Nikhil Kamath Reading List: भारतातील सर्वात मोठ्या ब्रोकरेज प्लॅटफॉर्मपैकी एक असलेल्या ‘झेरोधा’चे सह-संस्थापक निखिल कामथ हे केवळ त्यांच्या व्यावसायिक यशासाठीच नव्हे, तर त्यांच्या अभ्यासू वृत्तीसाठीही ओळखले जातात.
अर्थशास्त्र, इतिहास, मानवी स्वभाव आणि सत्ता या विषयांमध्ये त्यांना विशेष रस आहे. नुकतीच त्यांनी वाचकांसाठी अशा ७ पुस्तकांची यादी जाहीर केली आहे, ज्यांनी पैसा, राजकारण आणि मानसशास्त्र याविषयीची त्यांची समज अधिक समृद्ध केली आहे.
निखिल कामथ यांच्या मते, ही पुस्तके कोणतीही ‘शॉर्टकट’ आर्थिक गुपिते सांगत नाहीत, तर समाज कसा चालतो, लोक निर्णय कसे घेतात आणि व्यवस्था कशी विकसित होते यावर प्रकाश टाकतात.
निखिल कामथ यांनी सुचवलेली ‘ही’ ७ महत्त्वाची पुस्तके
जर तुम्हाला पैशांचे व्यवहार आणि माणसाचे मन समजून घ्यायचे असेल, तर कामथ यांच्या यादीतील खालील पुस्तके तुमच्या संग्रही असायला हवीत:
१. डेंग शिआओपिंग अँड द ट्रान्सफॉर्मेशन ऑफ चायना (Ezra F. Vogel): चीनचे नेते डेंग शिआओपिंग यांनी एका गरीब देशाला जागतिक आर्थिक महासत्तेत कसे बदलले, याचे उत्कृष्ट वर्णन या चरित्रात आहे. नेतृत्व आणि धोरणे संपूर्ण देशाचे भविष्य कसे बदलू शकतात, हे यातून शिकायला मिळते.
२. ट्रेडिंग गेम (Gary Stevenson): माजी ट्रेडर गॅरी स्टीव्हन्सन यांनी लिहिलेले हे पुस्तक जागतिक वित्तीय बाजारपेठेचे आतील वास्तव आणि श्रीमंत-गरिबांमधील वाढती दरी यावर भाष्य करते. आधुनिक भांडवलशाहीचे स्वरूप यात मांडले आहे.
३. हिस्टरी ऑफ वेस्टर्न फिलॉसॉफी (Bertrand Russell): प्राचीन ग्रीसपासून ते आधुनिक काळापर्यंत पाश्चात्य विचारांचा विकास कसा झाला, याचा मागोवा या अभिजात पुस्तकात घेतला आहे. आजचे राजकारण आणि अर्थकारण समजून घेण्यासाठी हे पुस्तक खूप मदत करते.
४. ऑन ट्रुथ (J. Krishnamurti): प्रसिद्ध विचारवंत जिद्दू कृष्णमूर्ती यांचे हे पुस्तक सत्य, मानवी आकलन आणि आत्म-जागृती या विषयावर सखोल भाष्य करते. वाचकाला स्वतःच्या विचारांवर पुनर्विचार करण्यास हे पुस्तक प्रवृत्त करते.
५. फ्रीडम फ्रॉम द नोन (J. Krishnamurti): जिद्दू कृष्णमूर्ती यांचेच हे दुसरे पुस्तक माणसाला सामाजिक बंधने, भीती आणि जुनाट विचारांमधून मुक्त होऊन स्वतःचा शोध घेण्याची प्रेरणा देते.
६. ॲनिमल फार्म (George Orwell): जॉर्ज ऑर्वेल यांची ही अत्यंत प्रसिद्ध राजकीय कादंबरी आहे. सत्तेची हाव माणसाला कशी भ्रष्ट करू शकते आणि क्रांतीचे आदर्श कसे बदलतात, याचे चपखल वर्णन यात आहे. आजच्या काळातही या पुस्तकाचे संदर्भ तंतोतंत लागू होतात.
७. व्हेन जीनिअस फेल्ड (Roger Lowenstein): जगातील सर्वात हुशार आर्थिक मेंदू चालवत असलेला एक मोठा हेज फंड कसा पत्त्यासारखा कोसळला, याची ही सत्यकथा आहे. अवाजवी आत्मविश्वास आणि बाजारातील जोखीम याबद्दल हे पुस्तक एक धडा देते.
