Pune SSC Exam : महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने घेण्यात येणाऱ्या दहावीच्या परीक्षा ‘कॉपीमुक्त’ आणि ‘तणावमुक्त’ वातावरणात पार पाडण्यासाठी प्रशासनाने मोठा फौजफाटा तैनात केला होता. मात्र, मंडळाच्या या प्रयत्नांना हरताळ फासणारी एक अत्यंत गंभीर घटना पुण्यात उघडकीस आली आहे. नागपुरातील पेपर फुटीचे प्रकरण ताजे असतानाच, आता पुणे जिल्ह्यात दहावीच्या गणित भाग-१ आणि भाग-२ च्या प्रश्नपत्रिका परीक्षेपूर्वीच ‘टेलिग्राम’ या सोशल मीडिया प्लॅटफॉर्मवर प्रसारित झाल्याने शिक्षण वर्तुळात मोठी खळबळ उडाली आहे.
तीन दिवस आधीच प्रश्नपत्रिका सार्वजनिक-
प्राप्त माहितीनुसार, गणिताच्या पेपरबाबतचा हा प्रकार अत्यंत धक्कादायक आहे. गणित भाग-२ ची प्रश्नपत्रिका तर चक्क परीक्षेच्या तीन दिवस आधीच एका टेलिग्राम ग्रुपवर उपलब्ध करून देण्यात आली होती. जेव्हा या ग्रुपवरील प्रश्नपत्रिकांची पडताळणी मंडळाच्या अधिकृत प्रश्नपत्रिकांशी करण्यात आली, तेव्हा त्या तंतोतंत जुळल्याचे स्पष्ट झाले. तंत्रज्ञानाचा गैरवापर करून परीक्षेच्या गोपनीयतेचा भंग झाल्याने प्रामाणिकपणे अभ्यास करणाऱ्या विद्यार्थ्यांमध्ये आणि पालकांमध्ये चिंतेचे वातावरण निर्माण झाले आहे.
पोलीस प्रशासनाकडून सखोल तपास सुरू-
या गंभीर प्रकरणाची दखल घेत पुणे बोर्डाने तातडीने पोलिसांत अधिकृत तक्रार दाखल केली आहे. सायबर पोलीस आणि स्थानिक प्रशासन आता या टेलिग्राम ग्रुपच्या मुळापर्यंत पोहोचण्याचा प्रयत्न करत आहेत. हा पेपर नेमका कोठून लीक झाला? यात शाळांमधील कर्मचाऱ्यांचा हात आहे की बाहेरील टोळी सक्रिय आहे? या दिशेने तपास चक्रावली जात आहेत. डिजिटल पुराव्यांच्या आधारे संशयितांचा शोध घेतला जात असून, दोषींवर कठोर कारवाई करण्याचे संकेत प्रशासनाने दिले आहेत.
शैक्षणिक शुचितेला तडा: पुण्यात पेपर फोडणाऱ्या टोळीवर गुन्हे-
विद्येचे माहेरघर मानल्या जाणाऱ्या पुणे शहरात दहावीच्या प्रश्नपत्रिका परीक्षेपूर्वीच फुटल्याने शैक्षणिक क्षेत्रात मोठी खळबळ उडाली आहे. या गंभीर प्रकरणी पुणे विभागीय मंडळाने तत्परता दाखवत शिवाजीनगर पोलीस ठाण्यात अधिकृत तक्रार नोंदवली आहे. पोलिसांनी या गुन्ह्यात संबंधित ‘टेलिग्राम’ ग्रुपचा मुख्य प्रशासक (ॲडमिन) आणि त्यातील सक्रिय सदस्यांविरुद्ध भारतीय दंड संहिता आणि परीक्षा गैरप्रकार प्रतिबंधक कायद्यान्वये गुन्हे दाखल केले आहेत. सायबर विभागामार्फत या प्रकरणाचा तांत्रिक तपास सुरू असून, प्रश्नपत्रिका मूळ कोठून आणि कशी बाहेर आली, याचे गूढ अद्याप कायम आहे. गोपनीय मानल्या जाणाऱ्या या प्रक्रियेत कोणा वरिष्ठ अधिकाऱ्याचा किंवा कर्मचाऱ्याचा हात आहे का, याचा शोध घेणे आता पोलिसांसमोर मोठे आव्हान बनले आहे.
