Kim Jong Un North Korea : इराण आणि इस्रायल-अमेरिका यांच्यातील संघर्ष आज १५ व्या दिवशीही कायम असताना, आता पूर्व आशियातून युद्धाचे नवे संकेत मिळत आहेत. उत्तर कोरियाचे हुकूमशहा किम जोंग उन यांनी या संघर्षात अनपेक्षित उडी घेण्याची शक्यता निर्माण झाली असून, शनिवारी उत्तर कोरियाने आपल्या पूर्व किनारपट्टीवरून तब्बल १० बॅलेस्टिक क्षेपणास्त्रांचा मारा करून जगाला धक्का दिला आहे.
उत्तर कोरियाचे सामरिक शक्तीप्रदर्शन
दक्षिण कोरिया आणि जपानच्या संरक्षण मंत्रालयांनी उत्तर कोरियाच्या या क्षेपणास्त्र चाचणीला दुजोरा दिला आहे. दक्षिण कोरियामध्ये सध्या ‘फ्रीडम शिल्ड’ या नावाखाली वार्षिक लष्करी कवायती सुरू आहेत. उत्तर कोरिया या कवायतींना आपल्या सुरक्षेसाठी धोका मानतो. याच पार्श्वभूमीवर किम जोंग उन यांनी केलेल्या या क्षेपणास्त्र माऱ्यामुळे शांतता धोक्यात आली आहे. जरी ही क्षेपणास्त्रे जपानच्या समुद्रक्षेत्रात पडली असली, तरी एकाच वेळी दहा क्षेपणास्त्रे डागणे हे केवळ चाचणी नसून एक प्रकारचे ‘युद्धजन्य संकेत’ असल्याचे मानले जात आहे.
इराणच्या समर्थनार्थ उत्तर कोरियाची भूमिका
उत्तर कोरियाने अमेरिकेने इराणवर केलेल्या हल्ल्याचा तीव्र शब्दांत निषेध केला आहे. अमेरिकेचे पाऊल अत्यंत ‘बेशरमपणाचे’ आणि आंतरराष्ट्रीय नियमांचे उल्लंघन करणारे असल्याचे उत्तर कोरियाने म्हटले आहे. अणवस्त्र सज्ज असलेला उत्तर कोरिया जर या युद्धात इराणच्या बाजूने सक्रिय झाला, तर तिसऱ्या महायुद्धाची ठिणगी पडण्याची दाट शक्यता तज्ज्ञांनी व्यक्त केली आहे.
अमेरिकेची मोठी लष्करी कारवाई: ‘मरिन कमांडो’ रवाना
दुसरीकडे, अमेरिकन राष्ट्राध्यक्ष डोनाल्ड ट्रम्प यांनी इराणविरोधात आक्रमक पवित्रा घेतला आहे. इराणने युद्धातून माघार घेण्यास नकार दिल्याने अमेरिकेने आता थेट लष्करी हस्तक्षेपाची तयारी सुरू केली आहे. ताज्या माहितीनुसार, अमेरिकेचे २,५०० मरिन कमांडो आणि एक प्रगत एम्फिबियस असॉल्ट शिप पश्चिम आशियाच्या दिशेने रवाना झाली आहे. ही हालचाल इराणमध्ये एखादी मोठी भूतल कारवाई (Ground Operation) करण्याचे संकेत देणारी आहे.
जागतिक अर्थव्यवस्थेवर संकटाची छाया
गेल्या १५ दिवसांपासून सुरू असलेल्या या तणावाचा जागतिक अर्थव्यवस्थेला मोठा तडाखा बसला आहे. खनिज तेलाच्या किमती गगनाला भिडल्या असून, पुरवठा साखळी विस्कळीत झाली आहे. जर हा संघर्ष अमेरिका-इराणपुरता मर्यादित न राहता उत्तर कोरियासारख्या देशांच्या सहभागामुळे अधिक व्यापक झाला, तर जागतिक मंदी आणि ऊर्जेचा महाभयंकर तुटवडा निर्माण होण्याची भीती व्यक्त केली जात आहे.
