नवी दिल्ली- सीआरपीएफ अर्थात केंद्रीय राखीव पोलीस दल हे देशातील सर्वात मोठे केंद्रीय निमलष्करी दल समजले जाते.या दलाच्या ग्राउंड कमांडरपासून कमांडंटपर्यंतच्या अधिकाऱ्यांच्या रेशन मनी भत्त्यात कपात करण्यात आली आहे. केंद्रीय गृहमंत्रालयाच्या आदेशानंतर सीआरपीएफमध्ये ड्युटी बटालियनव्यतिरिक्त इतर अधिकाऱ्यांचा रेशन भत्ता बंद करण्यात आला आहे. हा भत्ता बंद झाल्याने अधिकाऱ्यांमध्ये निराशेची भावना निर्माण झाली आहे.
सीआरपीएफच्या ग्राऊंड कमांडर म्हणजेच सहाय्यक कमांडटपासून कमांडंटपर्यंतच्या अधिकाऱ्यांचा रेशन मनी भत्ता बंद करण्यात आला आहे.सीआरपीएफमध्ये आता केवळ ड्युटी बटालियनला हा भत्ता बंद देण्यात येणार आहे. यामुळे या अधिकाऱ्यांचे सरासरी ४ हजार रुपयांचे नुकसान होणार आहे.केंद्रीय गृह मंत्रालयाने पोलिसांच्या ३ डिव्हिजनमध्येदेखील अशाच प्रकारचे आदेश काही दिवसांपूर्वी जारी केले आहेत.तर सीआरपीएफ महासंचालकांनी शुक्रवारी हे आदेश जारी केले.
या अधिकाऱ्यांना १ नोव्हेंबरपासून हा भत्ता दिला जाणार नाही.चार वर्षांपूर्वी सीआरपीएफच्या ९ रँकवर तैनात असलेल्या अधिकारी आणि कर्मचाऱ्यांना डिटॅचमेंट अलाऊन्स देण्याचा निर्णय घेण्यात आला होता. त्यावेळी हे कर्मचारी रेशन मनीसाठी पात्र असतील तर त्यांना हा भत्तादेखील दिला जाणार असल्याचे आदेश काढले होते. यापूर्वी कोणत्याही संस्थेत आणि कुठेही नियुक्ती केल्यास रेशन भत्ता दिला जात होता. पण आता ड्युटी बटालियनमधून इतरत्र नियुक्ती झाल्यास अधिकाऱ्यांना रेशनचे पैसे मिळणार नाहीत.
