Pune Railway Security: पुणे रेल्वे विभागाने मागील आर्थिक वर्ष 2025-26 मध्ये प्रवासी सुरक्षा आणि गुन्हेगारी रोखण्यासाठी अत्यंत प्रभावी पावले उचलली आहेत. रेल्वे सुरक्षा दलाने (RPF) राबवलेल्या विविध मोहिमांच्या माध्यमातून हजारो गुन्हेगारांना अटक करण्यात आली असून, लाखो रुपयांचा मुद्देमाल प्रवाशांना परत मिळवून दिला आहे. वरिष्ठ विभागीय सुरक्षा आयुक्त प्रियंका शर्मा यांनी या कामगिरीचा सविस्तर अहवाल प्रसिद्ध केला आहे.
विविध मोहिमांअंतर्गत झालेली कारवाई:
- महिला सुरक्षा: रेल्वे परिसर आणि धावत्या गाड्यांमध्ये महिलांच्या सुरक्षिततेसाठी विशेष मोहीम राबवण्यात आली. यामध्ये 1,492 जणांना अटक करण्यात आली असून त्यांच्याकडून 5.80 लाख रुपये दंड वसूल करण्यात आला आहे.
- यात्री सुरक्षा: प्रवाशांशी संबंधित गुन्ह्यांवर लक्ष केंद्रित करत 125 आरोपींना बेड्या ठोकल्या. या कारवाईत 33.18 लाख रुपये किमतीचा मुद्देमाल हस्तगत करण्यात आला.
- नन्हे फरिश्ते: रेल्वे स्थानक किंवा गाड्यांमध्ये संकटात सापडलेल्या 412 मुलांची सुटका करण्यात आली. यामध्ये 355 मुले आणि 57 मुलींचा समावेश असून त्यांना सुरक्षितपणे त्यांच्या पालकांपर्यंत पोहोचवण्यात आले.
- सतर्क मोहीम: दारू, तंबाखू, सोने आणि रोख रकमेच्या अवैध तस्करीविरुद्ध ही मोहीम राबवली गेली. यात 21 जणांना अटक करून 51.28 लाख रुपयांचा ऐवज जप्त केला.
- अमानत उपक्रम: प्रवासादरम्यान विसरलेले सामान शोधून ते मूळ मालकांना परत करण्यासाठी ही मोहीम चालवली जाते. याअंतर्गत 260 बॅगा आणि इतर साहित्य प्रवाशांना सुपूर्द करण्यात आले.
- अवैध विक्रेत्यांवर कारवाई: रेल्वे गाड्यांमध्ये विनापरवाना विक्री करणाऱ्या 7,763 हॉकर्सना अटक करण्यात आली असून, त्यांच्याकडून 68.44 लाख रुपये दंड वसूल केला आहे.
सुरक्षेसाठी सीसीटीव्हीचे जाळे
पुणे रेल्वे विभागाने पाळत ठेवण्यासाठी तंत्रज्ञानाचा वापर वाढवला आहे. एकट्या पुणे रेल्वे स्थानकावर 160 हाय-रिझोल्यूशन सीसीटीव्ही कॅमेरे बसवण्यात आले आहेत. याशिवाय, संपूर्ण पुणे विभागातील विविध स्थानकांवर एकूण 382 नवीन कॅमेरे लावून प्रवाशांच्या सुरक्षिततेचे कवच अधिक मजबूत करण्यात आले आहे.
जीवरक्षक देवदूत
केवळ गुन्हेगारी रोखणेच नाही, तर आपत्कालीन परिस्थितीत प्रवाशांचे प्राण वाचवण्यासाठीही रेल्वे कर्मचारी तत्पर होते. वर्षभरात रेल्वे सुरक्षा दलाच्या जवानांनी मृत्यूच्या दारातून 12 प्रवाशांचे प्राण वाचवले आहेत. रेल्वे सुरक्षा दलाची ही कामगिरी पुणे विभागातील प्रवाशांसाठी अत्यंत दिलासादायक ठरत आहे.
