Dhurandhar Movie : देशासाठी शौर्य गाजवणाऱ्या अशोक चक्र आणि सेना मेडल विजेते शहीद मेजर मोहित शर्मा यांच्या जीवनावर आधारित असल्याचा दावा करणाऱ्या आगामी ‘धुरंधर’ चित्रपटाभोवती कायदेशीर वादळ उभे राहिले आहे. मेजर शर्मा यांच्या पालकांनी अभिनेता रणवीर सिंग (Ranvir Singh) अभिनित या चित्रपटाच्या प्रदर्शनाला तातडीने स्थगिती मिळावी, यासाठी दिल्ली उच्च न्यायालयात (Delhi High Court) याचिका दाखल केली आहे.
चित्रपट निर्मात्यांनी लष्कराची किंवा कुटुंबाची परवानगी न घेता, मेजर शर्मा यांच्या गुप्त कारवायांवर आधारित चित्रपट बनवल्याचा आरोप याचिकेत करण्यात आला आहे.
परवानगी न घेतल्याने कुटुंबाची नाराजी आणि आक्षेप
मेजर शर्मा यांच्या कुटुंबियांनी याचिकेत म्हटले आहे की, चित्रपटाच्या ट्रेलर आणि प्रसिद्धी सामग्रीमध्ये त्यांच्या लष्करी सेवेतील महत्त्वाचे आणि गुप्त ऑपरेशन्सचे पैलू दर्शवले गेले आहेत. विविध चर्चांमध्ये ‘धुरंधर’ हा चित्रपट मेजर मोहित शर्मा यांच्या जीवनावर आधारित असल्याचे वारंवार सांगितले जात असतानाही, निर्मात्यांनी मात्र याबद्दल कुटुंबाशी कोणतीही सल्लामसलत केलेली नाही.
- सन्मानाचा मुद्दा: शहीद व्यक्ती ही व्यावसायिक वस्तू नाही आणि सत्य, सन्मान व योग्य परवानगीशिवाय त्यांच्या जीवनाचा वापर नफा कमावण्यासाठी करू नये. अशा अनधिकृत चित्रणामुळे कुटुंबाच्या गोपनीयता आणि सन्मानाच्या हक्कांचे उल्लंघन होते, असा युक्तिवाद याचिकाकर्त्यांनी केला आहे.
- सुरक्षेची चिंता: या याचिकेत राष्ट्रीय सुरक्षेशी संबंधित गंभीर चिंता देखील व्यक्त करण्यात आली आहे. चित्रपटात लष्कराचे बारकावे आणि गुप्त रणनीती दर्शवल्या गेल्या आहेत. लष्कराचे चित्रण माध्यमांमध्ये कसे केले जावे हे नियंत्रित करणाऱ्या संस्थेकडून (ADGPI) निर्मात्यांनी स्क्रिप्ट तपासून घेतली नाही, असे कुटुंबाचे म्हणणे आहे.
कुटुंबाची मागणी
याचिकाकर्त्यांनी कोर्टाला विनंती केली आहे की, चित्रपटाच्या प्रदर्शनाला स्थगिती देण्यात यावी आणि चित्रपट सार्वजनिक करण्यापूर्वी कुटुंबासाठी चित्रपटाचे खासगी स्क्रीनिंग आयोजित करण्याचा आदेश द्यावा.
तसेच, भविष्यात कोणत्याही लष्करी शहीदाच्या जीवनावर आधारित चित्रपट बनवण्यापूर्वी त्यांच्या कायदेशीर वारसदारांची आणि लष्कराची पूर्वपरवानगी घेणे बंधनकारक करावे, अशी महत्त्वपूर्ण मागणीही त्यांनी केली आहे.
हे देखील वाचा – India GDP Growth : ऐतिहासिक उसळी! भारताचा जीडीपी विकास दर 8.2% वर, अर्थव्यवस्थेने मोडले सर्व अंदाज
