NASA Artemis II live tracking Orion spacecraft: नासाच्या ‘आर्टेमिस 2’ मोहिमेकडे सध्या संपूर्ण जगाचे लक्ष लागले आहे. हे अंतराळयान आता नेमके कुठे आहे? असा प्रश्न अनेकांना पडला असेल. आता या प्रश्नाचे उत्तर मिळवणे अगदी सोपे झाले आहे.
नासाने उपलब्ध करून दिलेल्या नवीन ट्रॅकिंग टूल्स आणि लाइव्ह स्ट्रीमच्या मदतीने कोणीही आपल्या फोन किंवा लॅपटॉपवरून या ऐतिहासिक प्रवासाचा मागोवा घेऊ शकतो.
असे करा ‘ओरियन’चे लाइव्ह ट्रॅकिंग
आर्टेमिस 2 मोहिमेवर लक्ष ठेवण्यासाठी नासाने ‘आर्टेमिस रिअल-टाइम ऑर्बिट वेबसाइट’ (AROW) नावाचे अधिकृत ट्रॅकर सुरू केले आहे. हे टूल डेस्कटॉप आणि मोबाईल दोन्हीवर उपलब्ध असून त्यामध्ये खालील माहिती रिअल-टाइममध्ये दिसते:
- ओरियन अंतराळयानाचे सध्याचे नेमके स्थान.
- अवकाशातील त्याचा वेग.
- पृथ्वी आणि चंद्रापासूनचे त्याचे अंतर.
- मोहिमेचे महत्त्वाचे टप्पे आणि अपोलो काळातील ऐतिहासिक चंद्रावरील जागांची माहिती.
स्मार्टफोन यूजर्ससाठी नासाच्या ॲपमध्ये ‘ऑगमेंटेड रिअॅलिटी’ (AR) हे विशेष फीचर देण्यात आले आहे. याद्वारे तुम्ही तुमचा फोन हलवून ओरियन पृथ्वीच्या तुलनेत नेमके कुठे आहे, याचे दृश्य स्वरूप पाहू शकता.
हे ट्रॅकिंग सिस्टीम कशी काम करते?
ओरियन अंतराळयानावर बसवलेले सेन्सर सातत्याने डेटा जॉनसन स्पेस सेंटरमधील मिशन कंट्रोलला पाठवत असतात. नासाच्या मते, प्रक्षेपणांनंतर साधारण 1 मिनिटाने हा डेटा प्रवाहित होण्यास सुरुवात होते आणि पुढील 10 दिवसांच्या मोहिमेदरम्यान तो सतत उपलब्ध असतो. त्यामुळे पृथ्वीच्या वातावरणात पुन्हा प्रवेश करेपर्यंत तुम्ही या यानाचा प्रवास घराबाहेर न पडता पाहू शकता.
आर्टेमिस 2 मोहीम महत्त्वाची का आहे?
जरी आर्टेमिस 2 चंद्रावर उतरणार नसले तरी, अपोलो 17 नंतर पहिल्यांदाच मानव चंद्राच्या कक्षेभोवती प्रवास करणार आहे. भविष्यातील चंद्र मोहिमा आणि मंगळ ग्रहावरील प्रवासासाठी ही चाचणी अत्यंत महत्त्वाची मानली जात आहे. ओरियनचा मार्ग आता प्रत्येकासाठी डिजिटल स्वरूपात खुला झाला आहे, हेच या मोहिमेचे मोठे यश आहे.
