FIFA World Cup 2026 Final: जगभरातील क्रीडाप्रेमींचे डोळे लागून राहिलेल्या फिफा विश्वचषक 2026 चा थरार आता अंतिम टप्प्यात पोहोचला आहे. अमेरिका, कॅनडा आणि मेक्सिको या तीन देशांमध्ये गेल्या काही आठवड्यांपासून सुरू असलेल्या फुटबॉलच्या या महाकुंभाचा रविवारी रात्री (भारतीय वेळेनुसार सोमवारी पहाटे) महाअंतिम सामना खेळवला जाणार आहे. या ब्लॉकबस्टर लढतीत गतविजेता अर्जेंटिना आणि युरोपियन पॉवरहाऊस स्पेन हे दोन बलाढ्य संघ समोरासमोर ठाकणार आहेत.
स्पेनने उपांत्य फेरीत फ्रान्सचा 2-0 असा पराभव करत दिमाखात अंतिम फेरीत प्रवेश केला आहे. दुसरीकडे, लिओनेल मेस्सीच्या नेतृत्वाखालील गतविजेत्या अर्जेंटिनाने अटीतटीच्या सामन्यात इंग्लंडला 2-1 ने धूळ चारत सलग दुसऱ्यांदा जेतेपदावर नाव कोरण्याच्या इराद्याने अंतिम फेरीत धडक दिली आहे.
इतिहासाची पुनरावृत्ती होणार की नवा इतिहास रचला जाणार?
दोन्ही देशांच्या विश्वचषकातील प्रवासावर आणि इतिहासावर नजर टाकल्यास खालील रंजक आकडेवारी समोर येते:
- अर्जेंटिनाचे चौथे लक्ष्य: अर्जेंटिनाने यापूर्वी 1978, 1986 आणि 2022 मध्ये विश्वचषक जिंकला आहे. आता ते आपल्या चौथ्या जेतेपदाचा शोध घेत आहेत.
- स्पेनचे दुसरे स्वप्न: स्पॅनिश संघ आपल्या फुटबॉल इतिहासातील दुसऱ्या विश्वचषक ट्रॉफीवर नाव कोरण्यासाठी सज्ज झाला आहे.
- आमनेसामने रेकॉर्ड: फिफा विश्वचषकाच्या प्रदीर्घ इतिहासात स्पेन आणि अर्जेंटिना हे संघ फक्त एकदाच एकमेकांसमोर आले आहेत. 1966 च्या विश्वचषकात झालेल्या त्या एकमेव सामन्यात अर्जेंटिनाने 2-1 ने बाजी मारली होती.
भारतातील क्रीडाप्रेमींसाठी मॅच टाईमिंग आणि मैदानाची माहिती
भारतीय फुटबॉल चाहत्यांसाठी हा सामना पाहण्याचे संपूर्ण शेड्युल खालीलप्रमाणे आहे:
- सामन्याची तारीख: भारतीय वेळेनुसार (IST) हा अंतिम सामना सोमवार, 20 जुलै रोजी खेळवला जाईल.
- सामन्याची वेळ: हा हायव्होल्टेज सामना भारतीय वेळेनुसार मध्यरात्री 12:30 वाजता सुरू होईल.
- मैदान (व्हेन्यू): या ऐतिहासिक महामुकाबल्याचे यजमानपद ‘न्यू यॉर्क न्यू जर्सी स्टेडियम’ भूषवणार आहे.
भारतात कुठे आणि कसा पाहाता येणार लाईव्ह सामना?
भारतीय चाहत्यांना हा सामना टीव्ही आणि मोबाईलवर थेट पाहण्यासाठी वेगवेगळ्या सुविधा उपलब्ध करून देण्यात आल्या आहेत:
इतर पर्याय: युनायटेड8 वाहिन्या जिओ फायबर युजर्ससाठी विनामूल्य उपलब्ध आहेत, तर टाटा प्ले वापरकर्ते विशिष्ट सबस्क्रिप्शन पॅक किंवा पेड अॅड-ऑनद्वारे या वाहिन्यांचा आनंद घेऊ शकतात.
मोफत प्रसारण (टीव्ही): जर तुम्हाला टीव्हीवर हा सामना अगदी मोफत पाहायचा असेल, तर भारतात दूरदर्शन स्पोर्ट्स (DD Sports) वाहिनीवर याचे थेट प्रक्षेपण केले जाईल.
लाईव्ह स्ट्रीमिंग (मोबाईल): मोबाईल किंवा टॅबलेटवर डिजिटल पद्धतीने सामना पाहणाऱ्यांसाठी ‘झी5’ (ZEE5) अॅपवर या सामन्याचे थेट प्रक्षेपण (लाईव्ह स्ट्रीमिंग) उपलब्ध असेल.
