चंद्रपूर – जिल्ह्यातील वाघीण आता ओडिशाचे जंगल फुलवणार आहे. यासाठी अडीच ते तीन वर्षे वयाच्या दोन वाघिणी शोधल्या जात होत्या. त्यातील एक वाघीण पकडून काल रवाना करण्यात आली.
टी-१५८ क्रमांकाची ही वाघीण ताडोबाच्या खडसंगी-नवेगाव या बफर क्षेत्रातून पकडण्यात आली. तिचे वय अडीच ते तीन वर्षे असल्याचे सांगण्यात आले आहे.एकूण तीन वाघिणी ओडिशाच्या सिमलीपाल व्याघ्र प्रकल्पात पाठवायच्या आहेत.त्यातील पहिली वाघीण आज रवाना करण्यात आली. ओडिशातील सिमलीपाल व्याघ्र प्रकल्पात वाघिणींची संख्या कमी आहे. त्यामुळे ओडिशा राज्य सरकारने प्रजनन आणि ओघानेच वाघांच्या वाढीसाठी वाघिणींची गरज एनटीसीएकडे नोंदवली होती. त्यानुसार ही गरज आता चंद्रपूर जिल्ह्यातून भागवली जात आहे. दोन वाघिणी पाठवायच्या असल्या तरी शोध अनेक वाघिणींचा घेतला जात होता.ताडोबा कोअर,बफर आणि संरक्षित जंगलात हा शोध सुरू होता. काल टी-१५८ क्रमांकाची वाघीण पकडण्यात आली आणि लगेच त्या वाघिणीला ओडिशाला रवाना करण्यात आले. यापूर्वीही अशा रीतीने इथले वाघ राज्यात इतरत्र पाठवण्यात आले, पण ते प्रामुख्याने हल्लेखोर वाघ होते. यावेळी या जंगलात रमलेल्या वाघिणी पकडल्या जात असून ओडिशासारख्या दूरवरच्या राज्यात सोडल्या जात आहेत, त्यामुळे ओडिशा वन विभागाची जबाबदारी वाढली आहे.
