Pratibha Chakankar : नाशिक येथील स्वयंघोषित आध्यात्मिक गुरू तथा भोंदू बाबा अशोक खरात याच्या कथित काळ्या साम्राज्याचा पर्दाफाश झाल्यानंतर, या प्रकरणाचे धागेदोरे आता थेट राजकीय वर्तुळापर्यंत पोहोचले आहेत. राज्य महिला आयोगाच्या माजी अध्यक्षा रुपाली चाकणकर यांच्या भगिनी प्रतिभा चाकणकर आज शिर्डी पोलीस ठाण्यात चौकशीसाठी उपस्थित झाल्या. समता पतसंस्थेतील संशयास्पद आणि कोट्यवधींच्या आर्थिक व्यवहाराप्रकरणी पोलिसांनी त्यांना कायदेशीर नोटीस बजावली होती, ज्याच्या अनुषंगाने त्यांचा जबाब नोंदवण्याची प्रक्रिया सुरू झाली आहे.
आर्थिक व्यवहारांचे संशयास्पद जाळे-
अशोक खरात याच्यावर शिर्डी परिसरात बेकायदेशीर सावकारी, फसवणूक आणि सर्वसामान्यांची पिळवणूक केल्याचे गंभीर गुन्हे दाखल आहेत. या प्रकरणाच्या सखोल तपासादरम्यान पोलिसांना ‘समता पतसंस्थेत’ खरातशी संबंधित तब्बल १३२ संशयास्पद खाती आढळून आली आहेत. धक्कादायक बाब अशी की, या सर्व खात्यांवर खरात हा ‘नॉमिनी’ (वारसदार) म्हणून नियुक्त आहे. यातील चार महत्त्वाची खाती प्रतिभा चाकणकर आणि त्यांच्या पुत्रांच्या नावे असल्याचे तपासात निष्पन्न झाले असून, या खात्यांमधून झालेली उलाढाल पोलिसांच्या रडारवर आहे.
२ कोटी ४० लाखांचा व्यवहार आणि पोलिसांचे प्रश्न-
पोलीस सूत्रांनी दिलेल्या माहितीनुसार, प्रतिभा चाकणकर यांच्या वैयक्तिक नावे दोन आणि त्यांच्या मुलांच्या नावे दोन, अशा एकूण चार खात्यांमधून सुमारे २ कोटी ४० लाख रुपयांचे संशयास्पद व्यवहार झाले आहेत. या अवाढव्य रकमेचा नेमका स्रोत काय? हे पैसे खरातच्या बेकायदेशीर सावकारी व्यवसायातील आहेत का? आणि खरातने चाकणकर कुटुंबातील सदस्यांच्या खात्यांवर स्वतःचे नाव वारसदार म्हणून का लावले? यांसारख्या प्रश्नांच्या उत्तरांसाठी पोलिसांनी प्रतिभा चाकणकर यांची चौकशी चालवली आहे.
राजकीय परिमाण आणि पुढील तपासाची दिशा-
अशोक खरात याच्याशी असलेल्या कथित संबंधांच्या आरोपामुळे रुपाली चाकणकर यांना यापूर्वीच आपल्या पदाचा त्याग करावा लागला होता. आता त्यांच्या सख्ख्या बहिणीचीच पोलीस चौकशी सुरू झाल्याने राजकीय वर्तुळात मोठी खळबळ उडाली आहे. शिर्डी पोलिसांनी यापूर्वीच प्रकरणाशी संबंधित ३३ खातेदारांचे जबाब नोंदवले आहेत. मात्र, चाकणकर यांच्या खात्यातील व्यवहारांचे स्वरूप पाहता, त्यांचा जबाब या तपासातील सर्वात निर्णायक दुवा ठरणार आहे.
