Vaishnavi Hagwane Suicide Case | पुण्यात वैष्णवी हगवणे (Vaishnavi Hagwane Suicide Case) या तरूणीने सासरच्या छळाला कंटाळून आत्महत्या केल्याची धक्कादायक घटना समोर आली होती. या प्रकरणात आता सर्व आरोपींना अटक करण्यात आली असून, त्यांची चौकशी सुरू आहे. उपमुख्यमंत्री अजित पवार (Ajit Pawar) यांनी कस्पटे कुटुंबीयांची भेट घेऊन त्यांचे सांत्वन केले आणि परिस्थिती जाणून घेतली.
कस्पटे कुटुंबीयांशी अर्धा तास चर्चा केल्यानंतर अजित पवारांनी माध्यमांशी संवाद साधला. वैष्णवीच्या प्रकरणाची जलदगती न्यायालयात सुनावणी केली जावी, अशी मागणी मुख्यमंत्री देवेंद्र फडणवीस (Devendra Fadnavis) यांच्याकडे करणार असल्याचे त्यांनी सांगितले. या प्रकरणातील आरोपींना कठोर शिक्षा होण्यासाठी लक्ष घालणार असल्याचेही ते म्हणाले.
अजित पवार म्हणाले, “वैष्णवीच्या मृत्यूची घटना घडल्यानंतर मी पिंपरी-चिंचवडचे पोलीस आयुक्तांशी चर्चा करून जे घडले ते योग्य नाही, असे म्हटले होते. कुणाचीही हयगय न करता, कुणाचाही राजकीय हस्तक्षेप आला तरी न जुमानता कारवाई करण्यास सांगितले होते. वैष्णवीला ज्यापद्धतीने छळले, यात कुणी आरोपी असतील त्यांना पकडले गेले पाहिजे, असे निर्देश दिले होते. पोलिसांनी वैष्णवीची सासू, नणंद आणि पतीला अटक केली. तसेच सासरे राजेंद्र हगवणे (Rajendra Hagwane) आणि दीर सुशील हगवणे फरार होते, पण त्यांनाही अटक करण्यात आली आहे.”
अजित पवार पुढे म्हणाले की, कस्पटे कुटुंबियांना न्याय मिळायला हवा, असा आमचा प्रयत्न राहणार आहे. न्यायालयातही खटला ताकदीने चालावा यासाठी चांगला सरकारी वकील देण्याची आमची तयारी आहे. कस्पटे कुटुंबियांकडूनही काही नावे सुचविण्यास सांगितले आहे.
जलदगती न्यायालयात खटला चालवण्याची मागणी:
हे प्रकरण जलदगती न्यायालयात चालविण्याचा आमचा प्रयत्न आहे, असे सांगताना अजित पवार म्हणाले की, मुख्यमंत्री देवेंद्र फडणवीस आणि मी उद्या दिल्लीला जाणार आहोत. सदर प्रकरण जलदगती न्यायालयात चालवले जावे, अशी मागणी त्यांच्याकडे करणार आहे. असेही उपमुख्यमंत्री अजित पवार म्हणाले.
आणखी एका आरोपीचा समावेश:
वैष्णवी हगवणे मृत्यू प्रकरणात हगवणे कुटुंबातील सदस्यांना अटक करण्यात आली आहे. या प्रकरणात आता आणखी एका व्यक्तीचा आरोपी म्हणून समावेश झाला आहे. वैष्णवी हगवणे यांच्या मुलाचा ताबा घेण्यासाठी आलेल्या कस्पटे कुटुंबीयांना धमकावल्याप्रकरणी कर्वेनगर येथील नीलेश चव्हाण याच्याविरुद्ध वारजे पोलीस ठाण्यात गुन्हा दाखल करण्यात आला आहे. चव्हाणने कस्पटे कुटुंबीयांना पिस्तूल दाखवले होते.
अजित पवार यांनी कस्पटे कुटुंबियांशी संवाद साधल्यानंतर माध्यमांना याची माहिती दिली. ते म्हणाले, “या प्रकरणात निलेश चव्हाण नावाची व्यक्ती पुढे आली आहे. वैष्णवीचे बाळ ज्या पद्धतीने हाताळले ते रेकॉर्डवर आलेले आहे. त्या व्यक्तीविरोधातही तक्रार दाखल झाली असून त्याचाही शोध सुरू आहे. आज जर तो सापडला नाही तर पोलीस आयुक्त पुढील कारवाई करतील.” निलेश चव्हाणनेही त्याच्या पत्नीचा छळ केल्याचे समोर आले आहे. त्याच्याविरोधात अनेक गुन्हे दाखल आहेत.
