Trupti Desai on Neelam Gorhe : अशोक खरात प्रकरण आता एका नव्या वळणावर येऊन ठेपले असून, यात अनेक दिग्गज राजकीय नेत्यांची नावे समोर येत असल्याने महाराष्ट्राच्या राजकारणात मोठी खळबळ उडाली आहे. सामाजिक कार्यकर्त्या तृप्ती देसाई यांनी या प्रकरणात आता थेट विधान परिषदेच्या उपसभापती नीलम गोऱ्हे यांच्यावर निशाणा साधला आहे. देसाई यांच्या दाव्यानुसार, नीलम गोऱ्हे यांनी आपल्या राजकीय भविष्याबाबत आणि मंत्रीपद मिळण्याबाबत खरातची मदत घेतली होती.
तृप्ती देसाई यांनी केलेल्या खळबळजनक गौप्यस्फोटानुसार, नीलम गोऱ्हे या नाशिकमधील कॉलेज रोड परिसरातील अशोक खरातच्या कार्यालयात प्रत्यक्ष गेल्या होत्या. आपल्याला आगामी काळात मंत्रीपद मिळणार की नाही आणि आपले राजकीय भविष्य नेमके कसे असेल, याबद्दल मार्गदर्शन घेण्यासाठी त्यांनी खरातची भेट घेतल्याचे सांगितले जात आहे. हा दावा करताना देसाई यांनी एका विशिष्ट प्रसंगाचाही उल्लेख केला आहे. त्यांच्या मते, कोरोना महामारीचा काळ सुरू होण्यापूर्वी नीलम गोऱ्हे नाशिकमधील पाथर्डी फाटा परिसरातील एक्स्प्रेस इन हॉटेलमध्ये वास्तव्यास होत्या. त्या मुक्कामादरम्यान अशोक खरात हा स्वतः गोऱ्हे यांची भेट घेण्यासाठी त्या हॉटेलवर गेला होता आणि तिथेच त्यांच्यात भविष्याबाबत चर्चा झाली होती.
या प्रकरणाने आता गंभीर स्वरूप धारण केले असून, एका उच्चपदस्थ घटनात्मक पदावर असलेल्या व्यक्तीचे नाव अशा वादात आल्याने उलटसुलट चर्चांना उधाण आले आहे. खरातच्या माध्यमातून अनेक बड्या नेत्यांनी आपले राजकीय गणित जुळवण्याचा प्रयत्न केल्याचे संकेत यातून मिळत आहेत.
अशोक खरात प्रकरण: नीलम गोऱ्हे यांच्या मौनावर तृप्ती देसाईंचा प्रहार; गंभीर आरोपांनी राजकीय वर्तुळ ढवळले-
अशोक खरात प्रकरणाने सध्या संपूर्ण राज्याचे राजकारण ढवळून काढले असतानाच, सामाजिक कार्यकर्त्या तृप्ती देसाई यांनी विधान परिषदेच्या उपसभापती नीलम गोऱ्हे यांच्या भूमिकेवर अत्यंत गंभीर प्रश्नचिन्ह उपस्थित केले आहे. या प्रकरणातील धक्कादायक माहिती समोर येऊनही महिलांच्या हक्कांसाठी आग्रही राहणाऱ्या नीलम गोऱ्हे अद्याप शांत का आहेत, असा सवाल देसाई यांनी विचारला आहे.
तृप्ती देसाई यांच्या मते, नीलम गोऱ्हे या नेहमीच सामाजिक आणि महिलांच्या प्रश्नांवर अत्यंत संवेदनशील आणि तत्पर राहिल्या आहेत. अगदी छोट्या घटना घडल्या तरी त्या तातडीने प्रेस नोट प्रसिद्ध करतात, पीडित महिलांची भेट घेतात आणि जाहीरपणे आपली भूमिका मांडतात. मात्र, अशोक खरात प्रकरणात दीडशेहून अधिक आक्षेपार्ह व्हिडिओ पोलिसांच्या हाती लागले आहेत आणि खुद्द मुख्यमंत्री देवेंद्र फडणवीस यांनीही या प्रकरणाची दखल घेतली आहे. इतके गंभीर स्वरूप असूनही, संपूर्ण विधिमंडळ अधिवेशन पार पडले तरी उपसभापती म्हणून किंवा एक महिला नेत्या म्हणून नीलम गोऱ्हे यांनी यावर अवाक्षरही काढले नाही, ही बाब संशयास्पद असल्याचे देसाई यांनी नमूद केले.
या मौनामागचे कारण स्पष्ट करताना तृप्ती देसाई यांनी खळबळजनक आरोप केला आहे. त्यांच्या दाव्यानुसार, अशोक खरात आणि नीलम गोऱ्हे यांचे निकटचे संबंध असल्यानेच त्या या विषयावर बोलणे टाळत आहेत. एका बाजूला महिला शोषणाचा मुद्दा समोर असताना, दुसऱ्या बाजूला जबाबदार घटनात्मक पदावर असलेल्या नेत्याने बाळगलेले हे मौन अनेक शंकांना जन्म देत असल्याचे देसाई यांनी म्हटले आहे.
अशोक खरात प्रकरण: नीलम गोऱ्हे यांच्या ‘त्या’ भेटींवर तृप्ती देसाईंचा थेट सवाल; आर्थिक व्यवहारांचेही उपस्थित केले संशय-
अशोक खरात प्रकरणातील गुंतागुंत दिवसेंदिवस वाढत असून, सामाजिक कार्यकर्त्या तृप्ती देसाई यांनी आता विधान परिषदेच्या उपसभापती नीलम गोऱ्हे यांच्यावर अत्यंत बोचऱ्या शब्दांत टीका केली आहे. विशेष म्हणजे, या भेटींच्या वेळी तिथे उपस्थित असलेल्या प्रत्यक्षदर्शींनीच पुण्याला येऊन आपल्याला ही सर्व माहिती दिली असल्याचे देसाई यांनी स्पष्ट केले आहे.
तृप्ती देसाई यांनी नीलम गोऱ्हे यांच्या राजकीय प्रतिमेवर बोट ठेवत म्हटले की, गोऱ्हे या नेहमीच स्पष्टवक्तेपणासाठी ओळखल्या जातात. अशा परिस्थितीत, जेव्हा खरातचे काळे कारनामे चव्हाट्यावर आले, तेव्हा त्यांनी स्वतःहून समोर येऊन यावर भाष्य करणे अपेक्षित होते. अशोक खरात हा त्यांच्या परिचयाचा असला, तरी एक जबाबदार लोकप्रतिनिधी म्हणून “परिचय असला तरीही मी या कृत्याचा निषेध करते आणि याविरोधात आवाज उठवणार,” अशी कणखर भूमिका त्यांनी घ्यायला हवी होती. मात्र, त्यांचे मौन अनेक प्रश्न उपस्थित करत आहे.
देसाई यांनी पुढे अत्यंत गंभीर आरोप करताना विचारले की, ज्या कार्यालयात महिलांवर लैंगिक अत्याचार झाल्याचे समोर येत आहे, त्याच ठिकाणी नीलम गोऱ्हे भविष्य पाहण्यासाठी का गेल्या होत्या? केवळ मंत्रीपद मिळावे या लालसेपोटी त्यांनी खरातच्या कार्यालयाची पायरी चढली का? यासोबतच, “तुमचा आणि खरातचा केवळ भविष्यापुरता संबंध आहे की यात काही आर्थिक देवाणघेवाणीचाही भाग आहे?” असा थेट सवाल देसाई यांनी विचारला असून, यावर गोऱ्हे यांनी जनतेला उत्तर द्यावे, अशी मागणी केली आहे.
शेवटी, आपल्याच पक्षाच्या आमदारांना हा संवेदनशील मुद्दा विधान परिषदेत उपस्थित करण्यासाठी नीलम गोऱ्हे यांनी का प्रवृत्त केले नाही, असा प्रश्न विचारत देसाई यांनी त्यांच्यावर कर्तव्यात कसूर केल्याचा ठपका ठेवला आहे.
अशोक खरात प्रकरण: रुपाली चाकणकरांनंतर आता नीलम गोऱ्हे यांच्याही चौकशीची मागणी; तृप्ती देसाई –
अशोक खरात प्रकरणाने राज्याच्या राजकीय वर्तुळात गदारोळ माजवला असून, आता या चौकशीचा फेरा बड्या महिला नेत्यांच्या दिशेने वळताना दिसत आहे. सामाजिक कार्यकर्त्या तृप्ती देसाई यांनी या प्रकरणात अत्यंत आक्रमक भूमिका घेत, विधान परिषदेच्या उपसभापती नीलम गोऱ्हे यांच्या चौकशीची मागणी लावून धरली आहे. ज्या धर्तीवर राज्य महिला आयोगाच्या अध्यक्षा रुपाली चाकणकर यांची चौकशी प्रस्तावित आहे, त्याच धर्तीवर नीलम गोऱ्हे यांचीही सखोल चौकशी का होऊ नये, असा रोखठोक सवाल देसाई यांनी उपस्थित केला आहे.
या प्रकरणात रुपाली चाकणकर यांचे नाव चर्चेत आल्यानंतर आता नीलम गोऱ्हे यांच्या संदर्भातही अनेक खळबळजनक माहिती समोर येत आहे. “जर या प्रकरणातील निष्पक्ष चौकशी व्हायची असेल, तर ज्या ज्या नेत्यांचा खरातशी संबंध आला आहे, त्या सर्वांची चौकशी होणे काळाची गरज आहे,” असे मत देसाई यांनी व्यक्त केले.
खरातच्या कार्यालयाशी आणि त्याच्याशी असलेल्या कथित संबंधांमुळे तपासावर कोणताही दबाव येऊ नये, यासाठी प्रशासनाने नीलम गोऱ्हे यांचीही रीतसर चौकशी करावी, अशी आग्रही मागणी आता जोर धरत आहे.
देसाई यांच्या दाव्यानुसार, नीलम गोऱ्हे आणि अशोक खरात यांचे संबंध केवळ वरवरचे नसून ते गेल्या ७ ते ८ वर्षांपासूनचे अत्यंत जुने संभंध आहेत. तृप्ती देसाई यांनी या माहितीचा स्रोत स्पष्ट करताना सांगितले की, ही माहिती त्यांना कोणा तिसऱ्या व्यक्तीकडून मिळालेली नाही, तर खुद्द नीलम गोऱ्हे यांच्यासोबत वावरणाऱ्या व्यक्तींनीच ही धक्कादायक माहिती उघड केली आहे. नीलम गोऱ्हे जेव्हा नाशिक किंवा मुंबईच्या दौऱ्यावर असायच्या, तेव्हा त्यांच्या ताफ्यात आणि सोबत असलेल्या व्यक्तींनीच पुण्याला येऊन देसाई यांची भेट घेतली आणि या सर्व बाबींचा उलगडा केला.
एका जबाबदार पदावर असलेल्या महिला नेत्याचे नाव इतक्या जुन्या संबंधांच्या संदर्भात खरातशी जोडले गेल्याने राजकीय वर्तुळात प्रचंड खळबळ उडाली आहे. “फोटो नसले तरी वस्तुस्थिती नाकारता येत नाही,” असे म्हणत तृप्ती देसाई यांनी आता या संपूर्ण प्रकरणाची सखोल आणि निष्पक्ष चौकशी करण्याची मागणी पुन्हा एकदा लावून धरली आहे.
