Fixed Deposit Returns: शेअर बाजार किंवा म्युच्युअल फंडमधील चढ-उतार नको असणाऱ्या गुंतवणूकदारांसाठी मुदत ठेव (FD) हा आजही सर्वात विश्वासाचा पर्याय मानला जातो. एफडीमधील परतावा हा रिझर्व्ह बँकेच्या रेपो रेटवर अवलंबून असतो. सध्या अनेक मोठ्या बँका वार्षिक 6 ते 7.25 टक्क्यांपर्यंत व्याज देत असून ज्येष्ठ नागरिकांना अतिरिक्त 0.50 टक्के फायदा मिळत आहे.
तुमच्या पैशांची वाढ कशी होईल?
जर तुम्ही 1 लाख, 5 लाख किंवा 10 लाख रुपये एफडीमध्ये गुंतवले, तर वेगवेगळ्या कालावधीसाठी मिळणारा अंदाजे परतावा खालीलप्रमाणे असेल:
1. जर तुम्ही 1 लाख रुपये गुंतवले:
- 3 वर्षे: 6.30% ते 7.25% व्याजाने तुम्हाला मॅच्युरिटीला साधारण 1.20 लाख ते 1.23 लाख रुपये मिळतील.
- 5 वर्षे: 6.05% ते 7.1% व्याजाने ही रक्कम 1.34 लाख ते 1.41 लाख रुपयांपर्यंत वाढू शकते.
- 10 वर्षे: साधारण 6% व्याजाने 10 वर्षांनंतर तुम्हाला 1.80 लाख रुपये मिळू शकतात.
2. जर तुम्ही 5 लाख रुपये गुंतवले:
- 3 वर्षे: या गुंतवणुकीवर 3 वर्षांनंतर साधारण 6 लाख ते 6.15 लाख रुपये मिळू शकतात.
- 5 वर्षे: 5 वर्षांच्या कालावधीसाठी ही रक्कम 6.79 लाख ते 7.05 लाख रुपयांपर्यंत पोहोचते.
- 10 वर्षे: दीर्घकालीन गुंतवणुकीत 10 वर्षांनंतर साधारण 9.10 लाख रुपये मॅच्युरिटी मिळू शकते.
3. जर तुम्ही 10 लाख रुपये गुंतवले:
- 3 वर्षे: 3 वर्षांच्या मुदतीनंतर तुम्हाला साधारण 12 लाख ते 12.25 लाख रुपये मिळतील.
- 5 वर्षे: ही गुंतवणूक 5 वर्षांत साधारण 13.58 लाख ते 14.10 लाख रुपयांपर्यंत वाढू शकते.
- 10 वर्षे: 10 वर्षांच्या दीर्घ मुदतीनंतर तुम्हाला तब्बल 18.20 लाख रुपयांपर्यंत परतावा मिळू शकतो.
टॅक्स आणि टीडीएसचे नियम काय?
एफडीमधून मिळणारे व्याज हे तुमच्या उत्पन्नाचा भाग मानले जाते आणि तुमच्या टॅक्स स्लॅबनुसार त्यावर कर आकारला जातो.
- कलम 80C: 5 वर्षांच्या टॅक्स सेव्हर एफडीमध्ये तुम्ही 1.5 लाख रुपयांपर्यंत कर सवलत मिळवू शकता.
- TDS: जर एका वर्षातील व्याज 50,000 रुपयांपेक्षा जास्त (ज्येष्ठ नागरिकांसाठी 1 लाख रुपये) असेल, तर बँक टीडीएस कापते. तुमचा पॅन कार्ड नंबर दिला असल्यास 10% टीडीएस कापला जातो.
- फॉर्म 121: जर तुमचे एकूण उत्पन्न करपात्र नसेल, तर टीडीएस वाचवण्यासाठी तुम्ही बँकेत फॉर्म 121 (पूर्वीचे 15G/15H) जमा करू शकता.
गुंतवणूक करताना बँकांच्या चक्रवाढ व्याजाची पद्धत (त्रैमासिक किंवा मासिक) तपासून घेणे फायदेशीर ठरते. एकदा एफडी सुरू केल्यावर त्यातील व्याजदर मॅच्युरिटीपर्यंत स्थिर राहतो, त्यामुळे भविष्यातील नियोजनासाठी हा एक उत्तम पर्याय आहे.
हे देखील वाचा – PM Modi Appeal: इंधनाची बचत करा आणि वर्षभर सोनं खरेदी टाळा! पंतप्रधान मोदींचे देशाला मोठे आवाहन; पाहा नक्की असे का म्हणाले?
