IndiGo Flight Power Bank Fire : चंदीगड येथील शहीद भगतसिंग आंतरराष्ट्रीय विमानतळावर इंडिगोच्या विमानात एका प्रवाशाच्या पॉवर बँकचा स्फोट झाल्याने नागरिकांमध्ये भीती पसरली. या घटनेनंतर विमानातील 198 प्रवाशांना आपत्कालीन दरवाजातून बाहेर काढण्यात आले. या धावपळीत एका महिला प्रवाशाच्या घोट्याला दुखापत झाली आहे.
IndiGo Flight Power Bank Fire : नेमकी घटना काय?
मिळालेल्या माहितीनुसार, इंडिगोचे विमानाने (फ्लाईट 6E 108) दुपारी 3.29 वाजता हैदराबादहून चंदीगडला लँडिंग केले होते. विमान धावपट्टीवरून पार्किंग बे कडे जात असतानाच, एका प्रवाशाने त्याच्या पॉवर बँकमधून धूर येत असल्याचे क्रू मेंबर्सच्या लक्षात आणून दिले. सीट पॉकेटमध्ये ठेवलेल्या पाऊचमधील पॉवर बँकचा अचानक स्फोट झाला होता.
विमान कर्मचाऱ्यांनी तातडीने अग्निशमन यंत्राचा (Fire Extinguisher) वापर करून आग विझवली, मात्र तोपर्यंत केबिनमध्ये मोठ्या प्रमाणात धूर पसरला होता. खबरदारीचा उपाय म्हणून सर्व प्रवाशांना विमानाच्या आपत्कालीन स्लाइड्सवरून खाली उतरवण्यात आले.
IndiGo Flight Power Bank Fire : इंडिगोचे अधिकृत पत्रक
या घटनेवर इंडिगोने स्पष्टीकरण दिले आहे. “5 मे 2026 रोजी हैदराबाद-चंदीगड विमानात एका प्रवाशाच्या वैयक्तिक इलेक्ट्रॉनिक उपकरणाला आग लागल्याची घटना घडली. सर्व प्रवाशांची सुरक्षा लक्षात घेऊन तातडीने विमान रिकामे करण्यात आले. विमानाच्या तांत्रिक तपासणीनंतरच ते पुन्हा सेवेत दाखल होईल,” असे एअरलाईन्सने म्हटले आहे.
IndiGo Flight Power Bank Fire : तुमची पॉवर बँक सुरक्षित आहे का? ‘या’ गोष्टी तपासा
पॉवर बँक वापरताना होणाऱ्या दुर्घटना टाळण्यासाठी तज्ज्ञांनी काही महत्त्वाचे सल्ले दिले आहेत:
योग्य केबल: चार्जिंगसाठी नेहमी मूळ (Original) केबल आणि अडॅप्टरचा वापर करा.
प्रमाणित कंपनी: नेहमी नामवंत ब्रँडची आणि सुरक्षा प्रमाणपत्रे (Certifications) असलेलीच पॉवर बँक खरेदी करा.
बॅटरीची स्थिती: जर तुमची पॉवर बँक फुगली असेल किंवा तिला तडे गेले असतील, तर तिचा वापर त्वरित थांबवा.
तापमान: चार्जिंग करताना पॉवर बँक जास्त गरम होत असेल, तर त्यात बिघाड असू शकतो.
ओव्हरचार्जिंग टाळा: पॉवर बँक पूर्ण चार्ज झाल्यावर ती प्लगमधून काढून टाका.
हे देखील वाचा – West Bengal CM Race: बंगालमध्ये भाजपचा ऐतिहासिक विजय! आता मुख्यमंत्री कोण? ‘या’ नावांची जोरदार चर्चा
