Panvel Mahaplika Election : राज्यातील अनेक महापालिका निवडणुकीत भाजपचे (BJP) बिनविरोध उमेदवार विजयी झाले आहेत. कल्याण-डोंबिवलीतून यश मिळाल्यानंतर आता ठाणे, भिवंडी, अहिल्यानगर आणि पनवेल महापालिकेतही मोठ्या संख्येने भाजपच्या उमेदवारांना बिनविरोध नगरसेवकपदी निवडून येण्याची संधी मिळाली आहे.
पनवेल महानगरपालिकेत महाविकास आघाडीला मोठा धक्का बसला असून, महापालिका निवडणुकीसाठी अर्ज माघारी घेण्याच्या शेवटच्या दिवशी ७ उमेदवारांनी आपला अर्ज मागे घेतला. यामुळे भाजपचे एकूण ८ उमेदवार बिनविरोध निवडून आले आहेत.
यामध्ये सर्वप्रथम प्रभाग क्रमांक १८ (ब) मधून नितीन पाटील बिनविरोध नगरसेवकपदी निवडले गेले आहेत. या प्रभागातील शेतकरी कामगार पक्षाच्या उमेदवाराचा छाननी प्रक्रियेत अर्ज रद्द झाल्याने पाटील यांचा विजयी मार्ग सुकर झाला.
यानंतर, आज अर्ज माघारी घेण्याच्या अंतिम दिवशी ७ उमेदवारांनी आपले अर्ज मागे घेतल्यामुळे महायुतीचे ८ नगरसेवक बिनविरोध निवडून आले आहेत. यामुळे पनवेल महापालिकेत भाजपच्या विजयाचा मार्ग आधीच सुकर झाला असून, फक्त औपचारिक घोषणा बाकी आहे.
पनवेलमधील या प्रक्रियेत शिवसेना ठाकरे गट, शेतकरी कामगार पक्ष आणि काँग्रेस पक्षाच्या उमेदवारांनी आपले अर्ज मागे घेतल्याने महाविकास आघाडीच्या योजनांवर मोठा फटका बसला आहे.
बिनविरोध निवडून आलेल्या उमेदवारांची नावे पुढील प्रमाणे –
१) नितीन पाटील
२) रुचिता लोंढे
३) अजय बहिरा
४) दर्शना भोईर
५) प्रियंका कांडपिळे
६) ममता प्रितम म्हात्रे
७) स्नेहल ढमाले
पनवेल महानगरपालिकेवर सन २०१७ मध्ये भारतीय जनता पक्षाने एकहाती सत्ता स्थापन केली होती. त्या निवडणुकीत एकूण ७८ नगरसेवकांपैकी तब्बल ५१ नगरसेवक भाजपकडून निवडून आले होते. या स्पष्ट बहुमताच्या जोरावर पनवेल महापालिकेची सूत्रे भाजपकडे आली होती आणि त्यानंतर सलगपणे पक्षाने महापालिकेचे नेतृत्व केले.
यंदाच्या महापालिका निवडणुकीत भाजप आणि शिवसेना (शिंदे गट) यांची युती झाल्याने राजकीय समीकरणे बदललेली दिसत आहेत. मागील निवडणुकीत पनवेल महापालिकेत शिवसेनेला खातेही उघडता आले नव्हते. मात्र, यावेळी युतीच्या माध्यमातून दोन्ही पक्ष एकत्रितपणे निवडणूक रिंगणात उतरले असून, सत्तेचा दावा अधिक भक्कम झाल्याचे चित्र आहे.
भाजप आमदार प्रशांत ठाकूर यांनी या संदर्भात प्रतिक्रिया देताना सांगितले की, महापालिकेतील गेल्या कार्यकाळात करण्यात आलेल्या विकासकामांच्या जोरावरच भाजप-शिवसेना युती ही निवडणूक लढवणार आहे. पनवेल महापालिकेत पुन्हा एकदा भाजपचाच महापौर विराजमान होईल, असा ठाम विश्वास त्यांनी व्यक्त केला आहे.
पनवेल महानगरपालिका क्षेत्रात शहरी भागासह ग्रामीण आणि सिडको अंतर्गत येणाऱ्या परिसरांचा समावेश आहे. या भागात पाणीपुरवठा, गटार व्यवस्था, सार्वजनिक वाहतूक यांसारख्या मूलभूत नागरी समस्या मोठ्या प्रमाणावर नागरिकांना भेडसावत आहेत. आगामी निवडणुकीत या प्रश्नांवर उपाययोजना करणे आणि विकासकामांना गती देणे हेच युतीचे प्रमुख उद्दिष्ट असल्याचे भाजपकडून सांगण्यात येत आहे.
Mahayuti Panvel : महायुतीचे जागावाटप पुढील प्रमाणे
एकूण जागा – ७८
भारतीय जनता पार्टी – ७१
शिवसेना शिंदे गट – ०४
राष्ट्रवादी अजित पवार गट – ०२
आरपीआय आठवले गट – ०१
Mahavikas Aghadi Panvel : महाविकास आघाडीचे जागावाटप पुढील प्रमाणे
एकूण जागा – ७८
शेतकरी कामगार पक्ष – ३३
शिवसेना ठाकरे – १९
राष्ट्रवादी शरद पवार गट – ०७
मनसे – ०२
काँग्रेस – १२
समाजवादी पार्टी – ०१
वंचित बहुजन आघाडी – ०१
इतर – ०३
२०१७ चे पक्षीय बलाबल-७८ नगरसेवक (Party Wise Corporator Panvel 2016)
भाजप – ५१
शेकाप – २३
काँग्रेस – ०२
राष्ट्रवादी – ०२
पनवेलच्या राजकारणाची सूत्रे गेल्या अनेक दशकांपासून एका विशिष्ट केंद्राभोवती फिरताना दिसतात आणि ते केंद्र म्हणजे माजी खासदार रामशेठ ठाकूर यांचे राजकीय नेतृत्व. पनवेलच्या स्थानिक राजकारणात ठाकूर कुटुंबीयांची भूमिका निर्णायक राहिली असून, त्यांनी ज्या पक्षाचे नेतृत्व स्वीकारले, त्या पक्षालाच पनवेल महापालिकेची सत्ता लाभल्याचे इतिहासात सातत्याने दिसून आले आहे.
रामशेठ ठाकूर आणि त्यांच्या कुटुंबीयांचा राजकीय प्रवास पाहिला असता, ते शेतकरी कामगार पक्षात असताना पनवेल महापालिकेवर शेकापची सत्ता प्रस्थापित झाली होती. त्यानंतर ठाकूर कुटुंबीय काँग्रेसमध्ये सहभागी झाल्यानंतर पनवेलमध्ये काँग्रेसला सत्तेची संधी मिळाली. पुढे भाजपमध्ये प्रवेश झाल्यानंतर पनवेल महापालिकेवर भाजपची एकहाती सत्ता आली. त्यामुळे पनवेलच्या राजकारणात पक्षांपेक्षा नेतृत्व महत्त्वाचे ठरते, हे वास्तव पुन्हा पुन्हा अधोरेखित झाले आहे.
सद्यस्थितीत आमदार प्रशांत ठाकूर यांनी शेतकरी कामगार पक्षात मोठी फूट पाडल्याचे चित्र आहे. या फाटाफुटीनंतर शेकापकडे अवघे पाच नगरसेवक शिल्लक राहिले असून, त्यामुळे हा पक्ष प्रभावी विरोधी पक्ष म्हणून उभा राहण्यात अपयशी ठरत असल्याचे राजकीय विश्लेषकांचे मत आहे.
पनवेल महापालिकेच्या आगामी निवडणुकीच्या पार्श्वभूमीवर सशक्त आणि संघटित विरोधक नसल्यामुळे भाजपचा सत्तेचा मार्ग पुन्हा एकदा सुकर झाल्याचे चित्र दिसत आहे. विद्यमान राजकीय समीकरणे, पक्षांतील फूट आणि नेतृत्वाची एकत्रित ताकद लक्षात घेता, आगामी काळात पनवेल महापालिकेवर भाजपची सत्ता पुन्हा प्रस्थापित होण्याची शक्यता अधिक असल्याचे मत जाणकारांकडून व्यक्त केले जात आहे.
