Beed News : बीड जिल्ह्यातील मस्साजोग गावचे दिवंगत सरपंच संतोष देशमुख यांच्या हत्या प्रकरणाचे पडसाद दीड वर्षानंतरही स्थानिक राजकारणात उमटत असल्याचे पाहायला मिळत आहे. रविवारी बीड ग्रामीण पोलीस ठाण्याच्या परिसरात एका जुन्या वादातून तीव्र राजकीय संघर्ष आणि अभूतपूर्व ‘हाय व्होल्टेज ड्रामा’ रंगला. दिवंगत सरपंचांचे बंधू धनंजय देशमुख यांनी राज्याचे मंत्री धनंजय मुंडे यांनी आपल्यावर थेट दोन राऊंड गोळीबार केल्याचा खळबळजनक आरोप केल्याने संपूर्ण जिल्ह्यात एकच खळबळ उडाली आहे. या प्रकरणावरून पोलीस ठाण्याबाहेर अनेक तास तणावाचे वातावरण निर्माण झाले होते.
खिंडकर बंधूंमधील कौटुंबिक वादात देशमुखांची एन्ट्री
या संपूर्ण प्रकरणाची पाळेमुळे दिवंगत सरपंच संतोष देशमुख यांच्या हत्येनंतरच्या घडामोडींशी जोडलेली आहेत. सरपंचांच्या हत्येनंतर त्यांचे बंधू धनंजय देशमुख यांच्यासोबत न्याय मागण्यासाठी त्यांचे साडू दादा खिंडकर हे खंबीरपणे उभे राहिले होते. मात्र, यादरम्यान दादा खिंडकर यांनी काही तरुणांना केलेल्या मारहाणीची चित्रफीत (व्हिडिओ) समोर आल्यानंतर त्यांना कारागृहाची हवा खावी लागली होती. कारागृहातून जामिनावर सुटल्यानंतर दादा खिंडकर आणि त्यांचे सख्खे भाऊ समाधान खिंडकर यांच्यात कौटुंबिक आणि राजकीय कारणांवरून आरोप-प्रत्यारोपांच्या फैरी सुरू झाल्या. या वादात समाधान खिंडकर यांनी धनंजय देशमुख यांनाही लक्ष करण्यास सुरुवात केली. दादा खिंडकर यांनी समाधान विरुद्ध शिवाजीनगर पोलीस ठाण्यात घरात घुसून धमकावल्याची तक्रार दिली, जी समाधान यांनी फेटाळून लावली होती.
हॉटेलमधील वाद आणि पोलीस ठाण्यातील आक्रमक भूमिका
हा कौटुंबिक वाद अधिक चिघळला जेव्हा धनंजय देशमुख आणि समाधान खिंडकर यांचा एका हॉटेलमध्ये समोरासमोर सामना झाला. धनंजय देशमुख हे अंतरवाली सराटीहून परतत असताना आपल्या सहकाऱ्यांसह जेवणासाठी एका हॉटेलवर थांबले होते. योगायोगाने समाधान खिंडकर देखील तिथेच उपस्थित होते. या भेटीदरम्यान धनंजय देशमुख यांनी आपल्या अंगरक्षकाच्या पिस्तुलाचा (बंदुकीचा) धाक दाखवून आपल्याला जिवे मारण्याची धमकी दिली, अशी तक्रार समाधान यांनी ग्रामीण पोलीस ठाण्यात दाखल केली. या गुन्ह्याची माहिती मिळताच धनंजय देशमुख यांचा पारा चढला आणि त्यांनी थेट पोलीस ठाणे गाठून प्रशासनाला जाब विचारला. माध्यमांसमोर येत त्यांनी थेट मंत्री धनंजय मुंडे यांचे नाव घेतले आणि मुंडेंनी आपल्यावर दोन राऊंड फायर केले असा गंभीर आरोप करत पोलीस ठाण्यातच ठिय्या मांडला.
तब्बल ५ तास चौकशी; पोलिसांनी दोन्ही तक्रारी फेटाळल्या
परिस्थितीचे गांभीर्य ओळखून वरिष्ठ पोलीस उपअधीक्षक व्यंकटराम यांनी तात्काळ घटनास्थळी धाव घेतली. तब्बल पाच तास पोलीस ठाण्यात थांबून त्यांनी दोन्ही बाजूंच्या तक्रारींची आणि घटनाक्रमाची सखोल चौकशी केली. अखेर, पोलीस प्रशासनाने एक अधिकृत प्रसिद्धीपत्रक (प्रेस नोट) जारी करून या प्रकरणावर पडदा टाकण्याचा प्रयत्न केला. दोन्ही बाजूंकडून करण्यात आलेले दावे परस्परविरोधी आणि कोणत्याही ठोस पुराव्याविना असल्याचे तपासात निष्पन्न झाले. या तक्रारींमध्ये कोणतेही तथ्य आढळून न आल्याने पोलिसांनी दोन्ही गुन्हे खोटे असल्याचे स्पष्ट केले असून, या संदर्भातील सविस्तर अहवाल न्यायालयात सादर केला जाणार आहे.
धनंजय मुंडेंची बदनामी; समर्थकांचे पोलीस प्रशासनाला २४ तासांचे आव्हान
पोलिसांनी तक्रार खोट्या ठरवल्या असल्या, तरी या राजकीय चिखलफेकीमुळे बीडचे मातब्बर नेते धनंजय मुंडे यांची नाहक बदनामी झाल्याचा संताप त्यांच्या समर्थकांमध्ये आहे. मुंडे समर्थक भागवत तावरे यांच्या नेतृत्वाखाली कार्यकर्त्यांनी थेट पोलीस अधीक्षक कार्यालय गाठून वरिष्ठ अधिकाऱ्यांना निवेदन सादर केले. धनंजय देशमुख यांनी केलेले आरोप अत्यंत हास्यास्पद असून, आमच्या नेत्याची जाणीवपूर्वक बदनामी करणाऱ्यांवर कारवाई व्हावी आणि पोलीस विभागाने पुढील २४ तासांत या संपूर्ण प्रकरणाचा जाहीर खुलासा करावा, अशी मागणी मुंडे समर्थकांनी केली आहे.
