DRDO Scientist Recruitment: भारताच्या संरक्षण तंत्रज्ञान क्षेत्रात मोलाचे योगदान देऊ इच्छिणाऱ्या अनुभवी तरुण आणि तज्ज्ञांसाठी एक उत्तम संधी चालून आली आहे. संरक्षण संशोधन आणि विकास संस्थेने (DRDO) वेगवेगळ्या ग्रेडमधील वैज्ञानिक पदांसाठी अधिकृत भरती प्रक्रिया सुरू केली आहे.
डीआरडीओने जाहिरात क्रमांक 157 अंतर्गत एकूण 33 जागांची घोषणा केली असून ‘रिक्रूटमेंट अँड अचिव्हमेंट सेंटर’च्या (RAC) माध्यमातून ऑनलाईन अर्ज मागवले आहेत. या भरती मोहिमेमध्ये सायंटिस्ट सी, सायंटिस्ट डी आणि सायंटिस्ट ई या पदांचा समावेश आहे. पात्र आणि इच्छुक उमेदवारांना 19 जून 2026 रोजी संध्याकाळी 4 वाजेपर्यंत ऑनलाईन अर्ज सादर करता येतील.
विविध पदांचा तपशील आणि शैक्षणिक पात्रता
या भरती प्रक्रियेत अनुभवानुसार वेगवेगळ्या पदांची विभागणी करण्यात आली असून, ७ व्या वेतन आयोगानुसार आकर्षक पगार दिला जाणार आहे:
- सायंटिस्ट सी (Scientist C): एकूण 20 जागा. या पदासाठी उमेदवाराकडे संबंधित क्षेत्रातील किमान 3 वर्षांचा अनुभव असणे आवश्यक आहे. अर्ज करण्यासाठी जास्तीत जास्त वयोमर्यादा 35 वर्षे असून, सुरुवातीचा मूळ पगार दरमहा 67,700 रुपये असेल.
- सायंटिस्ट डी (Scientist D): एकूण 11 जागा. या पदासाठी किमान 7 वर्षांच्या अनुभवाची अट आहे. कमाल वयोमर्यादा 45 वर्षे असून, मूळ पगार दरमहा 78,800 रुपये निश्चित करण्यात आला आहे.
- सायंटिस्ट ई (Scientist E): एकूण 2 जागा. यासाठी उमेदवाराकडे किमान 11 वर्षांचा दांडगा अनुभव असणे गरजेचे आहे. वयोमर्यादा 45 वर्षे असून, मूळ पगार तब्बल 1,23,100 रुपये प्रतिमहिना इतका असेल.
संरक्षण क्षेत्रातील महत्त्वाच्या प्रकल्पांवर काम करण्याची संधी
डीआरडीओ ही संस्था देशाच्या सुरक्षेसाठी प्रगत शस्त्रप्रणाली, धोरणात्मक तंत्रज्ञान आणि स्वदेशी नवकल्पनांवर काम करण्यासाठी जगभर प्रसिद्ध आहे. निवड झालेल्या शास्त्रज्ञांना राष्ट्रीय सुरक्षेशी संबंधित आणि सरकारच्या ‘आत्मनिर्भर भारत’ संकल्पनेला गती देणाऱ्या महत्त्वाच्या प्रकल्पांवर आघाडीच्या तज्ज्ञांसोबत काम करण्याची थेट संधी मिळणार आहे. या सर्व जागा वेगवेगळ्या वैज्ञानिक आणि तांत्रिक विभागांमध्ये विभागल्या गेल्या आहेत. त्यामुळे उमेदवारांनी अर्ज करण्यापूर्वी अधिकृत संकेतस्थळावर जाऊन आपल्या विषयाची सविस्तर माहिती तपासून घ्यावी.
ऑनलाईन अर्ज करण्याची सोपी पद्धत
इच्छुक उमेदवार खालील सोप्या स्टेप्स फॉलो करून आपला अर्ज सादर करू शकतात:
- सर्वप्रथम आरएसीच्या अधिकृत पोर्टलला (rac.gov.in) भेट द्या.
- होमपेजवर जाऊन ऑनलाईन नोंदणीची प्रक्रिया पूर्ण करा.
- अर्ज फॉर्ममधील सर्व वैयक्तिक आणि शैक्षणिक माहिती काळजीपूर्वक भरा.
- तुमची आवश्यक कागदपत्रे आणि अनुभवाचे दाखले स्कॅन करून अपलोड करा.
- फॉर्म सबमिट करण्यापूर्वी भरलेली सर्व माहिती एकदा नीट तपासून घ्या.
- शेवटी, 19 जून 2026 रोजी संध्याकाळी 4 वाजेपूर्वी आपला अर्ज ऑनलाईन सबमिट करा.
हे देखील वाचा – LPG Price Hike: सर्वसामान्यांना महागाईचा मोठा झटका! घरगुती गॅस सिलिंडरच्या किमतीत पुन्हा वाढ; पाहा नवीन दर
