Upcoming IPO: कमाईची मोठी संधी! पुढच्या आठवड्यात बाजारात येणार ‘हे’ 7 नवे आयपीओ; पाहा संपूर्ण यादी

Upcoming IPO: शेअर बाजारात नफा कमावण्याची इच्छा असणाऱ्या गुंतवणूकदारांसाठी पुढील आठवडा अत्यंत गजबजलेला आणि कमाईच्या संधी घेऊन येणारा ठरणार आहे. बाजारात एकाच वेळी 7 नवीन आयपीओ दाखल होणार आहेत. यामध्ये सर्वसामान्य गुंतवणूकदारांसाठी असणारे मेनबोर्ड आणि छोट्या कंपन्यांचे एसएमई अशा दोन्ही श्रेणीतील पर्यायांचा समावेश आहे.

पुढील आठवड्यात गल्फ लॉयड्स, मेटालिक टेक्नोफोर्ज, क्यूब हायवेज ट्रस्ट, श्री बालाजी टेक्सटाइल्स, एक्सट्रानेट टेक्नॉलॉजीज, इंडो-एमआयएम आणि लोहिया कॉर्प या कंपन्या आपले समभाग बाजारात विक्रीसाठी आणणार आहेत. यापैकी काही कंपन्यांच्या शेअर्सना ग्रे मार्केटमध्ये आत्तापासूनच मोठी मागणी असून त्यांचा प्रीमियम चांगलाच वाढला आहे.

पुढील आठवड्यात येणाऱ्या 3 एसएमई आयपीओंचा सविस्तर तपशील

छोट्या कंपन्यांच्या श्रेणीतील (एसएमई) तीन आयपीओंचे वेळापत्रक आणि किंमत खालीलप्रमाणे आहे:

• गल्फ लॉयड्स (इंडिया): हा आयपीओ 20 जुलै रोजी गुंतवणूकदारांसाठी खुला होईल आणि 22 जुलै रोजी बंद होईल. याच्या एका शेअरची किंमत 100 रुपये निश्चित करण्यात आली असून, 1200 शेअर्सचा एक लॉट आहे. नियमानुसार किरकोळ गुंतवणूकदारांना किमान 2 लॉटसाठी अर्ज करावा लागेल. सध्या याचा ग्रे मार्केट प्रीमियम (GMP) 15 रुपये सुरू आहे.
• मेटालिक टेक्नोफोर्ज: हा आयपीओ 21 जुलै ते 23 जुलै या काळात खुला राहील. यासाठी 72 ते 77 रुपये प्रति शेअरचा प्राईस बँड ठरवण्यात आला असून, लॉट साईज 1600 शेअर्सची आहे. सध्या याचा प्रीमियम 0 रुपयांवर आहे.
• श्री बालाजी (माला) टेक्सटाइल्स लिमिटेड: या कंपनीचा आयपीओ 22 जुलै रोजी उघडून 24 जुलै रोजी बंद होईल. 65 ते 70 रुपये प्रति शेअर किंमत असलेल्या या आयपीओमध्ये 2000 शेअर्सचा एक लॉट आहे. बाजारात याचा प्रीमियम सध्या 10 रुपये सुरू आहे.

४ मोठ्या मेनबोर्ड आयपीओंचे शेड्युल आणि ग्रे मार्केटमधील स्थिती

मोठ्या श्रेणीतील (मेनबोर्ड) चार महत्त्वाच्या कंपन्यांची माहिती खालीलप्रमाणे आहे:

1. क्यूब हायवेज ट्रस्ट: हा आयपीओ 22 जुलै रोजी सुरू होऊन 24 जुलै रोजी बंद होईल. यासाठी 151 ते 152 रुपयांचा प्राईस बँड असून, गुंतवणूकदारांना किमान 95 युनिट्ससाठी अर्ज करावा लागेल. सध्या याचा प्रीमियम 0 रुपयांवर स्थिर आहे.
2. एक्सट्रानेट टेक्नॉलॉजीज: या आयपीओमध्ये गुंतवणूक करण्यासाठी 23 जुलै ते 27 जुलै हा कालावधी असेल. 120 ते 127 रुपयांचा प्राईस बँड असलेल्या या आयपीओची लॉट साईज 110 शेअर्सची आहे. बाजारात याचा प्रीमियम सध्या 25 रुपये आहे.
3. इंडो-MIM: हा आयपीओ देखील 23 जुलै रोजी उघडणार असून 27 जुलै रोजी बंद होईल. कंपनीने अद्याप आपल्या शेअर्सची किंमत आणि लॉट साईज जाहीर केलेली नाही. परंतु, ग्रे मार्केटमध्ये या शेअरची प्रचंड हवा असून याचा प्रीमियम तब्बल 166 रुपयांवर पोहोचला आहे.
4. लोहिया कॉर्प: हा आयपीओ 23 जुलै ते 27 जुलै या कालावधीत खुला असणार आहे. या कंपनीनेही आपली किंमत आणि लॉट साईज गुलदस्त्यात ठेवली आहे. सध्या याचा प्रीमियम 0 रुपयांवर आहे.

गुंतवणूकदारांनी कोणत्याही आयपीओमध्ये पैसे लावण्यापूर्वी कंपनीची आर्थिक स्थिती आणि बाजारातील चढ-उतार लक्षात घेऊनच योग्य तो निर्णय घ्यावा.