नेत्यांना कपोलकल्पित वादात ओढणे अत्यंत दुर्दैवी आणि निषेधार्ह आहे,” अशा शब्दांत पार्थ यांनी आरोपांचे खंडन केले.
विमान अपघात आणि विधिमंडळातील शांतता
रोहित पवारांनी बारामती विमान अपघाताचा मुद्दाही उपस्थित केला आहे. विधिमंडळाच्या अर्थसंकल्पीय अधिवेशनात या गंभीर विषयावर चर्चा न करण्याच्या सूचना आमदारांना देण्यात आल्या होत्या, असा दावा त्यांनी केला. यामुळेच अनेक आमदार या विषयावर गप्प राहिले आणि यामागेही प्रफुल्ल पटेल व सुनील तटकरे यांची भूमिका संशयास्पद असल्याचे त्यांनी सुचवले आहे.
