Parth Pawar Rajya Sabha: महाराष्ट्राच्या राजकारणात सध्या एका नव्या चर्चेला उधाण आले आहे. माजी उपमुख्यमंत्री अजित पवार यांच्या दुःखद निधनानंतर त्यांच्या पत्नी सुनेत्रा पवार यांनी उपमुख्यमंत्रीपदाची धुरा सांभाळली आहे. सुनेत्रा पवार यांनी मंत्रिपदाची शपथ घेतल्यामुळे त्यांची राज्यसभेतील जागा आता रिक्त झाली असून, या जागेवर अजित पवारांचे पुत्र पार्थ पवार यांना पाठवण्याच्या हालचाली सुरू आहेत.
मुंबईत पार पडलेल्या राष्ट्रवादी काँग्रेसच्या कोअर कमिटीच्या बैठकीत पार्थ पवार यांच्या उमेदवारीवर शिक्कामोर्तब झाल्याचे बोलले जात आहे. मात्र, या संभाव्य निर्णयावर सामाजिक कार्यकर्त्या अंजली दमानिया यांनी संताप व्यक्त केला आहे.
अंजली दमानियांचे तीक्ष्ण सवाल
अंजली दमानिया यांनी सोशल मीडिया प्लॅटफॉर्म ‘X’ वर एक व्हिडिओ शेअर करत पार्थ पवार यांच्या पात्रतेवरच प्रश्नचिन्ह उभे केले आहे. “पार्थ पवार नेमके कोण आहेत? त्यांचे महाराष्ट्राच्या सामाजिक किंवा राजकीय जडणघडणीत काय योगदान आहे?” असा सवाल त्यांनी विचारला आहे.
केवळ ‘पवार’ हे आडनाव असल्याने एखाद्याला देशाच्या वरिष्ठ सभागृहात पाठवणे चुकीचे असल्याचे दमानिया यांनी म्हटले आहे.
गुणवत्ता की वारसाहक्क?
राज्यसभेची प्रतिष्ठा जपणे महत्त्वाचे असल्याचे सांगताना दमानिया म्हणाल्या की, “राज्यसभा हे अत्यंत गंभीर सभागृह आहे. तिथे जाणाऱ्या व्यक्तीकडे अनुभवाचा गाठा, कामाचा ठसा आणि जनसामान्यांची जाण असणे आवश्यक आहे. कोणत्याही आंदोलनात किंवा लोकहिताच्या कामात पार्थ पवार कधी दिसले आहेत का? महाराष्ट्राचे प्रतिनिधित्व हे गुणवत्तेवर आधारित असायला हवे, केवळ वारसाहक्कावर नाही.”
गंभीर आरोप आणि इशारा
दमानिया यांनी केवळ वारसाहक्कावरच टीका केली नाही, तर पार्थ पवार यांच्यावर गंभीर आरोपही केले आहेत. “ज्या व्यक्तीने शासकीय भूखंडाशी संबंधित व्यवहारात रस दाखवला आहे, अशा व्यक्तीला राज्यसभेवर पाठवणे हे महाराष्ट्राचे दुर्दैव असेल,” असेही त्या पुढे म्हणाल्या. राजकीय घराण्यातील वारसांना थेट मोठी पदे देण्याच्या पद्धतीवर जनतेने आता गांभीर्याने विचार करण्याची वेळ आली आहे, असा इशाराही त्यांनी दिला.
या टिकेनंतर राष्ट्रवादी काँग्रेसकडून कोणती प्रतिक्रिया येते आणि पार्थ पवार खरंच राज्यसभेवर जातात का, याकडे सर्वांचे लक्ष लागले आहे.
