Mohammed Shami : भारतीय क्रिकेट संघाचा अनुभवी आणि धारदार वेगवान गोलंदाज मोहम्मद शमी याने गेल्या काही दिवसांपासून सुरू असलेल्या आपल्या निवृत्तीच्या चर्चांना पूर्णविराम दिला आहे. ३५ वर्षीय शमीने अत्यंत स्पष्ट शब्दांत आपली भूमिका मांडताना सांगितले की, जोपर्यंत त्याला स्वतःला या खेळाचा कंटाळा येत नाही किंवा थकवा जाणवत नाही, तोपर्यंत तो क्रिकेटला अलविदा करणार नाही. एका ताज्या पॉडकास्टमध्ये शमीने आपले मनोगत व्यक्त करताना म्हटले, “जेव्हा मला खरोखर थकल्यासारखे वाटेल, तेव्हा निवृत्तीचा निर्णय मी स्वतः घेईन. सध्या तरी माझ्या मनात निवृत्तीचा विचारही शिवलेला नाही, कारण अशा विचारांमुळे खेळाडू मानसिकदृष्ट्या कमकुवत होतो.” विशेष म्हणजे, राष्ट्रीय निवड समितीचे अध्यक्ष अजित आगरकर यांनी शमीच्या पुनरागमनाचे मार्ग कठीण असल्याचे संकेत दिल्यानंतर शमीने दिलेली ही प्रतिक्रिया अत्यंत महत्त्वाची मानली जात आहे.
शमीच्या मते, निवृत्ती हा पूर्णपणे वैयक्तिक निर्णय असून तो कोणाच्या दबावाखाली किंवा वाढत्या वयामुळे घेतला जाऊ नये. “जर तुम्ही निवृत्तीचा विचार करत असाल, तर त्याचा अर्थ असा होतो की तुम्ही शारीरिक आणि मानसिकदृष्ट्या थकला आहात. ज्या दिवशी सकाळी झोपेतून उठल्यानंतर मला सरावाचा किंवा सामन्याचा कंटाळा येईल, तोच माझ्या कारकिर्दीचा शेवटचा दिवस असेल,” असे शमीने आत्मविश्वासाने नमूद केले. आयसीसी चॅम्पियन्स ट्रॉफी २०२५ नंतर शमी भारतीय संघात दिसलेला नाही. मात्र, या काळात त्याने देशांतर्गत क्रिकेटमध्ये बंगालकडून खेळताना तब्बल ६७ बळी मिळवून आपली लय आणि धार अद्याप कायम असल्याचे सिद्ध केले आहे. जवळपास एक वर्ष भारतीय संघाबाहेर असूनही त्याची जिद्द तसूभरही कमी झालेली नाही.
निवड समितीच्या निर्णयावर भाष्य करताना शमीने अत्यंत संयत आणि परिपक्व भूमिका घेतली. तो म्हणाला, “माझ्या हातात केवळ माझी कामगिरी आणि कठोर परिश्रम आहेत. जे माझ्या नियंत्रणात आहे, त्यावरच मी लक्ष केंद्रित करतो. नशिबाच्या गोष्टी मी बदलू शकत नाही, पण मैदानावर शंभर टक्के योगदान देणे हे माझे कर्तव्य आहे.” अजित आगरकर यांच्या नेतृत्वाखालील समितीने त्याला प्रदीर्घ काळ संघात स्थान दिलेले नसले, तरी शमीने आपली आशा सोडलेली नाही. सध्या तो आपली सर्व ऊर्जा आगामी आव्हानांवर खर्च करत असून पुनरागमनासाठी कसून सराव करत आहे.
इंडियन प्रीमियर लीग (IPL) २०२६ मध्ये शमी एका नवीन भूमिकेत दिसणार आहे. सनरायझर्स हैदराबादकडून बदली (Trade) झाल्यानंतर तो आता लखनौ सुपर जायंट्स संघाचा अविभाज्य भाग बनला आहे. आपल्या नवीन फ्रँचायझीबद्दल कृतज्ञता व्यक्त करताना त्याने सांगितले की, “लखनौ संघाने माझ्यावर जो विश्वास दाखवला आहे, त्याला मी पात्र ठरेन. एक गोलंदाज म्हणून मी माझे शंभर टक्के योगदान देईन आणि संघाच्या अपेक्षा पूर्ण करण्यासाठी कोणतीही कसर सोडणार नाही. माझ्यासाठी मेहनतीचे फळ आणि त्यातून मिळणारे समाधान सर्वात महत्त्वाचे आहे.
