TMC Split News: पश्चिम बंगालच्या विधानसभा निवडणुकीत झालेल्या पराभवानंतर तृणमूल काँग्रेस (TMC) मधील अंतर्गत कलह आता टोकावर पोहोचला आहे. पक्षावर पूर्ण नियंत्रण मिळवण्यासाठी सुरू असलेल्या संघर्षात बंडखोर गटाने थेट पक्षसंस्थापक ममता बॅनर्जी यांच्या नेतृत्वाला आव्हान दिले आहे. विरोधी पक्षनेते ऋतव्रत बॅनर्जी यांच्या नेतृत्वाखालील बंडखोर गटाने ज्येष्ठ आमदार अरुप रॉय यांची ‘खरी’ तृणमूल काँग्रेसचे अध्यक्ष म्हणून घोषणा केली आहे.
एवढेच नव्हे तर, समांतर संघटनात्मक रचना जाहीर केल्यानंतर अवघ्या काही वेळातच पक्षाचे राष्ट्रीय सरचिटणीस अभिषेक बॅनर्जी यांच्या निलंबनाची घोषणा केली. सुमारे 15 वर्षे सत्तेत राहिल्यानंतर बंगालमधील सत्ता गमावलेल्या तृणमूल काँग्रेसच्या इतिहासातील हे आतापर्यंतचे सर्वात मोठे बंड मानले जात आहे. या घडामोडींमुळे ममता बॅनर्जी यांच्या अडचणीत प्रचंड वाढ झाली आहे.
बैठकीत नवीन राष्ट्रीय समिती स्थापन
न्यू टाउनमधील एका पाचतारांकित हॉटेलमध्ये बंडखोर आमदार आणि नगरसेवकांची एक महत्त्वाची बैठक पार पडली. या बैठकीत कोलकाता, हावडा, मुर्शिदाबाद आणि बेहरमपूरसह अनेक जिल्ह्यांमधील माजी लोकप्रतिनिधी आणि नगरसेवक उपस्थित होते. पक्षातील अंतर्गत निर्णयांबाबत खालील महत्त्वाचे मुद्दे समोर आले आहेत:
- घटनात्मक संकटाचा दावा: पक्षाच्या घटनेनुसार दर 3 वर्षे राष्ट्रीय कार्यकारिणीची पुनर्रचना करणे बंधनकारक आहे. फेब्रुवारी 2022 मध्ये स्थापन झालेल्या जुन्या समितीची मुदत संपली तरी तिची पुनर्रचना करण्यात आली नाही, त्यामुळे पक्षाची नवी राष्ट्रीय समिती स्थापन करणे आवश्यक होते, असा युक्तिवाद ऋतव्रत बॅनर्जी यांनी केला.
- अरुप रॉय नवे अध्यक्ष: हावडा मध्यचे ज्येष्ठ आमदार अरुप रॉय यांची बहुमताने नवीन अध्यक्ष म्हणून निवड करण्यात आली. तर फिरहाद हकीम, अरुप बिस्वास, रथिन घोष आणि सबिना यास्मिन यांची उपाध्यक्षपदी नियुक्ती झाली आहे.
- 60 आमदारांचा पाठिंबा असल्याचा दावा: या बैठकीला किंवा घेतलेल्या निर्णयांना जवळपास 60 हून अधिक आमदारांचा आणि मोठ्या संख्येने नगरसेवकांचा पाठिंबा असल्याचा दावा बंडखोर गटाने केला आहे. पक्षाच्या आर्थिक नोंदी तपासण्यासाठी एका स्वतंत्र ऑडिटरची नियुक्ती करण्याचा निर्णयही या समितीने घेतला आहे.
“हा फक्त एक कॉमेडी शो”; ममता बॅनर्जी गटाकडून बंडखोरांचा निषेध
दुसरीकडे, ममता बॅनर्जी यांच्याशी एकनिष्ठ असलेल्या नेत्यांनी बंडखोरांच्या या हालचालींना एक निव्वळ नाटक आणि प्रहसन म्हणून फेटाळून लावले आहे. तृणमूल काँग्रेस म्हणजे केवळ ममता बॅनर्जी हे समीकरण कोणीही बदलू शकत नाही, असा पुनरुच्चार अधिकृत गटाने केला आहे.
ममता बॅनर्जी यांच्या छावणीतील ज्येष्ठ नेते कुणाल घोष यांनी सोशल मीडिया प्लॅटफॉर्म एक्स (X) वर लिहिले की, पक्षातून हकालपट्टी झालेली व्यक्ती विशेष अधिवेशन घेत आहे हा एक मोठा ‘कॉमेडी शो’ आहे. हे प्रकरण सध्या न्यायालयात असून तिथे योग्य तो न्याय मिळेल. अशा विदूषकी चाळ्यांना आम्ही अजिबात महत्त्व देत नाही. तृणमूल काँग्रेस म्हणजेच ममता बॅनर्जी, याव्यतिरिक्त जे सुरू आहे तो फक्त एक सर्कसचा खेळ आहे.
पक्षात यापूर्वीच लोकसभेतील 28 पैकी 20 खासदारांनी बंडखोरी करत राष्ट्रवादी नागरिक पक्षासोबत (NCPI) हातमिळवणी केली आहे आणि भाजपच्या नेतृत्वाखालील एनडीए (NDA) आघाडीला पाठिंबा दिला आहे. आता विधानसभेतही 65 आमदारांचा पाठिंबा असल्याचा दावा बंडखोरांनी केल्यामुळे पक्षातील फूट पूर्णपणे स्पष्ट झाली आहे.
हे देखील वाचा – Kunal Shah WhatsApp Head: भारतीय उद्योजकाचा डंका! ‘CRED’ चे संस्थापक कुणाल शाह सांभाळणार व्हॉट्सअॅपची जागतिक धुरा
