Spirit Movie : दाक्षिणात्य सुपरस्टार प्रभासच्या ‘स्पिरिट’ या चित्रपटाची घोषणा झाल्यापासून चाहत्यांमध्ये कमालीची उत्सुकता आहे. आता या चित्रपटाबाबत एक मोठी अपडेट समोर आली असून बॉलिवूड अभिनेता विवेक ओबेरॉय या मेगा प्रोजेक्टमध्ये सामील झाला आहे.
चित्रपटाच्या नवीन पोस्टरमध्ये विवेक ओबेरॉयसोबतच नवोदित अभिनेत्री ऐश्वर्या देसाईची झलक पाहायला मिळत असून, तिचा लूक सोशल मीडियावर चांगलाच व्हायरल होत आहे. ‘ॲनिमल’च्या प्रचंड यशानंतर निर्माता भूषण कुमार आणि दिग्दर्शक संदीप रेड्डी वांगा आता ‘स्पिरिट’ हा चित्रपट अत्यंत भव्य स्वरूपात प्रेक्षकांसमोर आणण्यासाठी सज्ज झाले आहेत.
कोण आहे ही नवीन अभिनेत्री?
या चित्रपटातून ऐश्वर्या देसाई आपले नशीब आजमावत आहे. ऐश्वर्या ही एक भारतीय-अमेरिकन मॉडेल असून तिने अभिनयाकडे वळण्यापूर्वी मॉडेलिंग क्षेत्रात स्वतःची ओळख निर्माण केली आहे. तिने यापूर्वी रणवीर सिंगच्या ‘गल्ली बॉय’ चित्रपटात काम केले असून, ‘रॅट इन द किचन’ या लघुपटासाठी तिला पुरस्कारही मिळाला आहे.
अभिनयात येण्यापूर्वी ऐश्वर्याने युनिव्हर्सिटी ऑफ मेरीलँडमधून मार्केटिंगमध्ये पदवी पूर्ण केली आहे. ती सोशल मीडियावरही खूप सक्रिय असून इन्स्टाग्रामवर तिचे ३६,००० हून अधिक फॉलोअर्स आहेत.
चित्रपटाची स्टारकास्ट आणि रिलीज
संदीप रेड्डी वांगा यांच्या दिग्दर्शनाखाली बनत असलेल्या या चित्रपटात प्रभास मुख्य भूमिकेत आहे. त्याच्यासोबत तृप्ती डिमरी स्क्रीन शेअर करताना दिसणार आहे. याव्यतिरिक्त ज्येष्ठ अभिनेते प्रकाश राज यांचीही यात महत्त्वपूर्ण भूमिका आहे. हा चित्रपट पॅन-इंडिया स्तरावर तब्बल ८ भाषांमध्ये प्रदर्शित केला जाणार आहे.
निर्मात्यांनी दिलेल्या माहितीनुसार, ‘स्पिरिट’ हा चित्रपट पुढील वर्षी ५ मार्च रोजी चित्रपटगृहात प्रदर्शित होणार आहे.
