न्यूयॉर्क- अमेरिकन अंतराळ संस्था ‘नासा’ भारताचे ग्रुप कॅप्टन शुभांशु शुक्ला यांना आंतरराष्ट्रीय अंतराळ स्थानकावर पाठवणार आहे. विंग कमांडर राकेश शर्मा यांच्यानंतर चार दशकांनी भारतीय नागरिकाला ही संधी मिळाली आहे.इस्रोने काल काल एका निवेदनाद्वारे ही माहिती दिली.
इस्त्रोच्या ह्युमन स्पेस फ्लाईट सेंटरने आंतरराष्ट्रीय अंतराळ स्थानकासाठीच्या आगामी मिशनसाठी अमेरिकेशी करार केला आहे.त्यामध्ये दोन भारतीय प्राइम आणि बॅकअप मिशन पायलट असतील.इस्त्रोने दिलेल्या निवेदनानुसार, ग्रुप कॅप्टन शुक्ला हे मुख्य मिशन पायलट असतील, तर भारतीय हवाई दलाचे दुसरे अधिकारी, ग्रुप कॅप्टन प्रशांत बालकृष्णन नायर हे बॅकअप मिशन पायलट असतील. दोन्ही अधिकाऱ्यांना ‘गगनयात्री’ म्हणूनही ओळखले जाईल. ऑगस्टच्या पहिल्या आठवड्यात त्यांचे प्रशिक्षण सुरू होईल.
लखनौमध्ये जन्मलेले ग्रुप कॅप्टन शुभांशू शुक्ला यांचा भारतीय हवाई दलातील प्रवास सुमारे १८ वर्षांपूर्वी सुरू झाला.कठोर आणि दीर्घ लष्करी प्रशिक्षणासाठी त्यांनी राष्ट्रीय संरक्षण प्रबोधिनीत प्रवेश केला. ग्रुप कॅप्टन शुक्ला यांच्या मोठ्या बहिणीने सांगितले की, कारगिल दरम्यान भारतीय जवानांच्या शौर्य आणि बलिदानाच्या वीरगाथा वाचून त्यांना सशस्त्र दलात सामील होण्याची प्रेरणा मिळाली होती.
