Parliament’s Winter Session – Chaos Over ‘SIR’- संसदेचे बहुप्रतिक्षित हिवाळी अधिवेशन उद्यापासून सुरू होत आहे. १९ दिवसांच्या या अधिवेशनात एकूण १५ दिवस कामकाज होणार आहे.
संसदीय कामकाज मंत्री किरेन रिजिजू यांनी सर्वपक्षीय नेत्यांशी चर्चा करून अधिवेशन सुरळीत पार पडावे, यासाठी सहकार्याची मागणी केली. पण, मतदारयाद्यांच्या विशेष सखोल फेरपडताळणी (एसआयआर) मोहिमेवरून गदारोळाचे संकेत आहेत.
आज झालेल्या सर्वपक्षीय बैठकीला पंतप्रधान नरेंद्र मोदी नेहमीप्रमाणे आले नाहीत. गृहमंत्री अमित शहा, काँग्रेस नेते जयराम रमेश, तृणमूल काँग्रेसचे कल्याण बॅनर्जी बैठकीला हजर होते.
दुसरीकडे, राज्यसभेतील विरोधी पक्षनेते आणि काँग्रेस अध्यक्ष मल्लिकार्जून खर्गे यांनी विरोधी पक्षांची रणनीती ठरवण्यासाठी इंडिया आघाडीच्या नेत्यांची उद्या सकाळी १० वाजता बैठक बोलावली आहे.
या अधिवेशनात सरकार अणुऊर्जा विधेयकासह १० नवीन महत्त्वाची विधेयके सादर करण्याच्या तयारीत आहे. ‘अणुऊर्जा विधेयक’ मंजूर झाल्यास खाजगी कंपन्यांनाही पहिल्यांदाच अणुऊर्जा प्रकल्प उभारण्याची परवानगी मिळू शकेल.
तसेच, उच्च शिक्षण आयोग स्थापन करणारे विधेयक मांडले जाऊ शकते. यानुसार, यूजीसी, एआयसीटीई आणि एनसीटीई यांचे विलिनीकरण करण्याचा सरकारचा विचार आहे.
दुसरीकडे, विरोधी पक्ष मतदारांच्या एसआयआर (स्पेशल इंटेंसिव्ह रिव्हिजन) मुद्द्यावरून सरकारला घेरण्याची शक्यता आहे. पावसाळी अधिवेशनातही याच मुद्द्यावरून मोठा गदारोळ झाला होता.
शिवाय, ‘इंडिया’ आघाडी मुख्य निवडणूक आयुक्त ज्ञानेश कुमार यांच्याविरोधात महाभियोग प्रस्ताव आणण्याच्या तयारीत असल्याचे सांगितले जात आहे.
हे देखील वाचा –
मला भाजपाकडून ऑफर आ. निलेश राणेंचा दावा
डोंबिवलीत उद्घाटन सोहळ्यात भाजपा व शिंदेसेना आमनेसामने
7 कोटींच्या 55 एकर जमिनीची 70 लाखांत विक्री!पालघरमध्ये जमीन घोटाळा! संस्था संचालक सहभागी
