Jantar Mantar Violence: राजधानी दिल्लीतील जंतरमंतर परिसरात सुरू असलेल्या आंदोलनाने पुन्हा एकदा हिंसक वळण घेतले आहे. बुधवारी रात्री कॉकरोच जनता पार्टीच्या (CJP) कार्यकर्त्यांनी आणि आंदोलकांनी सुरक्षारक्षकांवर केलेल्या भीषण हल्ल्यात दिल्ली पोलिसांचे दोन सहाय्यक आयुक्त (ACP), दोन निरीक्षक आणि इतर काही पोलीस कर्मचारी गंभीर जखमी झाले आहेत.
कनेक्ट प्लेस जवळील टॉल्स्टॉय मार्गावर रात्री 8:30 वाजताच्या सुमारास ही घटना घडली. परिस्थिती नियंत्रणात आणण्यासाठी रॅपिड ॲक्शन फोर्स (RAF) आणि पोलिसांना सौम्य लाठीमार करावा लागला, तसेच अश्रूधुराच्या नळकांड्या फोडाव्या लागल्या.
दगडफेक, बाटल्या अन् पोलिसांना घेराव; परिस्थिती तणावपूर्ण
दिल्ली पोलिसांनी दिलेल्या माहितीनुसार, जंतरमंतरवर जमा झालेले आंदोलक अचानक टॉल्स्टॉय मार्गाच्या दिशेने चालून गेले. परिस्थिती हाताबाहेर गेल्याची मुख्य कारणे खालीलप्रमाणे आहेत:
- पोलिसांवर तुफान दगडफेक: जमावातील उपद्रवी घटकांनी पोलिसांवर दगड आणि काचेच्या बाटल्या फेकण्यास सुरुवात केली. यात एसीपी विवेक भगत जखमी झाले असून त्यांना राम मनोहर लोहिया (RML) रुग्णालयात दाखल करण्यात आले आहे.
- जवानाला मॉब लिंचिंगचा प्रयत्न: एका पोलीस कर्मचाऱ्याला चारी बाजूंनी वेढून त्याला बेदम मारहाण करण्यात आली आणि त्याला जीवे मारण्याचा प्रयत्न करण्यात आल्याचा दावा पोलिसांनी केला आहे.
- तलवारी आणि काठ्यांचा वापर: आंदोलकांपैकी काही जणांकडे काठ्या, तलवारी आणि खुकरी सारखी धोकादायक शस्त्रे होती.
आयोजकांनी आवाहन करूनही आंदोलक ऐकण्याच्या मानसिकतेत नव्हते, ज्यामुळे पोलिसांना बळाचा वापर करावा लागला.
‘तटस्थ ठिकाणीच चर्चा करू’; सीजेपीची केंद्राला नवी अट
हिंसाचाराच्या या घटनेदरम्यान सीजेपीचे मुख्य प्रवक्ते सौरव दास यांनी पक्षाची भूमिका स्पष्ट केली. केंद्रीय मंत्री जे. पी. नड्डा यांनी आपल्या निवासास्थानी चर्चेचे निमंत्रण दिले होते, जे सीजेपीने फेटाळून लावले आहे.
पक्षप्रवक्त्याने सांगितले की, सरकारला चर्चा करायची असेल तर ती कोणत्याही मंत्र्याच्या घरी किंवा कार्यालयात न होता एखाद्या तटस्थ ठिकाणी झाली पाहिजे. तसेच आंदोलनात सहभागी झालेल्या विद्यार्थ्यांवर आणि तरुणांवर कोणतेही नवे गुन्हे (FIR) दाखल होणार नाहीत, अशी अधिकृत हमी सरकारने द्यावी, अशी मागणीही त्यांनी केली.
आंदोलनाचा नवा टप्पा; 5 राज्यांत निदर्शने तीव्र
नीट (NEET) परीक्षा घोळ आणि पेपरफुटी प्रकरणावरून केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी 20 जूनपासून हे आंदोलन सुरू आहे. सामाजिक कार्यकर्ते सोनम वांगचुक उपोषणाला बसल्यानंतर या आंदोलनाला मोठी गती मिळाली आहे.
- देशभरात पडसाद: दिल्लीतील या आंदोलनाचे पडसाद आता बिहार, तमिळनाडू, गोवा, महाराष्ट्र आणि राजस्थानमध्ये उमटू लागले आहेत. पाटना येथे राज्यपालांच्या निवासाकडे जाणाऱ्या आंदोलकांवर पोलिसांनी पाण्याचे फवारे आणि लाठीमार केला.
- न्यायालयाचे निर्देश: दिल्ली उच्च न्यायालयाने आंदोलकांवर झालेल्या पोलीस कारवाईच्या याचिकेवर केंद्र आणि पोलिसांना उत्तर मागितले असून घटनेचे सर्व सीसीटीव्ही (CCTV) फुटेज जतन करण्याचे निर्देश दिले आहेत.
सध्या जंतरमंतर आणि लगतच्या सर्व रस्ते बंद करण्यात आले असून मोठ्या प्रमाणावर कडक सुरक्षा व्यवस्था तैनात करण्यात आली आहे.
