Parth Pawar Engagement : पवार कुटुंबात लवकरच पुन्हा एकदा शुभकार्य पार पडणार असून, सनई-चौघड्यांचे सूर घुमणार आहेत. राष्ट्रवादी काँग्रेस (अजित पवार गट) पक्षाचे खासदार आणि दिवंगत नेते अजित पवार यांचे सुपुत्र पार्थ पवार हे लवकरच विवाहबंधनात अडकणार आहेत. पार्थ पवार आणि त्यांची सुविद्य मैत्रीण कायनात धार यांचा वाङ्निश्चय (साखरपुडा) येत्या २९ जुलै रोजी पुण्यात अत्यंत थाटामाटात संपन्न होणार आहे. नुकताच राष्ट्रवादी काँग्रेस (शरदचंद्र पवार गट) पक्षाच्या खासदार सुप्रिया सुळे यांची कन्या रेवती सुळे हिचा विवाहसोहळा पार पडल्यानंतर, आता पवार कुटुंबातील या दुसऱ्या शुभकार्यामुळे राजकीय वर्तुळात आनंदाचे वातावरण निर्माण झाले आहे.
रेवती सुळे यांच्या विवाहसोहळ्यात पार्थ-कायनात यांच्या उपस्थितीने वेधले लक्ष
राष्ट्रवादी काँग्रेसचे संस्थापक शरद पवार यांची नात आणि खासदार सुप्रिया सुळे यांची सुकन्या रेवती हिचा विवाहसोहळा मुंबईतील एका पंचतारांकित हॉटेलमध्ये अत्यंत दिमाखात पार पडला. या विवाह सोहळ्यादरम्यान सर्वांच्या नजरा पार्थ पवार यांच्या आगमनाकडे लागल्या होत्या. विशेष म्हणजे, या शाही सोहळ्यात पार्थ पवार यांच्यासोबत कायनात धार हिनेही हजेरी लावली होती. उपमुख्यमंत्री सुनेत्रा पवार यांच्यासोबत पार्थ आणि कायनात यांनी विवाह मंडपात प्रवेश केला, ज्याचे फोटो आणि व्हिडिओ सोशल मीडियावर मोठ्या प्रमाणात व्हायरल झाले. या उपस्थितीनंतर राजकीय आणि सामाजिक वर्तुळात या दोन्ही कुटुंबांमधील नव्या नात्याबाबत जोरदार चर्चा सुरू झाली होती, ज्यावर आता साखरपुड्याच्या घोषणेने अधिकृत शिक्कामोर्तब झाले आहे.
कोण आहे कायनात धार? पवार कुटुंबाशी असलेले जिव्हाळ्याचे संबंध
पवार कुटुंबाची होणारी होणारी सून म्हणजेच कायनात धार ही मूळची हरियाणा राज्यातील असून, सध्या ती आपल्या कुटुंबासह देशाची राजधानी दिल्ली येथे वास्तव्यास आहे. कायनात आणि पवार कुटुंबाचे संबंध केवळ राजकीय नसून ते अत्यंत कौटुंबिक आणि जिव्हाळ्याचे असल्याचे सांगितले जाते. गेल्या काही काळापासून कायनात धार हिला पार्थ पवार यांच्यासोबत अनेक सार्वजनिक आणि धार्मिक कार्यक्रमांमध्ये एकत्र पाहिले गेले आहे. काही महिन्यांपूर्वी पार्थ पवार आणि कायनात धार यांनी मध्य प्रदेशातील प्रसिद्ध उज्जैनच्या महाकाल मंदिरात जाऊन एकत्र दर्शन व विशेष पूजाअर्चना केली होती. त्यावेळी त्यांचे पारंपरिक पोषाखातील फोटो इंटरनेटवर प्रचंड व्हायरल झाले होते.
सुख-दुःखात खंबीर साथ; कौटुंबिक ऋणानुबंध
कायनात धार ही केवळ पवार कुटुंबाच्या आनंदाच्या किंवा उत्सवाच्या प्रसंगातच नाही, तर अत्यंत कठीण आणि दुःखाच्या काळातही कुटुंबाच्या पाठीशी खंबीरपणे उभी राहिलेली पाहायला मिळाली आहे. काही काळापूर्वी ज्येष्ठ नेते अजित पवार यांच्या दुःखद निधनानंतर, कायनात धार तात्काळ बारामती येथे पोहोचली होती आणि तिने पवार कुटुंबाचे सांत्वन केले होते. इतकेच नव्हे तर, मुंबईतील वरळी येथे आयोजित करण्यात आलेल्या शोकसभा आणि दशक्रिया विधीच्या धार्मिक कार्यातही ती पूर्ण वेळ उपस्थित होती. कुटुंबाप्रती असलेले हेच समर्पण आणि आदर पाहून पवार कुटुंबीयांनी या नात्याला होकार दिल्याचे बोलले जाते.
२९ जुलै रोजी पुण्यात रंगणार शाही साखरपुडा-
अधिकच्या माहितीनुसार, २९ जुलै रोजी पुण्यात होणारा हा साखरपुडा सोहळा अत्यंत भव्य परंतु कौटुंबिक वातावरणात पार पडणार आहे. या सोहळ्यासाठी पवार कुटुंबातील सर्व ज्येष्ठ मंडळी, नातेवाईक आणि राजकीय क्षेत्रातील निवडक अतिथी उपस्थित राहण्याची शक्यता आहे.
