Marathi Sammelans for Youth and Women: मराठी भाषेला गेल्यावर्षी अभिजात दर्जा प्राप्त झाला. या पार्श्वभूमीवर आता राज्य सरकारने मराठी भाषेचा प्रसार आणि संवर्धन करण्यासाठी एक मोठी घोषणा केली आहे. राज्यातील मुले, तरुण आणि महिलांमध्ये मराठी भाषेविषयी आवड निर्माण व्हावी, यासाठी आता दरवर्षी विभागवार स्वतंत्र संमेलनांचे आयोजन केले जाणार आहे.
या महत्त्वाकांक्षी उपक्रमासाठी राज्य सरकारने प्रत्येक संमेलनाला प्रत्येकी 5 कोटी रुपये, असे एकूण 15 कोटी रुपयांचे अनुदान मंजूर केले आहे. ‘राज्य मराठी विकास संस्थेच्या’ माध्यमातून या सर्व सोहळ्यांचे नियोजन केले जाईल.
बाल संमेलन: खेळांतून भाषा शिक्षण
12 वर्षांखालील मुलांसाठी आयोजित केल्या जाणाऱ्या या संमेलनाचा मुख्य उद्देश मुलांना रंजक पद्धतीने मराठीची ओळख करून देणे हा आहे. यामध्ये शब्दांची कोडी, मजेशीर म्हणी, वाक्प्रचार आणि भाषिक खेळांचे आयोजन केले जाईल. बाल साहित्यिक आणि बालमानसशास्त्रज्ञांच्या मार्गदर्शनाखाली मुलांच्या भावविश्वाला साजेसे वातावरण या संमेलनात निर्माण केले जाणार आहे.
युवा संमेलन: मराठीतून रोजगाराच्या संधी
15 ते 30 वयोगटातील तरुणांसाठी हे संमेलन विशेष असणार आहे. केवळ साहित्यावर चर्चा न करता, मराठी भाषेच्या माध्यमातून करिअर आणि रोजगाराच्या कोणत्या नवीन संधी उपलब्ध आहेत, याची माहिती तरुणांना दिली जाईल. युवा शक्तीला योग्य दिशा मिळावी आणि मराठी भाषेचा वापर आधुनिक तंत्रज्ञानात कसा वाढवावा, यावर येथे भर दिला जाणार आहे.
महिला संमेलन: भाषा प्रसाराचे शक्तीपीठ
राज्यातील अर्ध्या लोकसंख्येचे प्रतिनिधित्व करणाऱ्या महिलांना मराठी भाषेच्या प्रचार-प्रसारात सहभागी करून घेण्यासाठी हे व्यासपीठ तयार करण्यात आले आहे. महिलांच्या सर्वांगीण विकासासाठी विविध क्षेत्रांतील संधींची माहिती येथे दिली जाईल. महिला शक्तीच्या माध्यमातून मराठी भाषा घराघरांत अधिक समृद्ध व्हावी, हा या आयोजनामागचा प्रमुख हेतू आहे.
राज्य सरकारने दोन वर्षांपूर्वी जाहीर केलेल्या मराठी भाषा धोरणाची ही पुढची पायरी मानली जात आहे. याव्यतिरिक्त, राज्यातील 36 जिल्ह्यांमध्ये स्थानिक साहित्य संमेलने आयोजित करण्यासाठी प्रत्येकी 5 लाख रुपयांचे अर्थसहाय्यही दिले जाणार आहे.
