Intermittent Fasting: आजकाल आरोग्य आणि फिटनेसच्या जगात इंटरमिटेंट फास्टिंगची प्रचंड क्रेझ पाहायला मिळत आहे. ठराविक तासांच्या चौकटीतच जेवणे आणि उर्वरित वेळ उपाशी राहणे, अशी या डाएटची सोपी पद्धत आहे. यामुळे शरीरातील कॅलरीज कमी होतात आणि साठलेली चरबी जळण्यास मदत होते.
ऐकायला हे जितके सोपे वाटते, तितकेच ते प्रत्यक्षात आणणे कठीण असू शकते. केवळ सोशल मीडियावरील ट्रेंड पाहून अनेक लोक आरोग्याचा विचार न करता अंधाधुंदपणे हे फास्टिंग सुरू करतात. मात्र, हा डाएट प्रकार प्रत्येकासाठी योग्य नसून काही विशिष्ट गटांनी यापासून दूर राहणेच फायदेशीर आहे.
Intermittent Fasting: इंटरमिटेंट फास्टिंग कोणासाठी फायदेशीर?
प्रत्येक व्यक्तीच्या शरीराची पचनसंस्था आणि गरज वेगवेगळी असते. काही लोकांसाठी हा डाएट प्लॅन नक्कीच चांगला ठरू शकतो:
- पचनसंस्थेला विश्रांती: यामुळे पचनसंस्थेला काही काळासाठी विश्रांती मिळते, ज्यामुळे पोटाचे आरोग्य सुधारू शकते.
- मेटाबॉलिझममध्ये सुधारणा: योग्य पद्धतीने फास्टिंग केल्यास चयापचय क्रिया म्हणजेच मेटाबॉलिझमचा वेग चांगला राहतो.
- पोट फुगण्याच्या समस्येपासून सुटका: काही जणांना यामुळे पोट फुगणे किंवा गॅस होण्याच्या त्रासापासून आराम मिळतो.
वजन कमी करणे, रक्तातील साखर नियंत्रणात ठेवणे आणि पचनक्रिया सुरळीत करणे यासाठी अनेकांना याचा फायदा होतो, परंतु हे फायदे सरसकट सर्वांनाच मिळतील असे नाही.
Intermittent Fasting: ‘या’ लोकांनी चुकूनही करू नये फास्टिंग
दीर्घकाळ उपाशी राहिल्यामुळे शरीरावर विपरीत परिणाम होऊ शकतात. खालील आरोग्य समस्या किंवा परिस्थिती असलेल्या लोकांनी डॉक्टरांच्या सल्ल्याशिवाय हे फास्टिंग सुरू करू नये:
- मधुमेह आणि अल्सरचे रुग्ण: ज्यांना मधुमेह आहे किंवा पोटात अल्सर आणि अॅसिडिटीचा तीव्र त्रास आहे, त्यांनी उपाशी राहणे टाळावे.
- गर्भवती आणि स्तनदा माता: गरोदर महिला आणि लहान बाळांना दूध पाजणाऱ्या मातांना अतिरिक्त पोषणाची गरज असते, त्यामुळे त्यांनी असे डाएट करू नये.
- लहान मुले आणि वृद्ध: वाढत्या वयातील मुले आणि ज्येष्ठ नागरिकांच्या शरीराची गरज वेगळी असल्याने त्यांना याचा त्रास होऊ शकतो.
- यकृत आणि पोटाचे जुने आजार: यकृताचे गंभीर आजार असणारे किंवा नियमित औषधोपचार सुरू असणाऱ्या रुग्णांसाठी दीर्घकाळ उपाशी राहणे घातक ठरू शकते.
अनेकदा जेवण टाळल्याने शरीरातील ऊर्जेची पातळी अचानक कमी होते. त्यामुळे अॅसिडिटी, डोकेदुखी, चक्कर येणे, अशक्तपणा आणि बद्धकोष्ठता यांसारखे त्रास सुरू होऊ शकतात.
Intermittent Fasting: वेळेपेक्षा अन्नाचा दर्जा जास्त महत्त्वाचा
तज्ज्ञांच्या मते, तुम्ही किती वेळ उपाशी राहता यापेक्षा तुम्ही काय खाता याला जास्त महत्त्व आहे. जर तुम्ही जेवणाच्या ठराविक वेळेत भरपूर जंक फूड, तळलेले पदार्थ किंवा गोड फराळ खात असाल, तर फास्टिंगचा कोणताही फायदा शरीराला होणार नाही.
फास्टिंग करताना देखील शरीराला हायड्रेट ठेवणे गरजेचे आहे. यासाठी पुरेसे पाणी पिणे, ताजी फळे, भाज्या, प्रोटीन आणि फायबरयुक्त पदार्थांचा आहारात समावेश करणे आवश्यक आहे. योग्य आहाराशिवाय केवळ वेळेचे गणित पाळल्यास आरोग्याचे नुकसानच जास्त होते.
हे देखील वाचा – Petrol Diesel Price Hike: पेट्रोल-डिझेलच्या किमतीत पुन्हा मोठी वाढ! गेल्या 10 दिवसांत तिसऱ्यांदा झटका
