Ashok Kharat : स्वतःला अंकशास्त्रातील तज्ज्ञ आणि भविष्यवेत्ता म्हणवून घेणाऱ्या अशोक खरात याच्या भोंदूगिरीचे एकामागून एक धक्कादायक पदर आता उलगडू लागले आहेत. मंत्र्यांपासून ते बड्या अधिकाऱ्यांपर्यंत सर्वांना आपल्या जाळ्यात ओढणाऱ्या या भोंदूबाबाला पोलिसांनी अटक केल्यानंतर, आता त्याच्या लक्झरी जीवनशैलीमागील अंधश्रद्धेचा खेळ समोर आला आहे. विशेष म्हणजे, ज्या ‘९’ या अंकाला तो आपला शुभांक मानत होता, तोच अंक आता त्याच्या विनाशाचे कारण ठरताना दिसत आहे.
अंकशास्त्राच्या नावाखाली फसवणुकीचे जाळे
तपासातून असे समोर आले आहे की, खरात हा ‘९’ या अंकाला अत्यंत पवित्र आणि समृद्धीचे प्रतीक मानत असे. अंकशास्त्रानुसार ९ हा ग्रह मंगळाचे प्रतीक असून तो पैसा आणि वैश्विक कल्याण आकर्षित करतो, असा दावा खरात करायचा. याच अंधश्रद्धेपोटी त्याने त्याच्या मर्सिडीजसह सर्व महागड्या वाहनांसाठी आरटीओकडून विशेष ‘चॉइस नंबर’ घेतले होते, ज्यांची बेरीज ९ येते (उदा. ६४५३: ६+४+५+३ = १८; १+८ = ९). एका व्यापाऱ्याला भीती घालून बळकावलेली मर्सिडीज कार आणि इतर मालमत्तांवर आता सक्तवसुली संचालनालयाची (ED) नजर असून, त्याने कमावलेल्या अफाट संपत्तीचा शोध घेतला जात आहे.
कोंबडी चोरापासून ते ‘कॅप्टन’ पदापर्यंतचा खोटा प्रवास
नाशिक पोलिसांनी खरातच्या भूतकाळाचा शोध घेतला असता, अत्यंत थक्क करणारी ‘कुंडली’ समोर आली आहे. सिन्नर तालुक्यातील कहांडळवाडी येथील मूळ रहिवासी असलेल्या लक्ष्मण एकनाथ खरात (बदललेले नाव: अशोक खरात) याचे बालपण गरिबीत आणि चोरीच्या तक्रारींत गेले. १० वी नापास असलेल्या खरातवर १९८३ मध्ये अंडी आणि कोंबड्या चोरल्याचा आरोप होता. त्यानंतर अनेक वर्षे बेपत्ता राहिल्यानंतर त्याने अचानक प्रकट होऊन आपण नौदलात ‘कॅप्टन’ असल्याचे खोटे सांगत लोकांचा विश्वास संपादन केला. २००८-०९ च्या सुमारास त्याने मिरगाव येथे ‘ईशान्येश्वर’ मंदिराची उभारणी केली आणि ‘शिवनिका ट्रस्ट’च्या माध्यमातून आपला अंधश्रद्धेचा बाजार मांडला.
लैंगिक शोषण आणि एसआयटीचा तपास
केवळ आर्थिक फसवणूकच नाही, तर खरातवर महिलांच्या लैंगिक शोषणाचेही गंभीर आरोप आहेत. एका तरुणीला ब्लॅकमेल केल्याच्या तक्रारीवरून सुरू झालेला तपासाचा धागा थेट खरातच्या अघोरी कृत्यांपर्यंत पोहोचला. राज्य सरकारने या प्रकरणाचे गांभीर्य ओळखून विशेष तपास पथकाची (SIT) स्थापना केली आहे. एसआयटीने जारी केलेल्या हेल्पलाइन क्रमांकावर आतापर्यंत अनेक पीडित महिला आणि व्यावसायिकांनी खरातच्या विरोधात तक्रारी नोंदवल्या आहेत. १५४ देशांची भ्रमंती केल्याचा दावा करणाऱ्या या भोंदूने अनेक राजकीय नेत्यांशी असलेल्या संबंधांचा वापर करून आपला प्रभाव वाढवला होता.
सद्यस्थिती आणि कायदेशीर कारवाई
१७ मार्च २०२६ रोजी खरातला अटक करण्यात आली असून, सध्या तो पोलीस कोठडीत आहे. त्याच्या मालमत्तेची चौकशी करताना ईडीने मोठ्या प्रमाणावर कागदपत्रे हस्तगत केली आहेत. बांधकाम व्यावसायिक आणि बड्या व्यक्तींना जाळ्यात ओढून त्यांचे आर्थिक शोषण करणाऱ्या खरातने या पैशांचा विनियोग कुठे केला, याचा तपास आता युद्धपातळीवर सुरू आहे.
