High Speed Rail Corridors: भारतीय रेल्वेने देशातील रेल्वे प्रवासाचा वेग आणि चेहरामोहरा पूर्णपणे बदलण्यासाठी एक अत्यंत महत्त्वाकांक्षी पाऊल उचलले आहे. देशभरातील प्रमुख शहरांना जोडण्यासाठी तब्बल 7 नवीन हाय-स्पीड रेल्वे कॉरिडॉर उभारण्याची मोठी योजना आखण्यात आली आहे. या महाकाय प्रकल्पासाठी अंदाजे 16 लाख कोटी रुपयांचा खर्च अपेक्षित आहे.
रेल्वे मंत्री अश्विनी वैष्णव यांनी नुकताच या प्रस्तावित मार्गांचा सविस्तर आढावा घेतला आहे. या नवीन मार्गांमुळे प्रवाशांचा प्रवासाचा वेळ मोठ्या प्रमाणावर वाचणार असून प्रमुख शहरांमधील अंतर तासांऐवजी मिनिटांवर येणार आहे. यामध्ये प्रामुख्याने दिल्ली-वाराणसी आणि वाराणसी-सिलिगुडी यांसारख्या मोठ्या मार्गांचा समावेश असून प्रकल्प पूर्ण झाल्यावर दिल्ली ते सिलिगुडी हा प्रवास अवघ्या 6 तासांत पूर्ण करता येईल.
मुंबईकरांसाठी सर्वात मोठी गूड न्यूज; वेळेची होणार प्रचंड बचत
महाराष्ट्रातील दोन प्रमुख शहरे असलेल्या मुंबई आणि पुणे दरम्यान प्रवास करणाऱ्या नोकरदार आणि व्यवसायिकांसाठी हा प्रकल्प मैलाचा दगड ठरणार आहे:
- अवघ्या ४८ मिनिटांत प्रवास: मुंबई ते पुणे दरम्यानच्या 170 किलोमीटरच्या प्रस्तावित हाय-स्पीड मार्गामुळे हा प्रवास अवघ्या 48 मिनिटांत पूर्ण करणे शक्य होईल.
- डेक्कन क्वीनपेक्षा वेगवान: सध्या या दोन शहरांदरम्यान धावणारी सर्वात वेगवान ट्रेन ‘डेक्कन क्वीन’ असून या प्रवासासाठी 3 तासांपेक्षा जास्त वेळ लागतो. नवीन बुलेट ट्रेनमुळे हा वेळ कमालीचा कमी होणार आहे.
प्रस्तावित हाय-स्पीड रेल्वे कॉरिडॉर आणि वेळेचे गणित
रेल्वे मंत्रालयाने प्रस्तावित केलेल्या नवीन मार्गांचे अंतर आणि प्रवासाचा अंदाजित वेळ खालील तक्त्यामध्ये दिला आहे:
| प्रस्तावित बुलेट ट्रेन मार्ग | अंतर (किमी) | प्रवासाचा अंदाजित वेळ |
| मुंबई – पुणे | 170 किमी | 48 मिनिटे |
| पुणे – हैदराबाद | 501 किमी | साधारण 1 तास 36 मिनिटे |
| दिल्ली – वाराणसी | 945 किमी | 3.5 तास |
| वाराणसी – सिलिगुडी | 670 किमी | साधारण 2 तास 24 मिनिटे |
| हैदराबाद – बेंगळुरू | अजून जाहीर नाही | लवकरच जाहीर होणार |
| बेंगळुरू – चेन्नई | अजून जाहीर नाही | लवकरच जाहीर होणार |
| हैदराबाद – चेन्नई | अजून जाहीर नाही | लवकरच जाहीर होणार |
भारताची स्वतःची स्वदेशी बुलेट ट्रेन; २०२७ मध्ये पहिली धाव
भारतीय रेल्वेने केवळ परदेशी तंत्रज्ञानावर अवलंबून न राहता स्वतःची पहिली पूर्णपणे स्वदेशी बुलेट ट्रेन विकसित करण्याचे काम सुरू केले आहे. ही भारतात तयार होणारी बुलेट ट्रेन सुरुवातीला ताशी 280 किलोमीटरच्या वेगाने धावणार असून भविष्यात हा वेग आणखी वाढवण्याचा रेल्वेचा विचार आहे.
देशातील पहिल्या मुंबई-अहमदाबाद बुलेट ट्रेन प्रकल्पांतर्गत सुरत ते बिलिमोरा दरम्यानचा पहिला टप्पा ऑगस्ट 2027 मध्ये प्रवाशांच्या सेवेत सुरू होण्याची दाट शक्यता आहे. हा नवीन प्रकल्प पूर्ण वेगाने सुरू झाल्यानंतर रेल्वे मंत्रालय दरवर्षी तब्बल 250 किलोमीटर लांबीचे हाय-स्पीड रेल्वे ट्रॅक तयार करण्याचे उद्दिष्ट ठेवून काम करणार आहे.
हे देखील वाचा – Abhijit Dipke Attack: “10 वेळा कानाखाली मारली तरी…” जयपूरमधील हल्ल्यानंतर अभिजित दिपकेंची पहिली प्रतिक्रिया
