Amla Juice Benefits : आजच्या धकाधकीच्या आणि प्रदूषित वातावरणात स्वतःला फिट ठेवणे ही एक मोठी कसरत झाली आहे. चुकीचा आहार आणि सततचा ताण यामुळे अनेकांचे आरोग्य खालावत चालले आहे. अशा वेळी निसर्गाने आपल्याला दिलेले ‘सुपरफूड’ म्हणजेच आवळा आपल्या मदतीला येऊ शकतो. आवळ्याच्या रसाचा नियमित वापर शरीराला अनेक व्याधींपासून दूर ठेवतो.
आवळ्याचा रस पिण्याचे आरोग्यदायी फायदे:
1. केसांच्या समस्यांवर रामबाण उपाय
आजकाल केस गळणे किंवा अकाली पांढरे होणे या समस्यांनी अनेकजण त्रस्त आहेत. आवळ्याच्या रसात मुबलक प्रमाणात व्हिटॅमिन C आणि अँटीऑक्सिडंट्स असतात. हे घटक केसांच्या मुळांना पोषण देऊन केस गळती थांबवतात आणि केसांची वाढ वेगाने करण्यास मदत करतात.
2. किडनीचे आरोग्य राहते उत्तम
शरीरातील विषारी द्रव्ये बाहेर काढण्यासाठी आवळ्याचा रस अत्यंत गुणकारी मानला जातो. जर तुम्हाला किडनीशी संबंधित तक्रारी असतील किंवा किडनी निरोगी ठेवायची असेल, तर रोजच्या आहारात याचा समावेश करणे फायद्याचे ठरते. हे नैसर्गिक पेय किडनीच्या कार्याला गती देते.
3. रोगप्रतिकारशक्तीमध्ये होते वाढ
ज्यांची प्रतिकारशक्ती कमी आहे, त्यांना वारंवार सर्दी-खोकल्यासारखे संसर्ग होतात. आवळ्यातील व्हिटॅमिन C शरीराची नैसर्गिक संरक्षण प्रणाली मजबूत करते. विशेषतः बदलत्या ऋतूमध्ये संसर्गजन्य आजारांपासून वाचण्यासाठी आवळा रस हा एक उत्तम नैसर्गिक पर्याय आहे.
4. हृदयाचे आरोग्य जपण्यासाठी प्रभावी
हृदयविकाराचा धोका कमी करण्यासाठी आवळ्याचा रस महत्त्वाची भूमिका बजावतो. हे पेय शरीरातील खराब कोलेस्ट्रॉलची पातळी कमी करते आणि रक्तभिसरण प्रक्रिया सुधारते. यामुळे रक्तदाब नियंत्रणात राहण्यास मदत होऊन हृदयाचे कार्य सुरळीत चालते.
5. पचनसंस्थेच्या तक्रारी होतात दूर
जंक फूड आणि अनियमित जेवणामुळे पोटाचे विकार वाढले आहेत. नियमितपणे आवळ्याचा रस घेतल्यास पचन सुधारते. प्राण्यांवरील एका संशोधनानुसार, आवळा हा पोटातील पीळ, पेटके आणि अस्वस्थता कमी करण्यास मदत करतो, ज्यामुळे पोटाचे आरोग्य सुधारते.
