Sindhudurg ZP Election Result 2026 : कोकणच्या राजकीय पटलावर अत्यंत प्रतिष्ठेच्या मानल्या जाणाऱ्या सिंधुदुर्ग जिल्हा परिषद आणि पंचायत समितीच्या सार्वत्रिक निवडणुकीचा आज, सोमवार, ९ फेब्रुवारी २०२६ रोजी निकाल जाहीर होत आहे. जिल्ह्याच्या ग्रामीण भागातील सत्तेची चावी कोणाच्या हातात जाणार, याचा फैसला आज दुपारी स्पष्ट होणार असून संपूर्ण जिल्ह्याचे लक्ष या निकालाकडे वेधले गेले आहे. जिल्हा परिषदेच्या एकूण ५० जागा आणि पंचायत समितीच्या १०० जागांसाठी पार पडलेल्या या लोकशाहीच्या उत्सवात जिल्ह्यातील मतदारांनी उत्साहाने सहभाग नोंदवला.
शनिवारी पार पडलेल्या मतदानामध्ये जिल्ह्याचा सरासरी मतदानाचा टक्का ६१.९८ इतका राहिला आहे. सकाळच्या सत्रात मतदानाचा वेग काहीसा संथ असला, तरी दुपारनंतर ग्रामीण भागातील मतदारांनी केंद्रांवर मोठ्या रांगा लावल्याचे चित्र पाहायला मिळाले. विशेषतः दुर्गम भागातील मतदारांच्या सक्रिय सहभागामुळे मतदानाच्या टक्केवारीत झालेली वाढ ही अनेक उमेदवारांच्या काळजाची धकधक वाढवणारी ठरली आहे. ईव्हीएम (EVM) मशिनमध्ये बंद झालेले सर्व उमेदवारांचे राजकीय भवितव्य आज मतमोजणीच्या माध्यमातून लोकांसमोर येईल.
प्रशासकीय नियोजनानुसार, जिल्ह्यातील ८ तालुक्यांच्या मुख्यालयांमध्ये आज सकाळी १०:०० वाजता एकाच वेळी मतमोजणी प्रक्रियेला प्रारंभ झाला आहे. ही प्रक्रिया पारदर्शक आणि वेगवान व्हावी, यासाठी निवडणूक आयोगाने चोख व्यवस्था केली आहे. प्रत्येक पंचायत समिती गणाच्या मतमोजणीसाठी १० ते १४ टेबलांची व्यवस्था करण्यात आली असून, प्रत्येक फेरीत होणाऱ्या मतगणनेनंतर विजयी उमेदवारांची नावे अधिकृतपणे घोषित केली जाणार आहेत. या प्रक्रियेसाठी मोठ्या प्रमाणावर पोलीस बंदोबस्त तैनात करण्यात आला असून, मतमोजणी केंद्रांच्या परिसरात समर्थकांची मोठी गर्दी पाहायला मिळत आहे.
जिल्ह्यातील राजकीय समीकरणे पाहता, या निकालाचा परिणाम आगामी काळातील राज्याच्या राजकारणावरही होणार आहे. स्थानिक पातळीवरील वर्चस्व टिकवण्यासाठी प्रमुख राजकीय पक्षांनी आपली सर्व शक्ती पणाला लावली होती. आता मतमोजणीच्या प्रत्येक फेरीगणिक बदलणारी आकडेवारी कोणाचे नशीब उघडणार आणि कोणाला सत्तेपासून दूर ठेवणार, याची उत्सुकता शिगेला पोहोचली आहे.
सिंधुदुर्गात तालुकानिहाय मतदानाचा आढावा
सावंतवाडी: ६९.५४%
वेंगुर्ला: ६९.०३ %
कुडाळ: ६०.०८ %
दोडामार्ग: ५९.८३ %
कणकवली: ५९.८१ %
मालवण: ५८.९० %
देवगड: ५७.१२ %
वैभववाडी: ५४.७९%
एकूण मतदानाचा तपशील पुढील प्रमाणे-
एकूण मतदार: ५६१,१०५
मतदान झाले: ३४७,७४९
पुरुष मतदार: १८०,३२७
महिला मतदार: १६७,४२२
सिंधुदुर्ग निवडणूक निकाल: महायुतीची ‘बिनविरोध’ सलामी; उर्वरित ४२ जिल्हा परिषद जागांसाठी चुरस
जिल्हा परिषद आणि पंचायत समितीच्या सार्वत्रिक निवडणुकीच्या निकालांचे बिगुल वाजले असून, मतमोजणीला प्रारंभ होताच राजकीय वातावरण तापू लागले आहे. प्रत्यक्ष मतमोजणीपूर्वीच सिंधुदुर्ग जिल्ह्यात महायुतीने (भारतीय जनता पक्ष आणि शिवसेना शिंदे गट) आपले वर्चस्व प्रस्थापित केले आहे. जिल्ह्यातील एकूण जागांपैकी जिल्हा परिषदेच्या ८ आणि पंचायत समितीच्या १७ जागा आधीच बिनविरोध झाल्या असून, या सर्व २५ जागांवर महायुतीच्या उमेदवारांनी विजयश्री खेचून आणली आहे. यामुळे विजयाची ही पहिली माळ महायुतीच्या गळ्यात पडली असून विरोधकांसमोर सुरुवातीलाच मोठे आव्हान उभे राहिले आहे.
जिल्हा परिषदेच्या एकूण ५० जागांपैकी ८ जागा बिनविरोध झाल्यामुळे, आता उर्वरित ४२ जागांसाठी अत्यंत अटीतटीची लढत पाहायला मिळत आहे. या ४२ जागांसाठी एकूण ११५ उमेदवार आपले नशीब आजमावत आहेत. राजकीयदृष्ट्या संवेदनशील असलेल्या या मतदारसंघांमध्ये मतदारांनी दिलेला कौल कोणाच्या बाजूने झुकणार, यावर जिल्ह्यातील सत्तेचे समीकरण अवलंबून आहे. प्रस्थापित नेत्यांच्या प्रतिष्ठा पणाला लागल्यामुळे प्रत्येक फेरीगणिक उत्कंठा वाढत असून, ईव्हीएममधून बाहेर पडणारा कल उमेदवारांची धाकधूक वाढवणारा ठरत आहे.
दुसरीकडे, पंचायत समितीच्या १०० जागांपैकी १७ जागा बिनविरोध झाल्याने उर्वरित ८३ जागांवर मतमोजणीची प्रक्रिया पार पडत आहे. या ८३ जागांसाठी निवडणुकीच्या रिंगणात २४४ उमेदवार असून, त्यांमध्ये अपक्ष आणि स्थानिक आघाड्यांनीही मोठे आव्हान उभे केले आहे. ग्रामविकासाचा कणा मानल्या जाणाऱ्या पंचायत समितीवर आपले नियंत्रण मिळवण्यासाठी प्रमुख राजकीय पक्षांनी जोर लावला आहे. मतमोजणी केंद्रांवर प्रशासनाने चोख बंदोबस्त ठेवला असून, प्रत्येक गणाचे निकाल टप्प्याटप्प्याने जाहीर केले जात आहेत. दुपारपर्यंत जिल्ह्याचा संपूर्ण राजकीय नकाशा स्पष्ट होईल, अशी चिन्हे दिसत आहेत.
जिल्हा परिषद बिनविरोध विजयी उमेदवारांची यादी पुढील प्रमाणे-
१) खारेपाटण जिल्हा परिषद प्राची इस्वालकर (भाजप)
२) बांदा जिल्हा परिषद प्रमोद कामत (भाजप)
३) जाणवली जिल्हा परिषद रुहिता तांबे (शिंदे शिवसेना)
४) पडेल जिल्हा परिषद सुयोगी घाडी (भाजप)
५) बापर्डे जिल्हा परिषद अवनी तेली (भाजप)
६) पोंगुर्ले जिल्हा परिषद अनुराधा नारकर (भाजप)
७) किंजवडे जिल्हा परिषद सावी लोके (भाजप)
८) कोळपे जिल्हा परिषद प्रमोद रावराणे (भाजप)
Sindhudurg Panchayat Samiti Election Result 2026: पंचायत समिती विजयी उमेदवारांची यादी
कणकवली पंचायत समिती बिनविरोध उमेदवार पुढील प्रमाणे-
१)वरवडे पंचायत समिती सोनू सावंत (भाजपा)
२)नांदगाव पंचायत समिती हर्षदा वाळके (भाजप)
३) जाणवली पंचायत समिती महेश्वरी चव्हाण (भाजप)
४) बिडवाडी पंचायत समिती संजना राणे (भाजप)
५) हरकुळ बुद्रुक पंचायत समिती दिव्या पेडणेकर (भाजप)
६) नाटळ पंचायत समिती सायली कृपाळ (भाजप)
देवगड पंचायत समिती बिनविरोध उमेदवार पुढील प्रमाणे –
७)पडेल पंचायत समिती अंकुश ठूकरूल (भाजप)
८)नाडण पंचायत समिती गणेश राणे (भाजप)
९)बापर्डे पंचायत समिती संजना लाड (भाजप)
१०) फणसगाव पंचायत समिती समृद्धी चव्हाण (भाजप)
११) शिरगाव पंचायत समिती शितल तावडे (भाजप)
१२) कोटकामते पंचायत समिती ऋतुजा खाजनवाडकर (भाजप)
वैभववाडी पंचायत समिती बिनविरोध उमेदवार पुढील प्रमाणे –
१३) कोकिसरे पंचायत समिती सौ.साधना नकाशे (भाजप)
वेंगुर्ले पंचायत समिती बिनविरोध उमेदवार पुढील प्रमाणे –
१४) आसोली पंचायत समिती संकेत धुरी (भाजप)
मालवण पंचायत समिती बिनविरोध उमेदवार पुढील प्रमाणे –
१५) आडवली मालडी पंचायत समिती सीमा परुळेकर (भाजप)
सावंतवाडी पंचायत समिती बिनविरोध उमेदवार पुढील प्रमाणे –
१६) शेर्ले पंचायत समिती महेश धुरी (भाजप)
दोडामार्ग पंचायत समिती बिनविरोध उमेदवार पुढील प्रमाणे –
१७) कोलझर पंचायत समिती गणेशप्रसाद गवस (शिंदे शिवसेना)
18) राजेश जाधव – भाजप
19) कणकवलीमधील खारेपाटण पंचायत समिती : गुरुप्रसाद शिंदे (शिवसेना शिंदे गट)
20) सावंतवाडी माडखोल पंचायत समिती : प्रथमेश सावंत (अपक्ष)
