Ajit Pawar : महाराष्ट्राच्या सार्वजनिक जीवनात झंझावाती कार्य करणाऱ्या नेत्यांना नियतीने अपघाताच्या रूपाने हिरावून घेण्याचे सत्र पुन्हा एकदा सुरू झाले आहे. राज्याचे उपमुख्यमंत्री अजित पवार यांचे आज सकाळी ८ वाजून ४६ मिनिटांनी बारामती विमानतळाजवळ झालेल्या भीषण विमान अपघातात निधन झाले. या घटनेमुळे संपूर्ण राज्य सुन्न झाले असून, महाराष्ट्राने एक प्रशासकीय शिस्त असलेला लोकनेता गमावला आहे. अजितदादांच्या या चटका लावून जाणाऱ्या एक्झिटमुळे दिवंगत नेते गोपीनाथ मुंडे आणि विनायक मेटे यांच्या अपघाती निधनाच्या जखमा पुन्हा एकदा ओल्या झाल्या आहेत.
कसा घडला अजित पवारांच्या विमानाचा अपघात?
मुंबईतील आपले प्रशासकीय कामकाज आटोपून अजित पवार आज जिल्हा परिषद निवडणुकीच्या प्रचारार्थ बारामतीकडे निघाले होते. बारामतीमध्ये त्यांच्या तीन महत्त्वपूर्ण जाहीर सभांचे आयोजन करण्यात आले होते. मात्र, बारामती विमानतळाच्या परिसरात दृश्यमानता (Visibility) अत्यंत कमी असल्याने लँडिंगचा पहिला प्रयत्न अयशस्वी ठरला. त्यानंतर वैमानिकाने मोठा वळसा घालून पुन्हा एकदा विमान धावपट्टीवर उतरवण्याचा प्रयत्न केला, परंतु दुसऱ्या प्रयत्नातही यश आले नाही. सकाळी ८ वाजून ४६ मिनिटांच्या सुमारास विमानाचा भीषण स्फोट झाला आणि महाराष्ट्राच्या राजकारणातील एक देदीप्यमान अध्याय कायमचा संपला. सहा वेळा उपमुख्यमंत्रिपद आणि राज्याचे वित्तमंत्री म्हणून त्यांनी महाराष्ट्राच्या तिजोरीला लावलेली आर्थिक शिस्त ही राज्याच्या इतिहासात सदैव स्मरणात राहील.
गोपीनाथ मुंडे आणि विनायक मेटे-
अपघातांनी पोखरलेले नेतृत्व महाराष्ट्राच्या राजकारणात यापूर्वीही अशाच प्रकारे दोन मोठ्या नेत्यांना आपण अपघातात गमावले आहे. ३ जून २०१४ रोजी लोकनेते गोपीनाथ मुंडे यांचे दिल्लीत कार अपघातात निधन झाले होते. केंद्रात मंत्रिपद मिळाल्यानंतर ते आपल्या बीड जिल्ह्याकडे येत असतानाच हा भीषण अपघात घडला होता. त्यानंतर, १४ ऑगस्ट २०२२ रोजी शिवसंग्राम संघटनेचे अध्यक्ष विनायक मेटे यांचा मुंबई-पुणे एक्स्प्रेस वेवर कार अपघातात मृत्यू झाला. मराठा आरक्षणासारख्या संवेदनशील विषयावरील बैठकीसाठी ते मुंबईकडे निघाले असतानाच त्यांच्यावर काळाने झडप घातली होती. मुंडे आणि मेटे यांच्यानंतर आता अजित पवार यांच्या रूपाने तिसऱ्या मोठ्या नेतृत्वाचा अपघाती अंत झाल्याने राज्यावर दुःखाचा डोंगर कोसळला आहे.
एक समर्पित राजकीय प्रवास अजित पवार यांचा राजकीय प्रवास लोकसभेच्या खासदारकीपासून सुरू झाला होता, मात्र त्यानंतर त्यांनी राज्याच्या राजकारणात स्वतःला झोकून दिले. प्रशासनावरील पकड, पहाटेपासून कामाला लागण्याची शिस्त आणि स्पष्टवक्तेपणा ही त्यांची वैशिष्ट्ये होती. शेवटच्या क्षणापर्यंत ते आपल्या मतदारसंघासाठी आणि राज्यासाठी कार्यरत होते. उद्या सकाळी ११ वाजता बारामती येथे त्यांच्या पार्थिवावर अंत्यसंस्कार केले जाणार असून, एका धडाडीच्या पर्वाचा असा अंत झाल्याने केवळ पवार कुटुंबच नव्हे, तर अवघा महाराष्ट्र पोरका झाला आहे.
