Ayodhya Ram Mandir SIT: उत्तर प्रदेशातील अयोध्या येथील भव्य राम मंदिराला जगभरातून मिळणाऱ्या देणग्या आणि अर्पणांमध्ये अनियमितता झाल्याच्या आरोपांमुळे सध्या देशातील राजकीय वातावरण कमालीचे तापले आहे. या वाढत्या वादाची दखल घेत मुख्यमंत्री योगी आदित्यनाथ यांच्या सरकारने या संपूर्ण प्रकरणाच्या चौकशीसाठी 3 सदस्यीय विशेष तपास पथक म्हणजेच एसआयटी (SIT) स्थापन केली आहे.
विशेष म्हणजे राम मंदिराची व्यवस्था पाहणाऱ्या ‘श्री रामजन्मभूमी तीर्थ क्षेत्र ट्रस्ट’ने स्वतः मुख्यमंत्री योगी आदित्यनाथ यांना पत्र लिहून या प्रकरणाची सखोल चौकशी करण्याची विनंती केली होती. मंदिरातील देणग्यांबाबत पसरवल्या जाणाऱ्या अफवांना पूर्णविराम मिळावा आणि सत्य जनतेसमोर यावे, यासाठी ही चौकशी आवश्यक असल्याचे ट्रस्टने म्हटले आहे. या एसआयटीला पुढील 7 दिवसांत प्राथमिक अहवाल आणि 15 दिवसांत अंतिम अहवाल सादर करण्याचे आदेश देण्यात आले आहेत.
कर्मचाऱ्याच्या घरात रोकड जप्त; पोलीस तपासाला वेग
हा वाद सुरू असतानाच पोलिसांनी राम मंदिरातील देणगीच्या पैशांची मोजणी करणाऱ्या लवकुश मिश्रा नावाच्या एका कर्मचाऱ्याला ताब्यात घेतले आहे. पोलिसांना त्याच्या घराच्या झडतीदरम्यान तब्बल 10 लाख रुपयांची रोकड जप्त करण्यात यश आले आहे. जप्त केलेली ही रोकड थेट मंदिराच्या देणगी घोटाळ्याशी संबंधित आहे का, याचा अधिकृत खुलासा अद्याप तपास अधिकाऱ्यांनी केलेला नाही, परंतु या घटनेमुळे संशयाची सुई अधिक गडद झाली आहे.
सध्याच्या नियमांनुसार, राम मंदिरात येणारे दान स्टेट बँक ऑफ इंडियाच्या कर्मचाऱ्यांकडून सीसीटीव्ही कॅमेऱ्यांच्या देखरेखीखाली आणि ट्रस्टच्या प्रतिनिधींच्या उपस्थितीत मोजले जाते. मोजणीनंतर ही रक्कम रेकॉर्डमध्ये नोंदवून मंदिरातील लॉकरमध्ये सुरक्षित ठेवली जाते आणि दुसऱ्या दिवशी बँकेत जमा केली जाते.
अखिलेश यादव आणि भाजप नेत्याचे गंभीर प्रश्न
या प्रकरणावरून विरोधी पक्षांसह सत्ताधारी पक्षातील नेत्यांनीही प्रशासनाला धारेवर धरले आहे:
- अखिलेश यादव यांचे आरोप: समाजवादी पक्षाचे अध्यक्ष अखिलेश यादव यांनी थेट ट्रस्टच्या कारभारावर प्रश्नचिन्ह उपस्थित केले आहे. पैशांच्या मोजणीचे सीसीटीव्ही फुटेज सार्वजनिक का केले जात नाही आणि मोजणीच्या कामात खाजगी संस्थांना का सामील करून घेतले गेले, याचे उत्तर सरकारने द्यावे, अशी मागणी त्यांनी केली.
- भाजप नेत्याची पंतप्रधान मोदींना पत्रे: अयोध्येतील भाजप नेते रजनीश सिंह यांनी थेट पंतप्रधान नरेंद्र मोदी यांना 2 पत्रे लिहून मंदिर ट्रस्टच्या आर्थिक व्यवहारात पारदर्शकता आणण्याची मागणी केली आहे. त्यांनी मंदिर बांधणीसाठी गोळा झालेला निधी, दानपेट्या, ऑनलाईन ट्रान्सफर, तसेच सोने-चांदीच्या दागिन्यांचा संपूर्ण हिशोब आणि बँकेचे स्टेटमेंट जाहीर करण्याची मागणी केली आहे.
विरोधक आणि समर्थकांमध्ये जोरदार राजकीय चकमक
या संपूर्ण प्रकरणाचे दिल्लीपर्यंत तीव्र राजकीय पडसाद उमटत आहेत. राम मंदिर ट्रस्टचे सरचिटणीस चंपत राय यांनी हे सर्व आरोप फेटाळून लावले असून मंदिराचे अंतर्गत आणि एसबीआयकडून नियमित ऑडिट केले जाते, असे सांगितले आहे. उत्तर प्रदेशचे उपमुख्यमंत्री ब्रजेश पाठक यांनी अखिलेश यादव यांच्यावर अफवा पसरवल्याचा आरोप केला आहे, तर फैजाबादचे खासदार अवधेश प्रसाद यांनी देणग्यांमध्ये मोठा अपहार झाल्याचा दावा केला आहे.
यातच भाजपचे माजी खासदार ब्रिजभूषण शरण सिंह यांच्या एका विधानाने खळबळ उडवून दिली आहे. त्यांनी म्हटले आहे की, “मी खूप कमकुवत माणूस आहे. जर मी या विषयावर सत्य बोललो, तर मी मोठ्या अडचणीत येईन कारण यामध्ये खूप मोठी लोकं सामील आहेत. माझ्याकडे सध्या सत्य बोलण्याचे धैर्य नाही, योग्य वेळ आल्यावर मी नक्कीच बोलेन.”
राम मंदिराची अफाट लोकप्रियता आणि आर्थिक उलाढाल
जानेवारी 2024 मध्ये झालेल्या प्राणप्रतिष्ठा सोहळ्यानंतर राम मंदिर हे देशातील सर्वात मोठे धार्मिक केंद्र बनले आहे:
- पर्यटकांची विक्रमी संख्या: आयआयएम लखनऊच्या अहवालानुसार, पहिल्या 6 महिन्यांतच 11 कोटी लोकांनी अयोध्येला भेट दिली. पर्यटन विभागाच्या माहितीनुसार, वर्ष 2024 मध्ये 16.4 कोटी आणि वर्ष 2025 मध्ये तब्बल 30 कोटी भाविकांनी दर्शन घेतले.
- लाखो कोटींची अर्थव्यवस्था: स्टेट बँकेच्या एका संशोधनानुसार, केवळ 2024 या एकाच वर्षात अयोध्येतील धार्मिक पर्यटनामुळे 4 लाख कोटी रुपयांपेक्षा जास्त आर्थिक उलाढाल झाली आहे. प्राणप्रतिष्ठा सोहळ्यानंतर सुरुवातीच्या दिवसांत मंदिरातील एका दिवसाचे दान 3 कोटी रुपयांच्या पार गेले होते.
हे देखील वाचा – Abhijit Dipke Attack: “10 वेळा कानाखाली मारली तरी…” जयपूरमधील हल्ल्यानंतर अभिजित दिपकेंची पहिली प्रतिक्रिया
