GST Price Cut: सरकारने ग्राहकांवरील आर्थिक भार कमी करण्यासाठी अनेक जीवनावश्यक वस्तू आणि घरगुती सामानांवरील जीएसटी दरात कपात केली आहे. मात्र, अनेक ग्राहकांनी तक्रार केली आहे की, त्यांना दुकानांमध्ये किंवा ई-कॉमर्स प्लॅटफॉर्मवर किमती कमी झाल्याचे दिसून आले नाही.
जर तुम्हालाही वस्तू खरेदी करताना आधीप्रमाणेच अतिरिक्त जीएसटी आकारला जात असेल तर तुम्ही त्याबाबत तक्रार करू शकता.
सरकारची भूमिका आणि ग्राहकांची नाराजी
कर कपात आणि प्रत्यक्षात आकारल्या जाणाऱ्या किमतींमध्ये मोठी तफावत दिसून येत आहे, त्यामुळे या फायद्याचा लाभ अंतिम ग्राहकांपर्यंत पोहोचत नाहीये, अशी चिंता व्यक्त होत आहे. ऑनलाइन विक्रेते आणि दुकानांविरोधात मोठ्या प्रमाणात तक्रारी येत आहेत.
ग्राहकांचे म्हणणे आहे की, कागदोपत्री जीएसटीचे दर कमी झाले असले तरी, त्याचा फायदा त्यांच्या खिशाला झालेला नाही. यामुळे सरकारने आता स्वतः यामध्ये लक्ष घालण्याचा निर्णय घेतला आहे. सरकारने याची खात्री केली आहे की, जीएसटी कपातीचा फायदा पूर्णपणे ग्राहकांना मिळेल.
अशी करा तक्रार
तुम्हाला जर असे वाटत असेल की तुमच्याकडून जास्त पैसे आकारले गेले आहेत, तर तुम्ही राष्ट्रीय ग्राहक हेल्पलाइन (National Consumer Helpline – NCH) वर तुमची तक्रार दाखल करू शकता.
तक्रार नोंदवण्यासाठी अनेक पर्याय उपलब्ध आहेत. ग्राहक 1915 या राष्ट्रीय ग्राहक हेल्पलाइनवर फोन करू शकतात. याशिवाय, तुम्ही अधिकृत वेबसाइट, मोबाईल ॲप, ईमेल किंवा व्हॉट्सअॅप वापरूनही तुमची तक्रार नोंदवू शकता. तक्रार प्रक्रिया सोपी करण्यासाठी, ती 17 वेगवेगळ्या भाषांमध्ये दाखल करता येते.
हे देखील वाचा – पोलिसांनी अडवली फ्रेंच राष्ट्राध्यक्षांची गाडी, मॅक्रॉन यांनी थेट ट्रम्प यांना लावला फोन; व्हिडिओ व्हायरल
