E85 Fuel India: भारतीय वाहन क्षेत्रासाठी एक मोठी आणि महत्त्वाची बातमी समोर येत आहे. सध्या वापरात असलेल्या 20% इथेनॉल मिश्रित पेट्रोलच्या (E20) यशानंतर आता भारत सरकार थेट E85 इंधन लाँच करण्याच्या तयारीत आहे.
या इंधनामध्ये 85% इथेनॉल आणि केवळ 15% पेट्रोल असणार आहे. मध्य पूर्वेतील युद्धामुळे ओढवलेल्या जागतिक तेल संकटामुळे भारत आता आयातीवरील अवलंबित्व कमी करण्यासाठी हे मोठे पाऊल उचलत आहे.
E85 Fuel India: काय आहे E85 इंधन?
E85 हे एक प्रकारचे ‘फ्लेक्स फ्युएल’ आहे. केंद्र सरकार (Central Government) लवकरच यासंदर्भातील मसुदा नियम प्रसिद्ध करणार आहे. हे इंधन सध्याच्या E20 पेट्रोलपेक्षा वेगळे असेल. भारतात उत्पादित होणारे ऊस, मका आणि धान्यापासून तयार होणारे इथेनॉल हे अक्षय ऊर्जेचा स्रोत असून ते पेट्रोलपेक्षा स्वच्छ जळते, ज्यामुळे पर्यावरणाचे प्रदूषण कमी होते.
E85 Fuel India: गाड्यांच्या इंजिनमध्ये होणार बदल
E85 इंधन वापरण्यासाठी गाड्यांच्या इंजिनमध्ये काही तांत्रिक बदल करावे लागतील. सध्याची साधी पेट्रोल इंजिने एवढ्या मोठ्या प्रमाणात अल्कोहोल सहन करू शकत नाहीत. जर साध्या इंजिनमध्ये हे इंधन वापरले तर इंजिन गंजण्याची किंवा खराब होण्याची शक्यता असते. त्यामुळे कंपन्यांना आता विशेष ‘फ्लेक्स-फ्युएल व्हेईकल’ (FFV) तयार करावे लागतील.
केंद्रीय रस्ते वाहतूक मंत्री नितीन गडकरी (Nitin Gadkari) यांनी आधीच 100% इथेनॉलवर चालणाऱ्या टोयोटा गाडीचे प्रदर्शन करून या तंत्रज्ञानाची ताकद दाखवून दिली आहे.
E85 Fuel India: शेतकऱ्यांना आणि देशाला फायदा
भारत आपल्या गरजेच्या सुमारे 90% कच्चे तेल आयात करतो. इथेनॉलचे उत्पादन देशातच होत असल्याने कच्च्या तेलाची आयात कमी होऊन परकीय चलनाची मोठी बचत होईल. तसेच, इथेनॉल उत्पादनामुळे शेतकऱ्यांच्या उत्पादनाला चांगला भाव मिळेल आणि रोजगाराच्या नवीन संधी निर्माण होतील.
पुढील 2 वर्षांत हे इंधन देशभरातील पेट्रोल पंपावर उपलब्ध करून देण्याचे सरकारचे उद्दिष्ट आहे. यासाठी पेट्रोल पंपावर वेगळ्या नोजल आणि साठवणूक यंत्रणेची गरज भासणार आहे.
हे देखील वाचा – Mumbai Traffic Viral Video: ‘इथून चालते व्हा!’ मुंबईत ट्रॅफिकचा खोळंबा केल्याने महिलेने भाजपच्या मंत्र्यांना भररस्त्यात झापले; पाहा व्हिडिओ
