R Ashwin Ball Tampering | भारताचा माजी फिरकीपटू रविचंद्रन अश्विनवर तामिळनाडू प्रीमियर लीग (TNPL) मधील सामन्यादरम्यान बॉल टेंपरिंगचा आरोप करण्यात आला आहे. आर अश्विन आणि त्याची टीएनपीएलमध्ये फ्रँचायझी डिंडिगुल ड्रॅगन्स यांच्यावर सिएचेम मदुराई पँथर्स संघाने हे आरोप केले होते. मात्र, नंतर त्यांना आरोपातून मुक्त केले आहे.
सिएचेम मदुराई पँथर्सने केलेले हे आरोप “केवळ अटकळींवर आधारित” असल्याचे सिद्ध झाले असून, याला कोणताही ठोस पुरावा मिळाला नाही.
14 जून रोजी सालेम क्रिकेट फाउंडेशन मैदानावर डिंडिगुल ड्रॅगन्स आणि सिएचेम मदुराई पँथर्स यांच्यातील सामन्यात डिंडिगुलने 9 गडी राखून दणदणीत विजय मिळवला होता. या सामन्यानंतर पँथर्सने ड्रॅगन्सवर रासायनिक प्रक्रिया केलेले टॉवेल वापरून चेंडूशी छेडछाड केल्याचा गंभीर आरोप केला होता. पँथर्सचे सीईओ महेश एस यांनी याला बॉल टेंपरिंग असे संबोधले होते आणि टॉवेलच्या वापराची चौकशी करण्याची मागणी केली होती.
मात्र, TNPL चे सीईओ प्रसन्ना कन्नन यांनी या प्रकरणात कोणतेही गैरकृत्य आढळले नसल्याचे स्पष्ट केले. “प्रश्न उपस्थित झालेले टॉवेल TNCA ने पुरवलेले होते आणि ते दोन्ही संघांना उपलब्ध होते. मैदानावरील पंच आणि सामनाधिकाऱ्यांनी संपूर्ण सामन्यादरम्यान चेंडूवर लक्ष ठेवले होते. खेळादरम्यान कोणतीही तक्रार नोंदवली गेली नाही आणि पँथर्सकडून कोणताही विश्वसनीय पुरावा सादर करण्यात आलेला नाही,” असे कन्नन यांनी निवेदनात म्हटले.
क्रिकेट असोसिएशनने सांगितले की, मैदान ओले असल्यास अशा परिस्थितीत चेंडू सुकवण्यासाठी हे टॉवेल संघांना दिले जातात आणि त्यांचा वापर पंचांच्या देखरेखीखाली होतो. या आरोपांची सत्यता पडताळण्यासाठी एक समिती नेमण्यात आली होती, परंतु व्हिडिओ किंवा फोटोग्राफिक पुराव्यांच्या अभावामुळे यावर पुढील कारवाई न करण्याचा निर्णय घेण्यात आला.
