Smriti Mandhana : भारतीय महिला क्रिकेट संघाने महिला एकदिवसीय वर्ल्ड कप 2025 मध्ये उपांत्य फेरीतील आपले तिकीट निश्चित केले आहे. मुंबईतील डी. वाय. पाटील स्टेडियमवर झालेल्या सामन्यात भारताने न्यूझीलंडचा डकवर्थ-लुईस-स्टर्न (DLS) नियमांनुसार 53 धावांनी पराभव केला. या विजयाचा मुख्य शिल्पकार ठरली ती भारताची स्टार सलामीवीर स्मृती मानधना.
मानधनाने या वर्ल्ड कपमध्ये सातत्याने उत्कृष्ट कामगिरी सुरू ठेवली आहे. तिने न्यूझीलंडविरुद्धच्या या निर्णायक लढतीत आपले 14 वे एकदिवसीय आंतरराष्ट्रीय शतक झळकावले आणि अनेक मोठे रेकॉर्ड्स आपल्या नावावर केले.
95 चेंडूंमध्ये 10 चौकार आणि 4 षटकारांच्या मदतीने तिने 109 धावांची धडाकेबाज खेळी केली.
स्मृती मानधनाने मोडलेले विक्रम:
- महिला क्रिकेटमध्ये दुसरे सर्वाधिक एकदिवसीय शतक: या शतकामुळे, मानधनाने न्यूझीलंडची महान फलंदाज सुझी बेट्स (13 शतके) हिला मागे टाकले. महिलांच्या एकदिवसीय क्रिकेटमध्ये सर्वाधिक शतके करणाऱ्यांच्या यादीत ती आता दुसऱ्या स्थानावर आहे. या यादीत फक्त ऑस्ट्रेलियाची माजी कर्णधार मेग लॅनिंग (15 शतके) तिच्या पुढे आहे.
- एका वर्षात सर्वाधिक एकदिवसीय शतकांचा विक्रम: न्यूझीलंडविरुद्धचे हे शतक मानधनाचे 2025 मधील पाचवे एकदिवसीय शतक होते. एकाच कॅलेंडर वर्षात महिला एकदिवसीय क्रिकेटमध्ये सर्वाधिक शतके करण्याच्या दक्षिण आफ्रिकेच्या तॅझमिन ब्रिट्सच्या विक्रमाशी तिने बरोबरी केली आहे. मानधनाने फक्त 88 चेंडूंमध्ये आपले शतक पूर्ण केले.
- एका वर्षात सर्वाधिक षटकारांचा विक्रम: मानधनाने यावर्षी एकदिवसीय सामन्यांमध्ये 31 षटकार मारून आणखी एक विक्रम आपल्या नावावर केला. तिने 2017 मध्ये लिझेल लीने केलेल्या 28 षटकारांचा जुना विक्रम मोडला. तिच्या आक्रमक फलंदाजीने भारताच्या पावरप्ले आणि मधल्या षटकांच्या धोरणाला नवी दिशा दिली आहे.
- भारतासाठी वर्ल्ड कपमध्ये सर्वाधिक शतकांचा विक्रम: हे शतक मानधनाचे महिला एकदिवसीय वर्ल्ड कपच्या इतिहासातील तिसरे शतक ठरले. यामुळे तिने भारतीय कर्णधार हरमनप्रीत कौरच्या वर्ल्ड कपमध्ये सर्वाधिक शतकांच्या विक्रमाशी बरोबरी साधली आहे.
दरम्यान, या सामन्यात पावसाने व्यत्यय आणल्यामुळे भारताची फलंदाजी 49 षटकांपर्यंतच होऊ शकली. त्यामुळे डकवर्थ-लुईस नियमांनुसार न्यूझीलंडसमोर 44 षटकांत 325 धावांचे मोठे लक्ष्य ठेवण्यात आले.
मात्र, न्यूझीलंडचा संघ 44 षटकांत 8 गडी गमावून केवळ 271 धावांपर्यंतच मजल मारू शकला आणि भारताने निर्णायक विजय मिळवला.
हे देखील वाचा –
