RBI Action Yashwant Sahakari Bank license: सातारा जिल्ह्यातील सहकार क्षेत्रातून एक मोठी बातमी समोर आली आहे. फलटण येथील प्रसिद्ध ‘द यशवंत सहकारी बँक लिमिटेड’चा बँकिंग परवाना रिझर्व्ह बँक ऑफ इंडियाने (RBI) रद्द केला आहे. आरबीआयने १८ मे रोजी या संदर्भातील अधिकृत आदेश जारी केले असून, १९ मे २०२६ पासून बँकेचे सर्व व्यवहार पूर्णपणे थांबवण्यात आले आहेत.
या कारवाईसोबतच आरबीआयने महाराष्ट्राच्या सहकार आयुक्त आणि निबंधकांना बँक तात्काळ बंद करून तिथे लिक्विडेटर (अवसायक) नियुक्त करण्याचे आदेश दिले आहेत. या बँकेतील गाजलेल्या घोटाळा प्रकरणातील मुख्य आरोपी शेखर चरेगावकर याला याच वर्षाच्या फेब्रुवारी महिन्यात पोलिसांनी अटक केली होती.
RBI Action Yashwant Sahakari Bank license: परवाना रद्द करण्यामागील मुख्य कारणे
बँकिंग नियमन कायदा १९४९ च्या विविध तरतुदींचे पालन न केल्यामुळे आरबीआयने ही कडक कारवाई केली आहे. परवाना रद्द होण्यामागे खालील प्रमुख कारणे आहेत:
- भांडवलाची कमतरता: बँकेकडे स्वतःचे पुरेसे भागभांडवल आणि भविष्यात कमाईची कोणतीही शाश्वत साधने उरलेली नाहीत.
- नियमांचे उल्लंघन: बँक प्रशासकीय आणि बँकिंग नियमांची पूर्तता करण्यात सातत्याने अपयशी ठरली.
- ठेवीदारांचे नुकसान: बँकेची सध्याची आर्थिक स्थिती पाहता, ग्राहकांचे पैसे पूर्णपणे परत करणे त्यांना शक्य नव्हते. अशा स्थितीत बँकेचे कामकाज चालू ठेवणे ठेवीदारांच्या हिताचे नव्हते.
या निर्णयामुळे आता यशवंत सहकारी बँकेला ग्राहकांकडून ठेवी स्वीकारणे किंवा जुन्या ठेवींचे पैसे परत करणे यासारखा कोणताही बँकिंग व्यवसाय करता येणार नाही.
RBI Action Yashwant Sahakari Bank license: ९९ टक्के ठेवीदारांना दिलासा, मिळणार ५ लाखांपर्यंतचे कवच
बँकेचा परवाना रद्द झाला असला, तरी सामान्य ग्राहकांना फार मोठा फटका बसणार नाही. बँकेने दिलेल्या आकडेवारीनुसार, तब्बल ९९.०२ टक्के ठेवीदार त्यांचे पैसे पूर्णपणे परत मिळवण्यासाठी पात्र आहेत.
बँकेचे संपूर्ण लिक्विडेशन (गुंडाळण्याची प्रक्रिया) झाल्यानंतर, प्रत्येक ठेवीदाराला ‘डीआयसीजीसी’ (DICGC) कायद्यानुसार ५ लाख रुपयांपर्यंतची रक्कम परत मिळण्याचा कायदेशीर अधिकार आहे. या योजनेअंतर्गत डीआयसीजीसीने आधीच १०६.९६ कोटी रुपयांच्या ठेवी ग्राहकांना परत केल्या आहेत.
हे देखील वाचा – Cockroach Janta Party : ‘कॉक्रोच जनता पार्टी’ नक्की काय आहे? कोणी केली या पक्षाची स्थापना? जाणून घ्या
