BSNL Satellite Phone Launch : सार्वजनिक क्षेत्रातील अग्रगण्य दूरसंचार कंपनी असलेल्या भारत संचार निगम लिमिटेडने (BSNL) तंत्रज्ञान विश्वात एक मोठे पाऊल टाकले आहे. सामान्य मोबाईल नेटवर्क काम करत नाही अशा अत्यंत दुर्गम आणि डोंगराळ भागातही अखंड संपर्क सेवा देण्यासाठी बीएसएनएलने आपला नवीन सॅटेलाईट फोन अधिकृतपणे बाजारात आणला आहे.
या विशेष हँडसेटची किंमत 1.34 लाख रुपये निश्चित करण्यात आली असून, मुख्यत्वे संरक्षण दल, सागरी वाहतूक आणि आपत्ती व्यवस्थापन क्षेत्रातील गरजा लक्षात घेऊन याची रचना करण्यात आली आहे.
कंपनीने सोशल मीडियावरून या लाँचिंगची माहिती दिली. सर्व करांसह या फोनची किंमत 1,34,166 रुपये आहे. जिथे साधे मोबाईल नेटवर्क पोहोचू शकत नाही, तिथे हा फोन व्हॉईस कॉलिंग आणि एसएमएस सेवा अखंडपणे चालू ठेवण्यास सक्षम आहे.
या क्षेत्रांसाठी ठरणार वरदान; पण दिलेल्या नंबरवर प्रतिसाद मिळेना
हा सॅटेलाईट फोन अत्यंत खडतर वातावरणात आणि दुर्गम भागात काम करण्यासाठी डिझाईन केला गेला आहे. बीएसएनएलच्या माहितीनुसार, हा फोन खालील क्षेत्रांसाठी अत्यंत उपयुक्त ठरेल:
- संरक्षण दल (डिफेन्स) आणि आपत्ती निवारण पथके
- सागरी वाहतूक (मॅरिटाईम) आणि खाणकाम क्षेत्र (मायनिंग)
- दुर्गम भागातील व्यावसायिक ऑपरेशन्स आणि साहसी पर्यटन (अॅडव्हेंचर ट्रॅव्हल)
या संदर्भात अधिक माहितीसाठी ग्राहकांनी जवळच्या बीएसएनएल कार्यालयाशी संपर्क साधण्याचे आवाहन कंपनीने केले आहे. तसेच कंपनीने पोस्टमध्ये एक मोबाईल नंबरही शेअर केला होता, परंतु तो नंबर व्यस्त किंवा अनुत्तरीत असल्याचे समोर आले आहे. एका युझरने सोशल मीडियावर कमेंट करत “नेहमीप्रमाणे दिलेल्या नंबरवर कोणीही प्रतिसाद देत नाही” अशी तक्रारही नोंदवली आहे.
कठोर नियमांनंतरच मिळणार जोडणी; संपूर्ण डेटा सुरक्षित
बीएसएनएल गेल्या अनेक वर्षांपासून आपल्या ‘ग्लोबल सॅटेलाईट फोन सर्व्हिस’ द्वारे सामान्य नागरिक आणि खासगी कंपन्यांना ही सेवा देत आहे. मात्र, सुरक्षेच्या कारणास्तव हा फोन घेण्याची प्रक्रिया सामान्य सिम कार्ड घेण्यापेक्षा अत्यंत कडक आहे:
- कडक केवायसी प्रक्रिया: दूरसंचार विभागाच्या नियमांनुसार, ग्राहकाला हा फोन खरेदी करताना सामान्य मोबाईल कनेक्शनप्रमाणेच संपूर्ण पडताळणी प्रक्रिया पूर्ण करावी लागते.
- माहिती देणे बंधनकारक: हा सॅटेलाईट फोन नेमका कोणत्या ठिकाणी वापरला जाणार आहे, किती काळासाठी वापरला जाणार आहे आणि तो वापरण्यामागचा मुख्य हेतू काय आहे, याची सविस्तर माहिती ग्राहकाला लेखी स्वरूपात द्यावी लागते.
- पूर्णपणे सुरक्षित संवाद: सुरक्षेच्या दृष्टीने ही सेवा अत्यंत सुरक्षित मानली जाते, कारण या फोनवरून होणारा सर्व संवाद हा एनक्रिप्टेड स्वरूपात ट्रान्सफर केला जातो.
बीएसएनएलचे सॅटेलाईट पोस्टपेड आणि प्रीपेड प्लॅन्स
या सॅटेलाईट फोनसाठी कंपनीने सरकारी आणि व्यावसायिक युझर्ससाठी स्वतंत्र प्लॅन्स जाहीर केले आहेत:
- पोस्टपेड प्लॅन्स: सरकारी आणि व्यावसायिक ग्राहकांसाठी दरमहा 3,500 रुपये, 5,835 रुपये आणि 11,670 रुपयांचे पोस्टपेड प्लॅन्स उपलब्ध आहेत. यामध्ये अनुक्रमे 16, 30 आणि 60 मिनिटांचा मोफत टॉकटाईम किंवा एसएमएस मिळतात.
- सरकारी कर्मचाऱ्यांसाठी प्रीपेड प्लॅन्स: दरमहा 3,500 रुपये (20 मिनिटे मोफत) किंवा वार्षिक 38,500 रुपये (240 मिनिटे मोफत).
- व्यावसायिक युझर्ससाठी प्रीपेड प्लॅन्स: दरमहा 5,835 रुपये (30 मिनिटे मोफत) किंवा वार्षिक 64,185 रुपये (360 मिनिटे मोफत).
अतिरिक्त चार्जेस आणि टॉप-अप: मोफत मिळालेली मिनिटे संपल्यानंतर सरकारी युझर्सना प्रति मिनिट किंवा एसएमएससाठी 18 रुपये मोजावे लागतील, तर व्यावसायिक ग्राहकांना प्रति मिनिट 25 रुपये शुल्क आकारले जाईल. ग्राहक आपली गरज संपल्यास 200, 500, 1,000, 5,000 आणि 10,000 रुपयांचे टॉप-अप व्हाउचर खरेदी करून अतिरिक्त टॉकटाईम मिळवू शकतात.
