Vinayak Raut : शिवसेना (उद्धव बाळासाहेब ठाकरे) पक्षाचे ज्येष्ठ नेते विनायक राऊत यांच्यासमोरील अडचणींमध्ये कमालीची वाढ झाली आहे. त्यांची सून गिरीजा राऊत यांनी दाखल केलेल्या गंभीर तक्रारीनंतर विनायक राऊत आणि त्यांचे सुपुत्र गितेश राऊत यांच्याविरोधात गुन्हा नोंदवण्यात आला होता. कौटुंबिक छळ आणि जादूटोणा विरोधी कायद्यांतर्गत दाखल झालेल्या या गुन्ह्याप्रकरणी आता ठाणे न्यायालयातून एक अत्यंत महत्त्वाची आणि मोठी कायदेशीर अपडेट समोर आली आहे. न्यायालयाने राऊत पिता-पुत्राला तूर्तास कोणताही अंतरिम दिलासा देण्यास स्पष्ट नकार दिला आहे.
या प्रकरणातील मुख्य संशयित आरोपी विनायक राऊत आणि गितेश राऊत यांच्या अटकपूर्व जामीन अर्जावर अद्याप न्यायालयाकडून अंतिम निर्णय झालेला नाही. मात्र, या मुख्य अर्जावर अंतिम सुनावणी पूर्ण होईपर्यंत पोलिसांनी आपल्यावर कोणतीही अटकेची कारवाई करू नये, अशी कायदेशीर मागणी करणारा एक विशेष ‘अंतरिम अर्ज’ राऊत यांच्या वतीने न्यायालयात सादर करण्यात आला होता. ठाणे न्यायालयाने हा अंतरिम अर्ज फेटाळून लावला आहे. त्यामुळे मुख्य जामीन अर्जावरील निकाल प्रलंबित असला, तरीही कोर्टाने तात्पुरते संरक्षण नाकारल्यामुळे विनायक राऊत यांच्यावर अटकेची टांगती तलवार कायम आहे. ठाण्यातील कापूरबावडी पोलीस या प्रकरणात राऊत पिता-पुत्राला चौकशीसाठी कधीही ताब्यात घेऊ शकतात, अशी परिस्थिती निर्माण झाली आहे.
या कायदेशीर घडामोडींबाबत अधिक माहिती देताना फिर्यादी गिरीजा राऊत यांचे विधी सल्लागार ॲडव्होकेट सागर कदम यांनी सांगितले की, या गुन्ह्यामध्ये लावण्यात आलेली दोन कलमे ही अजामीनपात्र (Non-Bailable) स्वरूपाची आहेत. त्यामुळे तपास अधिकाऱ्यांना जर या प्रकरणात ठोस आणि सबळ पुरावे आढळले, तर पोलीस न्यायालयाच्या अंतिम सुनावणीपूर्वी देखील कायदेशीररीत्या अटक करू शकतात. न्यायालयाच्या या कडक भूमिकेनंतर फिर्यादी गिरीजा राऊत यांनी समाधान व्यक्त केले असून, पोलीस प्रशासनाने आता आरोपींवर तात्काळ कारवाई करावी, अशी मागणी केली आहे. तसेच राज्याचे मुख्यमंत्री देवेंद्र फडणवीस यांनी स्वतः या संवेदनशील प्रकरणात गांभीर्याने लक्ष घालून आपल्याला लवकरात लवकर न्याय मिळवून द्यावा, अशी आर्त हाकही त्यांनी दिली आहे. गुन्हा दाखल झाल्यापासून सासरच्या मंडळींनी आपल्याशी कोणताही संपर्क साधला नसल्याचेही त्यांनी आवर्जून सांगितले.
या खळबळजनक प्रकरणाची पाळेमुळे थेट जादूटोणा आणि भोंदूगिरीशी जोडलेली आहेत. माजी खासदार विनायक राऊत, त्यांचे सुपुत्र गितेश राऊत आणि इतर कुटुंबीयांनी मिळून आपला शारीरिक व मानसिक छळ केल्याची तक्रार गिरीजा यांनी कापूरबावडी पोलीस ठाण्यात दिली होती. या छळवणुकी दरम्यान सासरच्या लोकांनी काही भोंदू बाबांचा आश्रय घेऊन आपल्यावर अघोरी प्रथा आणि जादूटोणा केल्याचा अत्यंत गंभीर आरोप सुनेने केला आहे.
