SRH vs DC : आयपीएल २०२६ च्या ३१ व्या सामन्यात सनरायझर्स हैदराबादने (SRH) आपल्या घरच्या मैदानावर, म्हणजेच राजीव गांधी आंतरराष्ट्रीय स्टेडियमवर दिल्ली कॅपिटल्सचा (DC) ४७ धावांनी पराभव केला. अभिषेक शर्माच्या विष्फोटक फलंदाजीच्या जोरावर हैदराबादने या हाय-स्कोअरिंग सामन्यात विजय मिळवून गुणतालिकेत तिसऱ्या स्थानावर झेप घेतली आहे. या विजयासह हैदराबादने ८ गुणांची कमाई करत प्लेऑफच्या दिशेने आपले पाऊल अधिक मजबूत केले आहे.
अभिषेक शर्माची विक्रमी फलंदाजी-
नाणेफेक जिंकून प्रथम फलंदाजीसाठी उतरलेल्या सनरायझर्स हैदराबादची सुरुवात अत्यंत आक्रमक झाली. सलामीवीर ट्रॅव्हिस हेड आणि अभिषेक शर्मा यांनी दिल्लीच्या गोलंदाजीवर पहिल्या षटकापासूनच हल्ला चढवला. पॉवरप्लेच्या ६ षटकांत हैदराबादने बिनबाद ६७ धावांची भक्कम पायाभरणी केली. अभिषेक शर्माने अवघ्या २५ चेंडूंमध्ये आपले अर्धशतक पूर्ण केले. नवव्या षटकात अक्षर पटेलने ट्रॅव्हिस हेडला ३७ धावांवर बाद करून हैदराबादला पहिला धक्का दिला, मात्र त्यानंतरही अभिषेकची फटकेबाजी थांबली नाही. त्याने अवघ्या ४७ चेंडूंमध्ये शतकी टप्पा ओलांडला. अखेर ६८ चेंडूंत १० चौकार आणि १० उत्तुंग षटकारांच्या मदतीने नाबाद १३५ धावांची खेळी करत त्याने हैदराबादला २० षटकांत २ बाद २४२ अशा डोंगरासारख्या धावसंख्येपर्यंत पोहोचवले.
दिल्लीचा संघर्ष आणि मलिंगाचा भेदक मारा-
२४३ धावांच्या कठीण आव्हानाचा पाठलाग करताना दिल्ली कॅपिटल्सची सुरुवात निराशाजनक झाली. सलामीवीर पथुम निसांका ८ धावा करून स्वस्तात बाद झाला. त्यानंतर अनुभवी के. एल. राहुल (३७ धावा) आणि नितीश राणा यांनी डाव सावरण्याचा प्रयत्न केला. नितीश राणाने ३० चेंडूंमध्ये ७ चौकार आणि ३ षटकारांच्या साह्याने ५७ धावांची तुफानी खेळी करत दिल्लीच्या विजयाची आशा जिवंत ठेवली होती. मात्र, हैदराबादचा गोलंदाज इशान मलिंगाने आपल्या भेदक स्पेलने सामन्याचे चित्र पालटले. मलिंगाने धोकादायक डेव्हिड मिलरला शून्यावर बाद केले आणि पाठोपाठ ट्रिस्टन स्टब्सची (२७ धावा) महत्त्वाची विकेट घेत दिल्लीला बॅकफूटवर ढकलले.
गोलंदाजांचे वर्चस्व आणि गुणतालिका-
दिल्लीचा संघ २० षटकांत ९ गडी गमावून केवळ १९५ धावांपर्यंतच मजल मारू शकला. हैदराबादच्या गोलंदाजी विभागात इशान मलिंगाने सर्वाधिक ४ बळी मिळवून विजयात मोलाचा वाटा उचलला.
