Pune to Get 4 New Leopard Forests – पुणे शहर आणि जिल्ह्यातील अन्य ठिकाणच्या मानवी वस्तीत बिबटे घुसत असल्याच्या घटना वारंवार घडत आहेत. या बिबट्यांना रोखण्यासाठी वनविभागाच्या वतीने जिल्ह्यात चार ठिकाणी नवीन जंगलांची निर्मिती केली जाणार आहे.
शिरूर तालुक्यातील पिंपरखेड व न्हावरा येथे तसेच जुन्नर व मंचरमध्ये ही चार जंगले तयार होणार आहेत. त्यासाठी जागा तयार आहे, त्याचा प्रस्तावही तयार आहे, त्यासाठी आता सरकारी मंजुरीची प्रतीक्षा केली जात असल्याची माहिती जुन्नर वनविभागाचे उपवनसंरक्षक प्रशांत खाडे यांनी दिली.
प्रशांत खाडे म्हणाले की, बिबट्यांना हा नवीन जंगलाचा अधिवास मिळाला की त्यांचे शहरात प्रवेश करणे कमी होईल. या चारही ठिकाणी वनविभागाची बरीच मोठी मोकळी जागा आहे. त्या जागेचा वापर जंगल उभारणीसाठी केला जाईल.
बिबटप्रवण क्षेत्रातच या जागा निवडण्यात आल्या आहेत. ३० ते ५० एकर असे त्यांचे क्षेत्र आहे. सध्या साधे कुरण व विस्तीर्ण मोकळे पठार असे या जागांचे स्वरूप आहे. पिंपरखेड, जांबूत या गावांमध्ये दोन महिन्यांच्या कालावधीत तीन हल्ले होऊन त्यात तीन बळी गेल्यानंतर या जंगलनिर्मितीच्या प्रस्तावाला गती मिळाली आहे.
यात सर्वप्रथम ही संपूर्ण जागा तारांचे मोठे कुंपण घालून बंदिस्त केली जाईल. त्यानंतर आतील परिसरात उत्तम दर्जाचे, वेगाने वाढणारे गवत लावण्यात येईल. देशी वृक्षांच्या बऱ्यापैकी लागवड होईल. जंगल तयार झाल्यावर त्यात पकडलेल्या बिबट्यांना सोडण्याचा वनविभागाचा विचार आहे. नैसर्गिकपणे खाद्य मिळाले, लपण्याच्या जागा तयार झाल्या की, बिबट्यांना नैसर्गिक अधिवास उपलब्ध होणार आहे.
हे देखील वाचा –
संसदेचे हिवाळी अधिवेशन आजपासून’एसआयआर’वरून गोंधळाचे संकेत
