बुलढाणा
समृद्धी महामार्गावर बुलढाण्याजवळ आज सकाळी काही तासांतच दोन अपघात झाले. या अपघातांमध्ये तिघांचा जागीच मृत्यू झाला तर, ९ जण जखमी झाले. यातील पहिल्या अपघातात चालकाला डुलकी लागल्याने भरधाव वेगात असलेली कार साईड बेरिअरला धडकली. यात तिघांनी आपले प्राण गमावले, तर ४ जण गंभीर जखमी झाले. ही कार नाशिकच्या दिशेने जात होती.
दुसरी अपघाताची घटना देखील चालकाला डुलकी लागल्यानेच घडली. पुण्याहून नागपूरच्या दिशेने निघालेली कार एका ट्रकला पाठीमागून धडकली. या घटनेत ५ जण गंभीर जखमी झाले. अपघाताची माहिती मिळताच महामार्ग पोलिसांनी घटनास्थळी धाव घेत बचावकार्य केले. दोन्ही अपघातातील जखमींवर सध्या रुग्णालयात उपचार सुरु आहेत. या भीषण अपघातांमध्ये दोन्ही गाड्यांचे मोठे नुकसान झाले आहे.