Virat Kohli-Rohit Sharma : भारतीय क्रिकेट क्षेत्रातील दोन देदिप्यमान तारे, विराट कोहली आणि रोहित शर्मा यांच्या कसोटी क्रिकेटमधील निवृत्तीवरून सध्या समाजमाध्यमांवर उलटसुलट चर्चांना ऊत आला आहे. गेल्या वर्षी मे २०२५ मध्ये या दोन्ही दिग्गज खेळाडूंनी कसोटी क्रिकेटला रामराम ठोकल्याने क्रीडाविश्व सुन्न झाले होते. रोहित शर्माने ७ मे २०२५ रोजी, तर विराट कोहलीने १२ मे २०२५ रोजी क्रिकेटच्या या प्रदीर्घ स्वरूपातील आपली कारकीर्द संपुष्टात आणली होती. सध्या हे दोन्ही खेळाडू ‘आयपीएल २०२६’ मध्ये आपल्या फलंदाजीची जादू दाखवत असून, त्यांच्या बहारदार कामगिरीमुळे त्यांनी कसोटीत पुनरागमन करावे, अशी मागणी चाहत्यांकडून होत आहे. तथापि, त्यांच्या ‘यू-टर्न’ घेण्याबाबतचे सर्व दावे सध्या निराधार असल्याचे स्पष्ट झाले आहे.
आयपीएलच्या चालू हंगामात या दोन्ही खेळाडूंनी आपल्या बॅटचा तडाखा कायम ठेवला आहे. स्पर्धेच्या प्रारंभीच विराट कोहलीने ६९ धावांची नाबाद खेळी साकारत रॉयल चॅलेंजर्स बेंगळुरू (RCB) ला दणदणीत विजय मिळवून दिला. दुसरीकडे, ‘हिटमॅन’ रोहित शर्माने कोलकाता नाईट रायडर्सविरुद्ध ७८ धावांची वादळी खेळी करत मुंबई इंडियन्सच्या विजयात मोलाचा वाटा उचलला. या खेळीनंतर सोशल मीडिया प्लॅटफॉर्म ‘X’ (ट्विटर) वर अशा पोस्ट व्हायरल झाल्या की, भारतीय क्रिकेट नियामक मंडळाने (BCCI) या दोघांच्या पुनरागमनावर अधिकृत मोहोर उमटवली आहे. काही वापरकर्त्यांनी तर कोहलीने स्वतः आपली निवृत्ती मागे घेतल्याचे खोटे दावेही केले. मात्र, बीसीसीआय किंवा संबंधित खेळाडूंकडून असे कोणतेही अधिकृत निवेदन प्रसिद्ध करण्यात आलेले नाही, त्यामुळे चाहत्यांनी अशा दिशाभूल करणाऱ्या बातम्यांवर विश्वास ठेवू नये, असे आवाहन करण्यात येत आहे.
वास्तविक पाहता, विराट आणि रोहित यांनी कसोटी आणि टी-२० आंतरराष्ट्रीय क्रिकेटमधून निवृत्ती स्वीकारल्यानंतर आता ते केवळ एकदिवसीय (ODI) स्वरूपाच्या सामन्यांसाठी भारतीय संघात उपलब्ध आहेत. १८ जानेवारी २०२६ रोजी इंदूर येथे न्यूझीलंडविरुद्ध त्यांनी आपला शेवटचा एकदिवसीय सामना खेळला होता. आगामी काळात होणाऱ्या महत्त्वाच्या एकदिवसीय मालिका आणि आयसीसी स्पर्धांमध्ये हे दोन्ही फलंदाज भारतीय जर्सीमध्ये दिसणार आहेत. कसोटी क्रिकेटला पूर्णविराम देण्याचा त्यांचा निर्णय आजही कायम असून, सध्या त्यांचे पूर्ण लक्ष मर्यादित षटकांच्या क्रिकेटवर आणि आयपीएलमधील कामगिरीवर केंद्रित आहे.
