TMC Congress Merger: काँग्रेस आणि तृणमूल काँग्रेस या दोन मोठ्या पक्षांचे एकमेकांमध्ये विलीनीकरण होणार असल्याच्या चर्चा राजकीय वर्तुळात रंगल्या होत्या. मात्र, या सर्व चर्चा पूर्णपणे फेटाळण्यात आल्या असून विलीनीकरणाचा असा कोणताही प्रस्ताव विचाराधीन नसल्याचे स्पष्ट करण्यात आले आहे. काँग्रेसचे ज्येष्ठ नेते जयराम रमेश यांनी सोशल मीडिया प्लॅटफॉर्म एक्सवर (X) पोस्ट शेअर करत विलीनीकरणाचे वृत्त चुकीचे आणि तथ्यहीन असल्याचे सांगितले.
पक्षांचे विलीनीकरण होणार नसले तरी आगामी काळातील राजकीय समीकरणांसाठी दोन्ही पक्षांनी युतीचे दरवाजे उघडे ठेवले आहेत. राहुल गांधी आणि तृणमूलचे नेते अभिषेक बॅनर्जी यांच्यात दोन्ही पक्षांमधील समन्वय वाढवण्याबाबत सविस्तर चर्चा झाली आहे. या बैठकीत ‘इंडिया’ आघाडीची पुढील महत्त्वाची बैठक हैदराबाद येथे घेण्यावर दोन्ही नेत्यांचे एकमत झाले आहे.
TMC Congress Merger: ममता बॅनर्जींच्या तृणमूल काँग्रेसमध्ये अभूतपूर्व बंडखोरी
दिल्लीत काँग्रेस नेत्यांनी तृणमूल काँग्रेसच्या सर्वेसर्वा ममता बॅनर्जी यांची भेट घेतल्यानंतर विलीनीकरणाच्या चर्चांना उधाण आले होते. मात्र, याचे मुख्य कारण तृणमूल काँग्रेसमधील अंतर्गत वाद असल्याचे समोर आले आहे. सध्या तृणमूल काँग्रेस पक्षाला मोठ्या बंडखोरीचा सामना करावा लागत असून पक्षातील अनेक लोकप्रतिनिधींनी उघडपणे बंड पुकारले आहे:
- ६४ आमदारांचे बंड: बंडखोर छावणीतील आमदारांची संख्या 58 वरून आता 64 वर पोहोचली असून त्यांनी ममता बॅनर्जी यांच्याविरोधात भूमिका घेतली आहे.
- संसदेतही फूट: केवळ विधानसभेतच नाही तर लोकसभेतील आणि राज्यसभेतील खासदारांमध्येही तीव्र असंतोष निर्माण झाला आहे.
- वेगळ्या आसनव्यवस्थेची मागणी: बंडखोर खासदार काकोली घोष दस्तिदार यांनी सांगितले की, त्यांच्या गटातील 20 खासदारांनी लोकसभेच्या अध्यक्षांकडे संसदेत स्वतंत्र आसनव्यवस्था करण्याची अधिकृत विनंती केली आहे. हे सर्व खासदार पश्चिम बंगालच्या विकासासाठी केंद्र आणि राज्य सरकारसोबत मिळून काम करणार आहेत.
TMC Congress Merger: दिग्गज खासदारांचे राजीनामे आणि ‘खऱ्या’ तृणमूलचा दावा
पक्षांतर्गत वादामुळे तृणमूल काँग्रेसला एकापाठोपाठ एक मोठे धक्के बसत आहेत. राज्यसभेच्या खासदार सुश्मिता देव यांनी आपल्या खासदारकीचा आणि पक्षाच्या प्राथमिक सदस्यत्वाचा राजीनामा दिला. यापूर्वी 8 जून रोजी आणखी एक ज्येष्ठ खासदार सुखेंदु शेखर राय यांनीही आपल्या पदाचा तडकाफडकी राजीनामा दिला होता.
दुसरीकडे, बंडखोर नेते रिताब्रता बॅनर्जी यांनी थेट मूळ पक्षावरच आपला दावा ठोकला आहे. विधानसभा भवनाबाहेर पत्रकारांशी बोलताना त्यांनी जाहीर केले की, “आमच्याकडे पक्षाच्या बहुतांश आमदार आणि खासदारांचे समर्थन असून आमचा गटच खरी तृणमूल काँग्रेस आहे.” तसेच त्यांनी काँग्रेसमध्ये विलीनीकरण करण्याचा आमचा कोणताही विचार नसून आम्ही तृणमूल काँग्रेसच्याच झेंड्याखाली आमचे काम सुरू ठेवू, असे स्पष्ट केले.
हे देखील वाचा – India Protest US Attack: समुद्रात अमेरिकेचा व्यापारी जहाजावर हल्ला; 3 भारतीय बेपत्ता, भारताने अमेरिकन राजदूतांना बजावले समन्स
