Sreeleela Period Controversy: दाक्षिणात्य अभिनेत्री श्रीलीला सध्या तिच्या एका वक्तव्यामुळे वादाच्या भोवऱ्यात सापडली आहे. ‘उस्ताद भगत सिंग’ या चित्रपटाच्या एका कार्यक्रमात बोलताना तिने मासिक पाळी आणि कामातील सातत्य यावर भाष्य केले होते. मात्र, तिचे हे मत अनेक महिलांना आणि नेटिझन्सना पटलेले नाही.
नेमकं काय म्हणाली श्रीलीला?
नुकतीच वैद्यकीय पदवी पूर्ण केलेल्या श्रीलीलाने तिच्या अनुभवाबद्दल सांगितले. ती म्हणाली, “माझ्या अनेक गाण्यांचे चित्रीकरण मी मासिक पाळी सुरू असताना केले आहे. त्यामुळे ही कोणतीही सबब होऊ शकत नाही. जेव्हा आपण समानतेच्या गोष्टी करतो, तेव्हा आपल्याला शारीरिक मर्यादांच्या पलीकडे जाऊन काम करावे लागते. मानसिक किंवा शारीरिक कोणतीही अडचण हे कामातून पळ काढण्याचे कारण असू शकत नाही.”
सोशल मीडियावर तीव्र पडसाद
श्रीलीला स्वतः डॉक्टर असूनही तिने महिलांच्या वेदनांकडे दुर्लक्ष केल्याचा आरोप नेटीझन्स करत आहेत. सोशल मीडियावर उमटलेल्या काही प्रतिक्रिया खालीलप्रमाणे आहेत:
एका युजरने लिहिले की, “तुम्हाला त्या काळात नाचणे शक्य झाले असेल, याचा अर्थ असा नाही की प्रत्येकीला ते जमेल. प्रत्येकीची वेदना सहन करण्याची क्षमता वेगळी असते.”
दुसऱ्या एका महिलेने संताप व्यक्त करत म्हटले की, “मासिक पाळीच्या वेदना असह्य असतात. अशा परिस्थितीतही महिला सर्व कामे करतात. तरीही तुम्ही या वेदनांना ‘सबब’ म्हणता? हे लज्जास्पद आहे.”
अनेकांनी श्रीलीलाच्या डॉक्टर असण्यावरही प्रश्नचिन्ह उपस्थित केले असून, वैद्यकीयदृष्ट्या महिलांच्या वेदनांना कमी लेखणे चुकीचे असल्याचे म्हटले आहे.
श्रीलीलाचे आगामी प्रोजेक्ट्स
श्रीलीलाने २०१९ मध्ये ‘किस’ चित्रपटातून पदार्पण केले होते. अलीकडेच ‘पुष्पा 2’ मधील तिच्या डान्स नंबरने मोठी लोकप्रियता मिळवली. लवकरच ती कार्तिक आर्यनसोबत एका चित्रपटात दिसणार आहे. तसेच धनुषच्या आगामी ‘D55’ या चित्रपटातही ती मुख्य भूमिकेत आहे. या वादावर श्रीलीलाने अद्याप कोणतीही अधिकृत प्रतिक्रिया दिलेली नाही.
