March GST collections | देशातील आर्थिक गती वाढत असताना आणि कर भरणाऱ्यांची संख्या वाढत असताना, वस्तू व सेवा कर (GST) संकलनाने मार्च महिन्यात (March GST collections) नवा उच्चांक गाठला आहे. मार्च 2025 मध्ये GST संकलन 1.96 लाख कोटी रुपयांवर पोहोचले, जे मागील वर्षीच्या तुलनेत 9.9 टक्क्यांनी अधिक आहे. फेब्रुवारी महिन्यातील 1.84 लाख कोटी रुपयांच्या तुलनेत मार्च महिन्याचे संकलन 6.8 टक्क्यांनी वाढले आहे.
मार्चमधील GST महसुलात केंद्रीय GST (CGST) 38,100 कोटी रुपये, राज्य GST (SGST) 49,900 कोटी रुपये, एकत्रित GST (IGST) 95,900 कोटी रुपये आणि नुकसान भरपाई उपकर 12,300 कोटी रुपये यांचा समावेश आहे. यापूर्वी फेब्रुवारीमध्ये CGST 35,204 कोटी रुपये, SGST 43,704 कोटी रुपये, IGST 90,870 कोटी रुपये आणि उपकर 13,868 कोटी रुपये इतका होता.
राज्यांच्या GST योगदानाचा विचार करता, महाराष्ट्राने सर्वाधिक 31,534 कोटी रुपयांचा कर भरणा केला, जो गेल्या वर्षीच्या तुलनेत 14 टक्क्यांनी अधिक आहे. कर्नाटकाने 13,497 कोटी रुपयांचे योगदान दिले, ज्यामध्ये 4 टक्क्यांची वाढ झाली आहे. गुजरातने 12,095 कोटी रुपये, तामिळनाडूने 11,017 कोटी रुपये, तर उत्तर प्रदेशने 9,956 कोटी रुपयांचे GST संकलन केले. यामध्ये अनुक्रमे 6 टक्के, 7 टक्के आणि 10 टक्क्यांची वाढ झाली आहे. दिल्लीने 6,139 कोटी रुपयांसह सहावे स्थान पटकावले असून, त्यांच्या संकलनात 5 टक्क्यांची वाढ झाली आहे.
दुसरीकडे, बिहारमध्ये सर्वात कमी GST संकलन झाले, जिथे केवळ 2.6 कोटी रुपयांचा महसूल जमा झाला. लक्षद्वीप आणि आंध्र प्रदेशने अनुक्रमे 3 कोटी आणि 4.033 कोटी रुपयांचे संकलन केले. मात्र, अंदमान आणि निकोबार द्वीपसमूहांनी त्यांच्या GST संकलनात 60 टक्के वाढ नोंदवली असून, हा आकडा 51 कोटी रुपयांवर पोहोचला आहे.
यापूर्वी जानेवारी महिन्यात GST संकलन 12.5 टक्क्यांनी वाढले होते, तर फेब्रुवारीमध्ये 9.1 टक्के वाढ होऊन हा महसूल 1.83 लाख कोटी रुपये झाला होता. मार्चमधील संकलनातील वाढ अर्थव्यवस्थेसाठी सकारात्मक मानली जात आहे, तसेच कर प्रणाली अधिक सक्षम होत असल्याचेही यावरून स्पष्ट होते.
