Dubai Attack: जगातील सर्वात गजबजलेले पर्यटन आणि व्यावसायिक केंद्र असलेल्या दुबईमध्ये भीतीचे वातावरण पसरले. इराणने अमेरिका आणि इस्रायलच्या हल्ल्याचा बदला घेण्यासाठी यूएईमधील अनेक लक्ष्यांवर क्षेपणास्त्रांचा वर्षाव केला.
या हल्ल्यांमुळे दुबईतील जनजीवन विस्कळीत झाले असून प्रशासनाने खबरदारीचा उपाय म्हणून जगातील सर्वात उंच इमारत ‘बुर्ज खलिफा’ रिकामी केली आहे. तसेच दुबई आंतरराष्ट्रीय विमानतळ आणि अल मकतूम विमानतळावरील सर्व उड्डाणे पुढील आदेशापर्यंत स्थगित करण्यात आली आहेत.
दुबई आणि अबुधाबीमध्ये स्फोट
इराणने दावा केला आहे की, त्यांनी अबुधाबी आणि दुबईतील अमेरिकेशी संबंधित लष्करी तळांना लक्ष्य केले आहे. अबुधाबीमध्ये क्षेपणास्त्राचा ढिगारा एका निवासी भागात पडल्याने आशियाई वंशाच्या एका नागरिकाचा मृत्यू झाल्याची पुष्टी यूएईच्या संरक्षण मंत्रालयाने केली आहे.
दुबईतील पाम जुमेराह परिसरातही एका घटनेची नोंद झाली असून त्यात 4 जण जखमी झाले आहेत. प्रत्यक्षदर्शींनी दिलेल्या माहितीनुसार, आकाशात आगीचे गोळे दिसले आणि मोठ्या स्फोटांच्या आवाजाने खिडक्यांना तडे गेले.
बुर्ज खलिफा का रिकामा केला?
828 मीटर उंच असलेल्या बुर्ज खलिफामध्ये हजारो रहिवासी, कार्यालये आणि पर्यटक असतात. आकाशात क्षेपणास्त्रे पाडण्याचे काम (इंटरसेप्शन) सुरू असताना, त्या क्षेपणास्त्रांचे अवशेष इमारतीवर पडण्याची शक्यता लक्षात घेऊन प्रशासनाने तातडीने ही इमारत रिकामी करण्याचा निर्णय घेतला. कोणत्याही प्रकारची जीवितहानी टाळण्यासाठी ही खबरदारी घेण्यात आली आहे.
प्रादेशिक हवाई क्षेत्र बंद
इराण आणि अमेरिका-इस्रायलमधील या संघर्षामुळे केवळ दुबईच नव्हे, तर कतार, बहरीन आणि कुवेतनेही आपले हवाई क्षेत्र बंद केले आहे. यामुळे जागतिक विमान वाहतुकीवर मोठा परिणाम झाला आहे. बहरीनमधील अमेरिकेच्या पाचव्या नौदलाच्या तळालाही लक्ष्य करण्याचा प्रयत्न झाल्याचे वृत्त आहे, तर कतारने आपल्या हद्दीत येणारी क्षेपणास्त्रे पाडल्याचा दावा केला आहे.
युद्धाची पार्श्वभूमी
अमेरिकेने इराणवर ‘ऑपरेशन एपिक फ्युरी’ अंतर्गत केलेल्या हल्ल्यात इराणच्या रिव्होल्युशनरी गार्ड्सचे कमांडर मोहम्मद पाकपूर मारले गेल्याचा दावा इस्रायलने केला आहे. याचाच बदला घेण्यासाठी इराणने आता आखाती देशांमधील अमेरिकन तळांवर क्षेपणास्त्रांचा पाऊस पाडण्यास सुरुवात केली आहे. सौदी अरब, कतार आणि ओमानसारख्या देशांमध्येही धोक्याचे सायरन वाजत असून संपूर्ण पश्चिम आशिया युद्धाच्या उंबरठ्यावर उभा आहे.
प्रशासनाने नागरिकांना अफवांवर विश्वास न ठेवण्याचे आणि केवळ अधिकृत माहितीचे पालन करण्याचे आवाहन केले आहे.
